Ентони Блинкен стапи на функцијата државен секретар на САД. Тој вети дека ќе ги подобри односите со глобалните партнери и ќе му покаже на светот дека Соединетите Американски Држави може да играат водечка улога, истовремено решавајќи го проблемот со климатските промени, распадот на демократијата и други сложени прашања.

Мал број вработени, ограничен поради мерките против коронавирусот, го поздравија Блинкен со аплауз.

„Светот во моментот внимателно нè следи сакајќи да знае дали можеме да ја лекуваме нашата нација, дали можеме да водиме со пример и дали ќе можеме да се соочиме со големите предизвици на нашето време преку дипломатски односи со нашите сојузници и партнери“, рече Блинкин.

Меѓу тие предизвици тој ги вклучи пандемијата на коронавирусот, климатските промени, глобалната економија, заканите за демократијата, борбата за расна еднаквост и правда и опасноста за безбедноста и глобалната стабилност што доаѓаат од противниците. Новиот државен секретар не одговори на прашањето на новинарите кој предизвик го смета за најприоритетен.

Блинкен рече дека Стејт департментот мора да работи на воспоставување обединет фронт со сојузниците за надминување на предизвиците.

Тој е дипломат со долгогодишно искуство, служеше како заменик-државен секретар за време на владеењето на Барак Обама.

Предлогот на Бајден за државен секретар да биде назначен Блинкен беше потврден вчера од Сенатот со 78 гласа „за“ и 22 „против“.

Унгарскиот министер за надворешни работи, Петер Сијарто, рече дека главната причина што Унгарија набавува вакцини од алтернативни производители е тоа што Европската Унија е премногу бавна во процесот на дистрибуција.

Иако Унгарија, како членка на ЕУ, е дел од официјалниот механизам за набавка на вакцини, властите на оваа земја одлучија да набават 2 милиона дози од руската вакцина „спутник В“, што предизвика спротивставени коментари во рамките на ЕУ.

„Очекувањата од ЕУ беа навистина големи, но сега гледаме дека дистрибуцијата на вакцини е многу побавна и се доставуваат помалку вакцини во земјите отколку што беше ветено на почетокот. Сепак, некои европски институции и бирократи продолжуваат да ги напаѓаат земјите што бараат алтернативни начини за да набават вакцина. Ова е најважното прашање во моментот и ние сакаме да ги спасиме животите на нашите граѓани“, рече Сијарто.

Швајцарија од 8 февруари ќе бара негативни тестови на коронавирус од луѓе што влегуваат во земјата од високоризични подрачја, соопшти швајцарската влада.

Швајцарската влада исто така предложи двојно зголемување на фондот, финансиран од федералните и кантоналните влади за поддршка на компаниите што беа тешко погодени од ограничувањата за борба против пандемијата на коронавирусoт на пет милијарди швајцарски франци, објави „Ројтерс“.

Во соопштението по состанокот на владата, исто така се наведува дека владата е подготвена да ја активира повторно шемата за обезбедување државни гаранции за банкарски заеми на погодените компании доколку се влоши кредитниот пазар.

Швајцарската влада ги продолжи надоместоците за невработеност за три месеци, што ќе ги чини околу 500 милиони франци и наведе дека федералната влада дополнително ќе финансира околу шест милијарди франци дополнителни трошоци за да ги покрие поволностите за работниците што работат со скратено работно време.

„Јасно е дека луѓето без работа во оваа ситуација тешко наоѓаат нова“, рече швајцарскиот претседател Гај Пармелин.

„Не е сè совршено, но ние работиме на тоа“, посочи тој.

Швајцарија ги засили мерките во борбата против новите видови коронавирус овој месец. Здравствените власти пријавија повеќе од 515.000 случаи на инфекција и околу 8.500 смртни случаи во Швајцарија и соседен Лихтенштајн од избувнувањето на пандемијата во февруари 2020 година.