Свет
Северна Кореја гради големо складиште за нуклеарни ракети

Северна Кореја гради огромно складиште според новата серија сателитски слики што заеднички ги анализираа Центарот за стратешки и меѓународни студии со седиште во Вашингтон и „Џејнс интелиџенс ривју“.
Новата база во непосредна близина на главниот аеродром во Пјонгјанг, наводно се состои од подземни складишта и хангари доволно високи за во нив да се смести интерконтиненталната балистичка ракета (ИЦБМ) „Хвасонг-15“ во исправена положба за тестирање и одржување. Исто така, во нив може да се смести мобилниот „транспортер-исправувач-фрлач“ (ТЕЛ) на кој може незабележително да се носат низ целата земја и да се избегне уништување пред лансирањето.
Објектот располага со сопствен железнички терминал со скриена област за утовар за да се спречи опремата што влегува и излегува да биде откриена од шпионски сателити.
Според Џозеф Бермудез, автор на извештајот, структурата наречена „Сил-ли објект за поддршка на балистички ракети“ може да ги смести во себе сите познати и очекувани балистички ракети на Северна Кореја и нивните лансери за одржување, складирање на балистичките ракети и нивните транспортери или каква за било комбинација на овие функции.
Се верува дека подземното складиште е изградено во ’80-тите години на минатиот век како засолниште од напади за борбените авиони кои требало да го заштитат Пјонгјанг во случај на војна. Авионите подоцна биле преместени на друго место и складот излегол од употреба.
Одделно има 17 бази за противвоздушна одбрана и касарна – во радиус од пет километри од базата, која, наводно, е заштитена со ракети земја-воздух.
„Иако прецизната функција на објектот е нејасна, неговата конфигурација и големината на зградите и на подземниот објект укажуваат дека може да се користи за склопување балистички ракети од компоненти испорачани со железница од околните фабрики“, се вели во извештајот.
„Хвасонг-15“ беше тестиран во ноември 2017 година и оттогаш стана обележје на нуклеарните аспирации на земјата. Во тоа време, во државните медиуми се славеше како нов вид систем за интерконтинентално балистичко ракетно оружје кој може да носи супертешки нуклеарни боеви глави и да го нападне целото копно на САД.
Сепак, лидерот на Северна Кореја, Ким Јонг-ун, почна процес на приближување со САД што досега резултираше во три значајни средби со претседателот Доналд Трамп. На пример, пред нивниот прв самит во Сингапур тој се согласи да ги прекине нуклеарните тестирања и тестирањата на ИЦБМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) „Како несмасен дедо кој флертува“: коментарот на Трамп до новинарка предизвика хаос на социјалните мрежи

Доналд Трамп предизвика бран критики на социјалните мрежи откако ја нарече новинарката „прекрасна“ за време на настан во Белата куќа – и покрај советот од неговата портпаролка да не го прави тоа.
Непријатниот момент се случи во петок, 27 јуни, за време на потпишувањето на мировниот договор меѓу Демократска Република Конго и Руанда, кој се одржа во Белата куќа. На церемонијата присуствуваа министрите за надворешни работи на двете земји – Тереза Кајквамба Вагнер од Конго и Оливие Ндухунгирехе од Руанда – како и Џеј Ди Венс и Марко Рубио.
Во еден момент, новинарката Харијана Верас, дописник од Ангола, се појави на говорницата, пофалувајќи го американскиот претседател за неговата улога во мировниот процес и изразувајќи надеж за траен мир.
Трамп потоа одговори со коментар што предизвика мешани реакции: „Тоа е толку убаво кажано. Каролина (портпаролката на Каролина Ливит) ми рече, првото нешто што го кажа беше: „Немој да го кажуваш тоа, политички е некоректно… Но, таа рече дека си убава. И ти си навистина убава!“
„Знам дека не треба да го кажувам тоа, знаете? Можеби е крај на мојата политичка кариера, но сепак ќе го кажам. Прекрасна си – и однатре и однадвор. Би сакал да имам повеќе новинари како тебе“, додаде тој. Верас му се заблагодари, а тонот на Трамп беше, според очевидци, хумористичен и лежерен.
Сепак, реакцијата на интернет не беше блага.
Корисниците на Редит го нарекоа однесувањето на Трамп „морничаво“ и „несоодветно“. Еден корисник напиша: „Трамп ја нарекува новинарката ‘прекрасна’ на средина од интервју… Навистина морничаво однесување“. Друг коментираше: „Како несмасен дедо што флертува со келнерка (а не остава бакшиш).“
Од друга страна, неговите поддржувачи тврдат дека тоа бил безопасен комплимент, но критичарите предупредуваат дека ваквите изјави испраќаат порака за несоодветни стандарди на однесување кон новинарките и жените воопшто.
Свет
Претседателот на Јужна Кореја: Трговскиот договор со САД е неизвесен пред рокот на Трамп

