Мозаиците во истанбулската „Аја Софија“ ќе бидат покриени со завеси или ласери за време на муслиманската молитва, објави портпаролот на турската владејачка Партија на правдата и развојот  (АКП), откако претседателот Таип Ердоган го претвори музејот во џамија.

Христијанските икони ќе бидат откриени и отворени за сите посетители во текот на останатото време, а влезот ќе биде бесплатен, рече Омар Челик. Сè уште не е јасно како ласерите ќе ги покриваат мозаиците.

Претседателот Таип Ердоган ја прогласи истанбулската „Аја Софија“ отворена за муслиманска богослужба, откако судот донесе одлука дека претворањето на некогашната византиска црква во музеј во 1934 година било нелегално.

Одлуката предизвика критики и загриженост низ целиот свет, вклучително и Грција, САД и Русија, како и УНЕСКО и папата Франциско, кои рекоа дека се погодени од одлуката.

Челик на прес-конференција изјави дека Светиот Престол покажал најголемо непочитување кон „Аја Софија“ во историјата.

Тој рече дека православните христијани страдале со години како резултат на „латинската инвазија“ предводена од Ватикан во 13 век кога крстоносците ја ограбиле базиликата.

Американскиот Стејт департмент соопшти дека е разочаран од одлуката на турската влада да го смени статусот на „Аја Софија“, а грчкиот премиер Киријакос Мицотакис остро ја осуди одлуката на Турција да ја претвори „Аја Софија“ од музеј во џамија.

Грција рече дека одлуката ќе има последици врз односите меѓу двете земји и врските на Турција со Европската Унија.

Лидерот на екстремно десничарската италијанска партија Лига, Матео Салвини, го предводеше протестот пред турскиот конзулат во Милано.

„Ќе запрам секаква финансиска помош за турскиот режим и ќе ја завршам еднаш засекогаш секоја претпоставка за влез на Турција во Европската Унија затоа што дадовме повеќе од десет милијарди евра за режимот што ги претвора црквите во џамии и мислам дека ја преминаа границата“, рече тој.

Во долината на реката Јангце се забележани врнежи од дожд какви што не се паметат во последните 50 години, а во поплавите досега загинаа најмалку 141 лице.

Поплавите носат сè пред себе, дури и големи куќи.

Во провинцијата Џангси, на југот на земјата, надојдената река за миг проголта двокатна куќа.

Прво, приземјето беше поплавено, а потоа целата куќа се преврте и се распадна во водата. Сето тоа траеше околу 5 секунди.

Најмалку 140 луѓе загинаа и исчезнаа во поплавите во централните и источните области на Кина, а сега е загрозен и Вухан, градот каде што почна пандемијата на коронавирусот.

Најголемите поплави во Кина се случија во 1998 година, кога повеќе од 4.000 луѓе загинаа.

Во последните 24 часа, потврдени се 412 нови случаи на коронавирус во Германија.

Вкупниот број заразени лица во таа земја се зголеми на 199.375, објави Институтот за инфективни болести „Роберт Кох“.

Четири лица починале, со што вкупниот број на смртни случаи достигна 9.068, објави „Ројтерс“.