Европа треба поактивно да работи на своето енергетско, транспортно и дигитално поврзување, а Бугарија треба уште подобро да ја искористи својата географска положба како земја која ги поврзува Азија и Африка со Европа, изјави претседателот на Бугарија, Румен Радев, во Прага, каде учествуваше на лидерската средба на Европската политичка заедница.

Од решавањето на енергетската криза зависи опстанокот на европските економии, рече Радев, според кого е важно што на денешната средба се вклучени земји како Азербејџан и Норвешка, кои ја снабдуваат ЕУ со енергетски ресурси, пренесе БНР.бг.

Во Прага, претседателите на Бугарија и Турција. Румен Радев и Реџеп Ердоган разговараа во рамките на состанокот на Европската политичка заедница.

„Турција е наш многу важен партнер – сосед, сојузник. Особено во време на ваква тешка енергетска криза, важно е Бугарија да ги развива нашите односи во енергетската сфера, бидејќи засега единствениот безбеден гас што го одредува јасно долгорочен договор е гасот од Азербејџан, кој минува преку Турција, преку нивниот систем за пренос на гас.

Исто така важна е улогата на Турција во обезбедувањето на местата за танкери на нивните терминали за течен гас, изјави Радев.

Бројот на жртвите во нападот на поранешен полицаец врз детска градинка во североисточниот дел на Тајланд се искачи на 38 лица, а меѓу загинатите има најмалку 22 деца, соопшти портпаролот на тајландската полиција.

Напаѓачот извршил самоубиство по злосторството, во кое ги убил и сопругата и детето, наведува „Ројтерс“.

Децата биле убиени во сон, пренесува „Скај њуз“. Напаѓачот провалил во собата во која спиеле децата. Најмалата жртва имала само 2 години. Меѓу убиените е и наставничка која била во осмиот месец од бременоста.

Полицијата го идентификуваше напаѓачот како поранешен припадник на полициските сили, кој бил отпуштен од должност минатата година и бил предмет на тужба поврзана со наркотици.

„Тој беше на судење претходно во текот на денот, а потоа отиде во градинка да го земе своето дете“, изјави портпаролот на полицијата за локалните медиуми.

До пукањето дошло во градинка во Нонг Буа Лампу, во североисточниот дел на Тајланд, каде што ретко се случуваат масовни убиства.

Претседателот на Словенија, Борут Пахор, на денешниот состанок на групата Араиолос на Малта, изјави дека НАТО мора да ја остави вратата отворена за Украина, откако Киев деновиве побара членство во сојузот.

Зборувајќи на маргините на состанокот во Валета, тој истакна дека потребно е да се зачува единството на НАТО-алијансата. Околу барањето на Украина за полноправно членство во НАТО, тој смета дека земјата „има целосно право да ја избира сопствената надворешна и безбедносна политика“ и оти сојузот мора да ја остави вратата отворена за неа.

Пахор додаде дека за тоа мора да одлучат сите 30 членки на НАТО.

Како што подвлече Пахор, Европа не смее да ја повтори грешката од 2014 година, кога недоволно одлучно одговорила на руската окупација на Крим. Тој ги повика лидерите на флексибилност кога е во прашање ширењето на ЕУ на регионот на Западен Балкан.