Свет
Столтенберг верува дека САД ќе останат силно ангажирани во НАТО, реагира и ЕУ

Генералниот секретар на НАТО, Јенс Столтенберг, е убеден дека новата американска администрација ќе остане ангажирана во Северноатлантската алијанса, изјави портпаролката на сојузот, Оана Лунгеску.
„Генералниот секретар има апсолутна доверба дека САД под претседавањето на Доналд Трамп ќе останат силно ангажирани во НАТО“, изјави Лунгеску додавајќи дека силен НАТО е добар за САД и добар за Европа.
Новоизбраниот американски претседател Доналд Трамп во заедничкото интервју за германски Bild и британскиот весник The Times изјави дека „НАТО е застарен бидејќи е осмислен пред многу години и бидејќи не се занимавал со тероризмот“.
Исто така, рече дека земјите членки на НАТО, не трошат доволно на одбраната. Од 28-те членки, само пет од нив – САД, Естонија, Грција, Полска и Велика Британија, издвојуваат за одбраната најмалку 2 отсто, што е цел која им е препорачана на сите членки.
Германскиот министер за надворешни работи, Франк-Валтер Штајнамер, кој во понеделникот утрото во текот на работниот појадок разговараше со генералниот секретар на НАТО, Јенс Столтенберг, изјави да изјавите на Трамп во врска со Алијансата се примени со загриженост.
И во Европската унија изјавите на Трамп предизвикаа загриженост. Новиот американски претседател, меѓу другото, изјави дека Велика Британија имала причини да ја напушти ЕУ, како и дека можеби ќе ја следат и други членки на ЕУ и оти со неа доминира Германија.
Францускиот министер за надворешни работи Жан-Марк Ејрол, изјави по доаѓањето на состанокот на министрите за надворешни работи на земјите членки на ЕУ, дека „единството на Европа е најдобриот одговор на изјавите на Трамп.
„Најдобриот одговор на интервјуто на избраниот американски претседател е единството на Европејците“, рече Ејрол.
Портпаролот на Европската комисија, Маргатитис Шинас, на прашањето да го коментира интервјуто на Трамп, одговори дека „го прочитавме со интерес./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Најмалку десет деца загинаа при превртување на чамец на езеро во Пакистан

Најмалку десет деца загинаа кога се преврте чамец на езерото Танда Дам во Пакистан, пренесува „Скај њуз“. Уште девет се сметаат за исчезнати.
Шестмина се спасени, а тројца се во критична состојба.
Локалната полиција соопшти дека на чамецот имало 25 ученици од верско училиште и дека биле на пикник.
Децата биле на возраст од 11 до 13 години.
Истиот чамец претходно превезувал група од 16 ученици преку езерото.
„Според првите пријави, чамецот се превртел поради преоптоварување“, соопштија од полицијата.
Неколку часа пред оваа несреќа, автобус падна од мост во Пакистан, при што загинаа најмалку 40 луѓе.
Свет
Шефот на американската дипломатија на турнеја по Блискиот Исток, прва станица му е Египет

Американскиот државен секретар, Антони Блинкен, пристигна во Каиро, прва дестинација од турнејата на Блискиот Исток каде повторно се разгоре израелско-палестинскиот конфликт, со минимални шанси да се искористи американското влијание за да се намалат тензиите.
Пред да замине за Ерусалим и Рамала, каде што ќе престојува утре и вторник, Блинкен се среќава со египетскиот претседател Фатах ал-Сиси и министерот за надворешни работи Самех Чукри.
Во Египет, главен регионален сојузник на САД, Блинкен првенствено ќе разговара за Либија и Судан, но веројатно во тие дискусии ќе доминира конфликтот меѓу Израел и Палестинците. Каиро, имено, традиционално ја игра улогата на посредник меѓу двете страни.
Безбедносната ситуација во Израел и на палестинските територии драстично се влоши, со палестинските убиства на цивили пред синагога и интервенција на израелската армија во Џенин, на Западниот Брег.
Во четвртокот девет Палестинци беа убиени, а 20 ранети во судирите со израелските војници во Џенин на Западниот Брег. Израел објави дека операцијата во Џенин била спроведена со цел апсење на членови на милитантната група Исламски џихад.
Потоа, во палестинските напади вчера и петок беа убиени седум лица, а 12 беа ранети. Вчера две лица беа ранети во напад во источен Ерусалим, кој израелската полиција го опиша како терористички напад, додека ден претходно во напад на синагога во истиот град загинаа седум, а ранети беа десет Израелци. Нападот на синагогата беше извршен на Меѓународниот ден на сеќавање на холокаустот.
Во светлината на повторното разгорување на насилството, треба да се очекува Блинкен да разговара со израелскиот премиер Бенјамин Нетанјаху и палестинскиот претседател Махмуд Абас за потребата од примена на итни мерки за смирување на ситуацијата.
САД претходно најостро го осудија нападот во Источен Ерусалим како грозоморен чин и рекоа дека посветеноста на САД за безбедноста на Израел останува цврста. Но, се чини дека просторот за маневрирање на американскиот државен секретар е ограничен на повици за смиреност и аналитичарите не очекуваат премногу од посетата на Блинкен. Сметаат дека Вашингтон ќе застане на повеќекратните повици за решение кое предвидува две посебни држави.
Гаит Ал-Омари, експерт од Вашингтонскиот институт, смета дека посетата не сигнализира никаква промена на американската позиција кон израелско-палестинскиот конфликт, но убеден е дека разговорот со Махмуд Абас нема да биде пријатен.
Аналитичарите оценуваат и дека со оваа посета на Блинкен, Вашингтон дава до знаење дека сака итно да се поврзе со Нетанјаху, со кого администрацијата на демократскиот претседател Џо Бајден од почетокот има затегнати односи.
Пред посетата на Блинкен на Израел, советникот за национална безбедност на Белата куќа Џејк Саливан го увери израелскиот премиер за американската поддршка за Израел.
За време на денешната посета на Египет, кој ужива дарежлива американска воена помош, Блинкен ќе се сретне и со претставници на граѓанското општество кои потсетуваат дека дури 60.000 политички затвореници тлеат во египетските затвори.
Регион
Во Сплит казната за одење во костим за капење на улица и пиење алкохол на јавно место е 150 евра

На првиот ден од годинава во Сплит стапи на сила новата одлука за комунален ред во која се пропишани повисоки казни за прекршителите, па може да се очекува летово да нема туристи во костими за капење на улиците, бидејќи доколку бидат фатени по комунален ред ќе им следува казна од 150 евра, известуваат хрватските медиуми.
Истата казна од 150 евра е пропишана и за оние кои пијат алкохол на јавни места, а казната за шетање куче без поводник е согласно одлуката за условите и начинот на чување миленици и изнесува 66,36 евра за физичко лице.
Жителите на Сплит и нивните гости по улиците ќе ги надгледуваат 21 комунален редар, а уште 12 ќе чекаат на повик во зградата на градската управа.
Од август 2020 година, градот Дубровник има слична одлука за комунален ред, а минатата година првите разголени туристи платија општински казни од 1.000 куни.
Новата сплитска одлука за комунален ред е донесена на последната седница на Градскиот совет во 2022 година, а стапи на сила од новата година.