Европа
Русија нема да покани странски лидери на големата воена парада во Москва

Русија нема да покани странски лидери на традиционалната воена парада на Денот на победата на 9 мај, соопшти Кремљ.
Дури и белорускиот претседател Александар Лукашенко, близок соработник на рускиот претседател Владимир Путин, не се очекува на прославата, пренесуваат агенциите. „Колку што знам, тој не планира да дојде“, изјави портпаролот на Кремљ, Дмитриј Песков.
Не е невообичаено Москва да не покани гости на парадата, рече Песков, додавајќи дека 77-годишнината не е голем настан за славење.
„Тоа нема да биде јубилеј. Тоа е наш празник, свет ден за Русија и рускиот народ. Не поканивме странски лидери“, рече тој, а пренесе агенцијата Тасс.
Пробите за традиционалната парада во која учествуваат околу 11.000 војници на Црвениот плоштад во Москва започнаа оваа недела.
Песков не го спомна тоа, но причината за отсуството на странски шефови на држави и влади оваа година е секако руската инвазија на Украина, анализираат медиумите. Оценуваат дека дури и државниците од земјите кои зазедоа помек став кон Москва веројатно нема да одговорат на повикот да му се покаже поддршка на Путин на таков јавен начин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Претседателот на Финска: Ќе поминеме преку барањата што Турција ги искажа

„Финска ќе помине преку барањата што Турција ги искажа во спротивставување на плановите на таа земја и на Шведска да се приклучат кон НАТО“, изјави денеска финскиот претседател Саули Нинисто по средбата со американскиот претседател Џозеф Бајден и шведската премиерка Магдалена Андерсон во Белата куќа.
„Имаме причина да поминеме преку она што Турција го изрази на соодветен начин, а потоа да ги дадеме нашите јасни одговори“, изјави Нинисто на новинарите, пренесе „Ројтерс“.
По децениска неутралност, Финска и Шведска вчера официјално ја поднесоа својата апликација за влез во НАТО.
Европа
Шолц: Можна е измена на договорот за ЕУ

Германскиот канцелар Олаф Шолц денеска изјави дека не ја исклучува можноста за измена на договорот за Европската Унија, договорот од Мастрихт.
Неговата изјава дојде во време на обновена дебата за можните промени во начинот на кој функционира ЕУ, делумно поттикната од конференцијата за иднината на Европа, која предложи подлабока интеграција, вклучително и укинување на националното вето.
Ова го поттикна Европскиот парламент да повика на ревизија на неколку договори на Европската Унија, иако идејата долго време предизвика сомнеж кај многу членки на ЕУ, кои веруваат дека тоа не е неопходно и би го оттргнало вниманието од поважни прашања.
Доколку е потребно, можеме да разговараме за измена на неколку договори, вклучувајќи го и договорот за ЕУ, што не е табу, рече Шолц во Бундестагот.
Но, нагласи дека за такво нешто ќе треба најголем можен консензус бидејќи во овој момент најмалку се потребни полемики за институционалните прашања.
По одлуката на Унгарија да ја блокира забраната за купување руска нафта, минатата недела многу се зборуваше за тоа дали ЕУ треба да ја укине одлуката за вето за надворешната политика.
Некои лидери на ЕУ поддржуваат укинување на ветото за некои прашања и промена на договорот, но далеку од јасно е дали тие би се договориле за тоа кои одлуки може да се усвојат со мнозинство гласови и кои елементи од договорот треба да се променат, пишува „Политико“.
Шолц денеска оцени дека мнозинството гласови е една од идеите чија цел е ЕУ да биде поефикасна и посочи дека е среќен што сè повеќе луѓе ја следат.
Некои членки на ЕУ веќе се изјаснија против промена на договорот за ЕУ, а на почетокот на мај, 13 земји, вклучително и балтичките и скандинавските, изјавија дека не ги поддржуваат несоодветните и предвремени обиди за почнување на процесот за промена на договорот, пренесуваат медиумите.
Европа
Премиерот на Италија апелира за итен прекин на огнот во Украина и олеснување на преговорите

Италијанскиот премиер Марио Драги, денеска, повика на итен прекин на огнот во Украина за да се овозможат преговори.
„Мора да се постигне прекин на огнот што е можно побргу“, рече Драги во обраќањето пред Сенатот, горниот дом на италијанскиот парламент, отворајќи дебата за улогата на Италија во поддршката на Украина, која создава растечки тензии во владејачкото мнозинство.
Премиерот Марио Драги наведува дека е важно да се задржи притисокот врз Русија преку економски санкции бидејќи Москва мора да биде доведена на преговарачка маса, пренесе „Танјуг“.