Свет
Сијарто: Унгарија нема да го поддржи 14 пакет санкции против Русија во сегашната форма
Унгарија нема да го поддржи 14-тиот пакет санкции на Европската унија против Русија во неговата сегашна форма, бидејќи тоа е спротивно на интересите на Будимпешта во областа на енергетиката, изјави денеска унгарскиот министер за надворешни работи и трговија Петер Сијарто.
„Овој 14-ти пакет санкции е една од најважните теми на денешната дебата“, рече Сијарто, кој учествуваше на состанокот со колегите од ЕУ во Брисел.
Според него, предлог-пакетот како што е во моментов напишан е целосно спротивен на унгарските економски интереси и најверојатно ќе ја загрози енергетската безбедност на Унгарија, пренесува ТАСС.
„Затоа унгарската влада нема да го прифати овој пакет санкции во сегашната форма“, рече Сијарто на средбата со новинарите во Брисел.
Сијарто истакна дека 14-тиот пакет санкции, доколку биде усвоен, ќе го ограничи извозот на унгарски земјоделски производи во Русија и ќе го отежне плаќањето на руските енергетски производи, што на долг рок би значело крај на нивното снабдување. Според него, новиот пакет рестрикции значително ќе ги забави и инвестициите во нуклеарната централа Пакс 2.
Потпретседателот на Европската комисија, Валдис Домбровскис, на почетокот на април објави дека Европската унија започнала со подготовка на 14-тиот пакет санкции против Русија, кој најверојатно ќе вклучува широк список на рестриктивни мерки, заедно со строга борба против избегнување санкции во поморскиот сектор. Во пресрет на втората годишнина од рускиот напад на Украина, на 23 февруари, Европската унија го усвои 13-тиот пакет санкции против Русија, со што на листата на санкционирани се додадени уште 106 физички лица и 88 компании.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Еден загинат и 11 повредени во руски напад со дронови врз Киев, меѓу нив и дете
Најмалку едно лице загина синоќа, а 11 се повредени во руски напад со дронови врз Киев, соопштија градските власти.
Градоначалникот Виталиј Кличко изјави дека меѓу повредените е тринаесетгодишно момче.
Воената администрација на Киев ги предупреди жителите и на заканата од напад со балистички ракети и ги повика да останат во затворен простор.
Шефот на воената администрација на Кијева, Тимур Ткаченко изјави дека еден човек загинал во нападот, како и дека бројот на повредени не е конечен.
Свет
Трамп ги поништил сите уредби и документи потпишани од Бајден
Американскиот претседател Доналд Трамп соопшти дека ги поништил сите уредби и документи потпишани од неговиот претходник на функцијата, демократот Џозеф Бајден, бидејќи користел уред за автоматско потпишување.
Кои се правните последици од одлуката на Трамп засега не е јасно.
„Секој документ кој го потпишал Поспаниот Џо користејќи автоматско пенкало, што е околу 92 проценти од нив, со ова се поништува и повеќе нема никаква правна сила или ефект“, напиша републиканскиот претседател на својата платформа Трут Соушл.
Свет
Преговорите со САД за мировниот план за прекин на конфликтот со Русија ќе почнат наскоро, вели Зеленски
Украинскиот претседател Володимир Зеленски изјави дека на преговорите со Соединетите Американски Држави за мировниот план за прекин на конфликтот со Русија, кои, како што наведе, наскоро ќе започнат, земјата ќе ја претставуваат началникот на Генералштабот на вооружените сили на Украина, Андреј Гнатов и секретарот на Советот за национална безбедност и одбрана Рустем Умеров.
Во синоќешното видео обраќање, Зеленски рече дека претставници на Министерството за надворешни работи и украинската разузнавачка служба ќе бидат меѓу членовите на украинската делегација, пренесува „Униан“.
Тој додаде дека во моментов се во тек подготовки за состанок со американската страна.
„Преговорите наскоро ќе започнат, а наши претставници ќе бидат таму – началникот на Генералштабот, претставници на Министерството за надворешни работи, секретарот на Советот за национална безбедност и одбрана и нашата разузнавачка служба. Состаноци со американската страна ќе се одржат во блиска иднина“, нагласи Зеленски.
Украинската делегација досега ја предводеше Андриј Јермак, кој вчера поднесе оставка од функцијата шеф на претседателскиот кабинет.

