Свет
Зеленски: Мене сакаат да ме убијат само во Русија, додека целиот свет сака да го убие Путин
Најмалку 21.000 платеници на Вагнер загинале во борбите во Украина, според украинскиот претседател Володимир Зеленски.
Украинскиот лидер изјави дека руската приватна воена група претрпела „огромни загуби“, особено на истокот на Украина, објави Си-Ен-Ен.
„Нашите војници убиле 21.000 вагнерци само во источна Украина“ изјави Зеленски пред новинарите во саботата, додавајќи дека се ранети уште 80.000 платеници.
„Ова беа огромни загуби за Вагнер“, рече тој.
Си-Ен-Ен не може самостојно да ги потврди овие тврдења на Зеленски, изнесени за време на конференцијата со шпанските медиуми по повод посетата на шпанскиот премиер Педро Санчез на Киев. Ова беше трета посета на Санчез на Украина, која се случи во време кога Шпанија го презема ротирачкото претседателство со Советот на Европската унија и по наводното доаѓање на директорот на ЦИА, Вилијам Барнс во Киев.
„Вашингтон пост“ објави, повикувајќи се на свои извори, дека Барнс неодамна отпатувал во Украина и се сретнал со Зеленски и со украинските разузнавачи. Неименуван американски функционер изјави за весникот дека Барнс отпатувал во Киев пред бунтот на Вагнер, што „не било тема на разговор“.
„Њујорк тајмс“ пишува дека по неуспешниот бунт, директорот на ЦИА разговарал со шефот на руската служба за надворешно разузнавање, Сергеј Наришкин, за да го увери дека САД немаат никаква улога во организирањето на бунтот.
Барнс во саботата рече дека вооружениот бунт на Вагнер, кој тој го опиша како „вооружен предизвик за руската држава“ го покажал „корозивниот ефект“ на украинската војна врз самата Русија.
Тврдењата на Зеленски за загубите на Вагнер беа изнесени само една недела по неуспешниот бунт на шефот на платеничката група Евгениј Пригожин. Војниците на Вагнер тргнаа кон Москва, преземајќи ја контролата врз воените објекти во Ростов-на-Дон и Воронеж, за што Пригожин рече дека е одговор на рускиот воен напад врз Вагнер. Бунтот ненадејно беше прекинат откако Пригожин се согласи на договор постигнат со посредство на белорускиот претседател Александар Лукашенко.
Иднината на Вагнер сега е нејасна. Според договорот, Пригожин мора да замине во Белорусија, а неговите борци добија опција или да се приклучат на руската армија, безбедносните служби, да се вратат кај своите семејства или исто така да одат во Белорусија.
Во говорот во саботата, Зеленски рече дека бунтот на Пригожин „влијаел на моќта на Русија на бојното поле“ и може да биде корисен за украинската контраофанзива.
„Оваа ситуација мора да ја искористиме за да го истиснеме непријателот од нашата земја. Ја губат војната. Немаат повеќе победи на бојното поле во Украина, па почнуваат да го бараат виновникот“, рече тој.
Сепак, тој додаде дека нема да избрзува со контраофанзивата бидејќи ги цени човечките животи и мора стратешки да ги испрати своите војници.
„Секој метар, секој километар чини животи. Можете да направите нешто многу брзо, но полето е минирано до земја. Луѓето се нашето богатство. Затоа сме многу внимателни“, рече Зеленски.
За време на конференцијата во саботата, тој, исто така, го изрази својот страв од губење на двопартиската поддршка од САД, по „опасните пораки што доаѓаат од некои републиканци“.
„Мајк Пенс ја посети и ја поддржува Украина – прво како Американец, а потоа како републиканец. Имаме двопартиска поддршка, но во нивните кругови има различни пораки во врска со поддршката за Украина. Има пораки кои доаѓаат од некои републиканци, понекогаш опасни пораки, дека можеби ќе има помала поддршка. Најважно за Украина е да не ја изгуби двопартиската поддршка“, рече Зеленски.
