Европа
Секој може да управува подморница со конзола за видео игри од 30 долари: директорот на компанијата што ја создаде подморницата

Ивршниот директор на „Oceangate“, Стоктон Раш, чија подморница „Титан“ исчезна за време на експедиција до потонатиот брод Титаник, во поранешно интервју изјавил дека експертиза не е потребна, затоа што секој може да управува подморница со конзола за видео игри од 30 долари, пишуваат светските медиуми.
Во интервјуто тој вели дека одбил да вработи „50-годишни бели момци“ со воена експертиза во компанијата, бидејќи тие не се инспиративни.
Медиумите сега откриваат дека компанијата одбила да го подложи „Титан“ на независно тестирање и отпуштила директор кој барал поригорозни безбедносни тестови.
Во интервју за „Теледин Марин“, Раш ја отфрла стручноста на поранешните воени лица стручни за подморници.
„Во повеќето компании ќе видите вработени господа кои се поранешни воени лица стручни за подморници, ќе видите цел куп белци од 50 години. Сакав нашиот тим да биде помлад, да биде инспиративен и нема да инспирирам 16-годишник да се занимава со морска технологија, туку 25-годишник. Така, навистина се обидовме да вклучиме многу интелигентни, мотивирани, помлади поединци затоа што правиме работи што се сосема нови“, вели тој и додава:
„Ние преземаме пристапи кои најчесто се користат во воздушната индустрија, можеме да ги обучуваме луѓето да управуваат со подморница, користиме конзола за игри, така што секој може да управува со подморница“.
Во интервју дадено на крајот на минатата година, Раш постојано вели дека истражувачите на „Титан“ ќе бидат безбедни и ќе го имаат кислородот неопходен за опстанок.
„Мислам дека не е многу опасно. Ако ги погледнете подводните активности во последните три децении, немало поголема повреда, а камоли фатална“, изјави Раш за „CBS News“.
„Она што ме загрижува не е кога си под вода. Она што ме загрижува е кога влегуваме, кога пливаме надвор, кога сте на бродот во ледена состојба со големи врати што можат да ви ги скршат рацете и луѓе кои можеби немаат најдобра рамнотежа, паѓаат и удираат со главите. Тоа, за мене, е опасниот дел“, додава тој.
Во меѓувреме, „Дејли Мејл“ откри дека „Океангејт“ одбил да изврши независна проверка на „Титан“, па дури и отпуштил директор кој изразил загриженост за неговата безбедност.
Во блог со наслов „Зошто е Титан некласифициран?“, „Океангејт“ сугерира дека класификацијата ќе трае премногу долго.
Исто така, компанијата сугерира дека нејзините сопствени безбедносни протоколи се доволни.
Шефовите на компанијата, исто така, го отпуштија Дејвид Локриџ, чија улога вклучуваше надгледување на безбедноста на проектот „Титан“, откако тој го повика „Океангејт“ да побара класификација, според „Дејли мејл“.
„Дејли мејл“ пишува дека и лидерите во индустријата за подморници, испратиле писмо во кое го повикуваат Раш да биде внимателен.
Во писмото, до кое дојде “„Њујорк тајмс“, се предупредува дека сегашниот експериментален пристап на компанијата може да доведе до проблеми, од мали до катастрофални последици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Рубио: Европа и Украина ќе бидат вклучени во вистински мировни преговори

Американскиот државен секретар Марко Рубио во интервју за Си-би-ес изјави дека Украина и Европа ќе бидат вклучени во какви било вистински преговори со цел да се стави крај на војната меѓу Русија и Украина.
Рубио ја минимизираше европската загриженост дека тие би можеле да бидат исклучени од претстојните мировни преговори меѓу Русија и САД, кои ќе се одржат во Саудиска Арабија во наредните денови. Тој нагласи дека преговарачкиот процес се уште не е започнат сериозно, но доколку разговорите продолжат, ќе бидат вклучени Украина и европските земји.
Рубио потсети дека американскиот претседател Доналд Трамп разговарал со рускиот претседател Владимир Путин минатата недела. За време на тој разговор, Путин изрази интерес за мир, додека Трамп јасно стави до знаење дека сака траен договор што го обезбедува суверенитетот на Украина.
„На крајот на краиштата, ако ова се вистински преговори – а ние сè уште не сме во тој момент – Украина ќе мора да биде вклучена бидејќи таа е нападната, а Европејците ќе мора да учествуваат бидејќи тие се оние кои воведоа санкции кон Путин и Русија“, рече Рубио.
„Еден телефонски повик не носи мир“, додаде тој, истакнувајќи дека следните неколку недели ќе бидат клучни за проценка на сериозноста на овие разговори.
На прашањето дали разговарал за укинување на санкциите кон Русија за време на телефонскиот разговор со рускиот министер за надворешни работи Сергеј Лавров во саботата, Рубио одби да даде јасен одговор. Но, рече дека разговарале за тешките услови под кои работи американската амбасада во Москва.
Тој додаде дека функционалните амбасади во двете земји се клучни за напредок во мировниот процес.
Европа
Украинска пратеничка: Не ни се чини дека Русија сака мир

По веста за прекин на струја низ Украина, украинската пратеничка Кира Рудик од проевропската партија Холос разговараше со новинарите на светскиот сервис на Би-би-си во емисијата „Њуздеј“.
„Секоја вечер сме нападнати“, рече таа.
„Не ни се чини дека Русија сака мир и навистина сме изненадени што некој во светот мисли поинаку“, рече таа, мислејќи на американскиот претседател Доналд Трамп.
„Би било многу едноставно за нив да покажат дека сакаат мир – тие само ќе треба да ги повлечат своите трупи од Украина и тоа би било тоа“, рече таа.
Европа
Прекин на струја низ Украина по руските напади

Неколку украински региони се погодени од прекини на електрична енергија по руските напади врз енергетската инфраструктура, соопшти украинскиот државен оператор за пренос на електрична енергија Укренерго.
Компанијата не соопшти повеќе детали, но најголемата украинска приватна електроенергетска компанија ДТЕК пријави прекин на електричната енергија во главниот град Киев и поширокиот регион, како и во централниот регион Дњепропетровск.
Прекини на струја има и во Херсон на југот на земјата, објави на Телеграма Роман Мрочко, шеф на градската воена управа на Херсон.
Во друг јужен град, Миколаив, околу 100.000 луѓе останаа без греење по напад на руски дрон.
Во меѓувреме, руското Министерство за одбрана тврди дека пресретнало и уништило 90 украински беспилотни летала во неделата навечер.