Светската здравствена организација (СЗО) соопшти дека пушењето цигари може да предизвика потежок облик на болеста предизвикана од ковид-19 и поголема смртност кај пациентите.

Според извештаите се нагласува дека до 18 проценти од хоспитализираните пациенти со коронавирус се пушачи.

Согласно тоа, СЗО им препорача на пушачите да се откажат од пушењето.

Албанскиот јавен сервис ќе почне да емитува вести на црногорски јазик на втората телевизиска програма (РТШ 2), соопшти денеска Матицата на Црногорците.

Вестите ќе се емитуваат двапати дневно, од понеделник до петок.

Заслугата за тоа му припаѓа на претседателот на Унијата на Црногорците во Албанија, Маринко Чулафиќ, кому Матицата на Црногорците му упати срдечни честитки и признание за макотрпната работа.

Членовите на Германската асоцијација на забавувачите (Deutscher Schaustellerbund), како и сите оние што се незадоволни од ограничувањата наметнати поради пандемијата на коронавирусот, одржуваат митинг во Берлин спротивставувајќи се на забраната за големи настани во земјата, пренесува „Спутник“.

Тековните ограничувања ги оставија без работа саемите, панаѓурите и организаторите на настани бидејќи не може да привлечат туристи на настаните.

Германската влада претходно олесни некои ограничувања, но остана забраната за големи настани до крајот на октомври, што значеше откажување на легендарниот фестивал на пивото „Октоберфест“, како и други манифестации.

Во моментот центарот на германската престолнина е блокиран бидејќи демонстрантите собраа речиси 300 возила на митингот.