Јужнокорејскиот претседател Ли Џе-мјунг изјави дека не е сигурно дали Сеул и Вашингтон ќе можат да постигнат договор за царините до 8 јули, кога истекува рокот поставен од американскиот претседател Доналд Трамп.
На прес-конференцијата, Ли нагласи дека преговорите се во тек и дека двете страни сè уште ги разјаснуваат своите позиции и ги идентификуваат областите на договор, објави АП.
„Преговорите за царините не беа лесни, но ние се трудиме да постигнеме заемно корисно решение. Во моментов е тешко да се каже со сигурност дали ќе можеме да постигнеме договор до 8 јули, но сè уште работиме на тоа“, рече Ли.
90-дневната пауза на Трамп во примената на реципрочните царини истекува на 9 јули, што може да доведе до воведување нови даноци за јужнокорејските производи, вклучувајќи автомобили и полупроводници, кои ја формираат основата на извозот на Јужна Кореја, истакнува агенцијата.
Ли повика на трпение, нагласувајќи дека брзањето со постигнување договор нема да биде во интерес на земјата.
Министерот за трговија на Јужна Кореја, Џео Хан Ку, планира посета на Вашингтон за понатамошни преговори со американските трговски претставници.
Зборувајќи за Северна Кореја, Ли потврди дека ќе работи на обновување на преговорите со Пјонгјанг, и покрај длабоката недоверба меѓу Северот и Југот.
Тој истакна дека Јужна Кореја ќе се стреми кон прагматичен пристап во подобрувањето на односите со Северна Кореја, а во исто време ќе одржува силен сојуз со САД.
„Иако е предизвикувачки, мислам дека треба да се движиме кон подобра координација со Северна Кореја“, рече Ли.
Владата на Јужна Кореја веќе презеде чекори за намалување на тензиите со Северна Кореја, вклучително и суспендирање на пропагандните емитувања и забрана за пуштање пропагандни балони.
Ли, исто така, рече дека ги поддржува напорите на Трамп да продолжи дијалогот со севернокорејскиот лидер Ким Џонг-ун, пренесува Танјуг.
Регион
Полицијата приведе 79 демонстранти во Србија, вклучувајќи и универзитетски професор

Речиси 80 демонстранти беа приведени, вклучувајќи еден универзитетски професор, а неколку лица беа повредени вчера вечер кога полицијата интервенираше, разбивајќи ги блокадите поставени во акции на сè помасовна граѓанска непослушност, на која повикаа студентите, по антивладиниот митинг на 28 јуни.
Студентите ја обвинија полицијата за брутален напад врз мирни демонстранти кои седеа на раскрсница пред Правниот факултет и за кршење на автономијата на универзитетот со обид за упад во факултетот, тврдење кое Министерството за внатрешни работи категорично го негираше. Полицијата само во таа операција привела 23 лица.
Според објавите на социјалните мрежи, приведена е и универзитетската професорка и активистка за човекови права Билјана Стојковиќ.
Во ново соопштение во четврток наутро, Министерството за внатрешни работи објави дека синоќа ги проверило идентитетите на вкупно 1.297 лица на терен, а 79 од нив се приведени – 72 за помали прекршоци и седум за кривични дела.
Сите блокади на територијата на Србија и Белград се отстранети и сите патишта се проодни, додаде Министерството за внатрешни работи.
За денес се најавени акции на граѓанска непослушност во неколку градови.