На новинарско прашање дали е во опасност и дали се плаши за својот живот, Зеленски одговори:
„Поопасно е за Путин отколку за мене, да бидам искрен. Затоа што тие сакаат да ме убијат само во Русија, додека цел свет сака да го убие“.
Шпанскиот премиер му вети помош на Зеленски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Јужна Кореја го забрани пристапот до видео во кое се велича Ким Џонг Ун како голем лидер
Јужнокорејскиот медиумски регулатор денеска соопшти дека го забранува пристапот до севернокорејското пропагандно музичко видео за кое се вели дека „го идолизира и велича“ севернокорејскиот лидер Ким Џонг Ун како „пријателски татко“ и „голем водач“.
Регулаторот рече дека одлуката за забрана на видеото дошла откако властите на разузнавачката агенција побарале да се провери дали видеото го прекршило јужнокорејскиот закон.
Видеото стана хит на социјалните мрежи ширум светот, бидејќи беше поставено како краток клип на ТикТок и други платформи, објави Ројтерс.
Свет
Израел: Имаме намера да ја прошириме воената операција во Рафах
Израел има намера да ја прошириме воената операција во Рафах, изјави денеска министерот за одбрана Јоав Галант на советникот на американскиот претседател Џо Бајден, кој предупреди на поголема акција во градот на југот на Појасот Газа, што може да доведе до масовни цивилни жртви.
Израел го опишува Рафах, град на границата на крајбрежната енклава со египетскиот Синај, како последно засолниште на исламистичкото движење Хамас, чие лидерство и борбен капацитет се обиде да го оневозможи за време на повеќе од седуммесечната војна.
По неколку недели јавно несогласување со Вашингтон околу планирањето на нападот на Рафах, Израел им нареди на палестинските цивили да евакуираат делови од градот на 6 мај, а израелските војници и тенкови ја започнаа операцијата. „Ние сме посветени на проширување на копнената операција во Рафах за да го завршиме отстранувањето на Хамас и враќањето на заложниците“, му рекол Галант на советникот за национална безбедност на Белата куќа Џејк Саливан, се вели во соопштението од неговата канцеларија.
Израел верува дека Хамас држи десетици заложници во Рафах откако го нападна јужен Израел на 7 октомври. Западните сили и Египет изразија загриженост за судбината на стотици илјади раселени Палестинци кои се засолниле таму и покрај израелските гаранции за нивната безбедност.
Агенцијата на Обединетите нации за помош и работа за палестинските бегалци (УНРВА) денеска соопшти дека проценува дека од 6 мај Рафах го напуштиле 810.000 луѓе, што е потенцијално повеќе од половина од неговото воено население.
Во соопштението од канцеларијата на Галант се истакнува дека тој „на советникот Саливан му ги претставил мерките што Израел ги спроведе за евакуација на населението од областа Рафах и обезбедување соодветен хуманитарен одговор“.
Регион
Заврши вештачењето на осомничените за убиството на Данка Илиќ, прогласени се за пресметливи
Дејан Драгијевиќ и Срѓан Јанковиќ, кои се осомничени за убиството на Данка Илиќ (2), по психијатрискиот преглед во Специјалната затворска болница во Белград, се прогласени за пресметливи.
Драгијевиќ и Јанковиќ во април беа испратени во Специјалната затворска болница во Белград на психијатриско вештачење, а денеска од Вишото јавно обвинителство Зажечар за „Нова.рс“ потврдија дека осомничените врз основа на наодите на вештачењето се прогласени за пресметливи.
Според досега добиените резултати од вештачењето на ДНК во Вишото јавно обвинителство во Заечар, од девојчето Данка Илиќ нема биолошки траги.
Сè уште трае и вештачењето на движењето на возилото на осомничениот врз основа на ГПС-уредот.