Свет
Сведок на убиство во Франција: Полицаецот рече дека ќе му пука во главата

Франција ја доживеа петтата ноќ на немири, со тешки судири меѓу полицијата и демонстрантите во јужниот град Марсеј, но ноќта сепак беше помирна отколку во изминатите денови.
Немирите започнаа откако полицијата во вторникот го уби 17-годишното момче од алжирско потекло Нахел во париското предградие Нантер.
Неговиот пријател, кој бил во автомобилот, објавил видео на социјалните мрежи во кое вели дека сака да ја претстави својата верзија за настаните бидејќи на социјалните мрежи се шират многу лаги. Тој кажа дека двајцата позајмиле мерцедес и решиле да се возат: „Не бевме под дејство на алкохол или дрога“.
Тие возеле по автобуската лента кога забележале дека ги следат полициски мотори со вклучена ротација, па застанале. Полицаецот потоа отишол до прозорецот од автомобилот, вели младиот човек, и му рекол на Нахел да го спушти. Исклучи го моторот или ќе те застрелам“, рекол полицаецот, тврди младиот човек од автомобилот.
Тој вели дека полицаецот потоа го удрил Нахел со кундакот од пиштолот, а потоа пристигнал друг офицер кој исто така го удрил Нахел со кундакот. Тврди дека првиот офицер потоа му ставил пиштол на главата на Нахел и рекол: „Не мрдај или ќе ти ставам куршум во главата“.
Младиот човек тврди дека другиот полицаец тогаш рекол: „Пукај го“.
Тој вели дека првиот полицаец потоа повторно го удрил Нахел со пиштолот, поради што го ослободил стапалото од сопирачката и автомобилот се движи напред. Тој тврди дека другиот службеник потоа пукал со оружјето, поради што Нахел стапнал на гас.
„Го видов како го боли, се тресеше. Удривме во бариерата“, вели тој.
„Се плашев. Излегов од автомобилот и истрчав. Мислев дека може да ме застрелаат. Затоа истрчав”, рекол тој и додал: „Шокиран сум од она што се случи пред мои очи, на мојот пријател“.
Полицаецот кој го застрела Нахел побара од неговото семејство прошка.
Јавниот обвинител Паскал Праче рече дека полицајците се обиделе да го запрат тинејџерот бидејќи изгледал млад и возел Мерцедес со полски регистарски таблички на автобуската лента. Тој, наводно, поминал на црвено светло за да не биде запрен, а потоа заглавил во сообраќајот.
Полицаецот рече дека се плашел дека тој и неговиот колега или некој друг може да бидат удрени од автомобил додека Нахел се обидел да избега, рече обвинителот.
Полицаецот е ставен под службена истрага за убиството и е задржан во притвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Црна Гора планира да произведува дронови; САД: Покажуваат дека се сериозни

Црна Гора планира да започне со производство на беспилотни летала во соработка со американска компанија, а првата серија ќе биде донирана на Украина, објавија денес црногорските медиуми, повикувајќи се на „писмо за намери“ усвоено од владата во Подгорица кон крајот на мај.
Во тој документ, како што објави Радио Слободна Европа, црногорската влада наведува дека оваа иницијатива ќе ги подобри капацитетите на војската во однос на НАТО, ќе ги поддржи одбранбените потреби на Украина, како и позицијата на Црна Гора како сигурен снабдувач на најсовремена одбранбена опрема на глобалниот пазар.
Се нагласува дека договорот вреден 15 милиони долари ќе биде поддржан и од американската администрација предводена од претседателот Доналд Трамп. Писмото за намери усвоено од црногорската влада на 29 мај наскоро ќе го потпишат црногорскиот министер за економски развој Ник Ѓељошај и Роберт Џ. Донахју, директор на компанијата „Бај Лајт Профессионал ИТ Сервисиз ДОО“. Тоа ќе биде претходница на договорот што треба да се потпише во септември.
Договорот предвидува користење на компании од Црна Гора и регионот за тестирање на воздушни и подводни технологии на беспилотни системи. Исто така, се наведува дека владата на Црна Гора се согласува да ја донира првата серија беспилотни системи од рано производство и сродна одбранбена опрема на Украина.
Амбасадата на САД објави дека договорот, доколку биде одобрен, ќе промовира заедничка безбедност, стабилност и напредок и дека владата на САД ги охрабрува сите земји-партнери да инвестираат и да соработуваат со американските компании.
„Инвестирањето во одбранбени капацитети, како што се американските беспилотни воздушни системи, ја покажува сериозноста на Црна Гора во исполнувањето на своите обврски кон Алијансата во време кога бараме од Европа да преземе поголем товар за нејзината безбедност“, порачаа тие.
Европа
Естонија се повлекува од Конвенцијата за забрана на противпешадиски мини, стравува од Русија

Парламентот на Естонија денес гласаше за повлекување од Конвенцијата од Отава со која се забранува употребата на противпешадиски мини, поради загриженост за потенцијална воена закана од соседна Русија.
Осумдесет и еден од 101 пратеници го поддржаа предлогот, соопшти прес-службата.
Сите пет земји од Европската Унија и НАТО што граничат со Русија – Литванија, Латвија, Естонија, Полска и Финска – објавија планови за повлекување од меѓународниот договор поради воената закана што ја претставува нивниот многу поголем сосед.
Русија не е членка на Конвенцијата од Отава и користеше мини при инвазијата на Украина. Гласањето на Естонија следеше по гласањето на Латвија и Литванија, чии парламенти веќе го одобрија повлекувањето. Земјите ќе можат да складираат и распоредуваат мини шест месеци откако ќе ги известат другите членки на договорот и Обединетите нации за нивната одлука. Ниту една од петте земји сè уште не го сторила тоа.
Регион
Европската комисија не се откажува од рудникот за литиум во Србија, тој се појави на новата листа

Европската комисија денес објави список од 13 стратешки проекти во областа на критичните суровини во трети земји, вклучувајќи го и проектот Јадар во западна Србија, кој предизвика силни протести и спротивставување во таа земја.
Списокот на стратешки проекти во областа на критичните суровини во трети земји вклучува проекти во Канада, Гренланд, Казахстан, Норвешка, Србија, Украина, Замбија, Нова Каледонија, Мадагаскар, Малави, Јужна Африка и Обединетото Кралство.
Според проценката на Комисијата, избраните проекти, од кои повеќето се однесуваат на суровини неопходни за производство на електрични возила и батерии, како што се литиум, никел, кобалт, манган и графит, бараат вкупно 5,5 милијарди евра капитални инвестиции за да започнат со работа.
На листата е вклучен и проектот Јадар во долината на реката Јадар во западна Србија, кој предизвика широко распространето негодување и отпор поради страв од загрозување на здравјето на луѓето и животната средина.
На почетокот на 2022 година, српската влада го поништи усвоениот просторен план за рудникот во долината на реката Јадар и го запре проектот. Сепак, во јули минатата година, повторно донесе одлука со која му дозволи на британско-австралискиот рударски гигант „Рио Тинто“ да го рестартира својот проект за рударство на литиум.
Избраните стратешки проекти ќе добијат поддршка од Комисијата, земјите-членки и финансиските институции во форма на полесен пристап до финансирање. Комисијата, исто така, ќе ја зајакне соработката со трети земји за да се обезбеди развој на овие проекти, особено преку стратешки партнерства што веќе се воспоставени со некои од земјите.