Свет
Турција е во криза, а Ердоган гради раскошни палати

Додека турското население се обидува да се справи со економската криза, претседателот Ердоган гради раскошни палати од парите на даночните обврзници. Овие згради не се подигнати во чест на Турската Република, туку на османлиското минато.
Турција се наоѓа во тешка финансиска и економска криза речиси две години. Девизниот курс на турската лира е во слободен пад. Невработеноста, особено кај младите, е голема со месеци. Заедно со сето ова доаѓаат и ограничувањата во пандемиската криза. Тоа силно ја погоди туристичката индустрија, која е една од најважните гранки на економијата.
Претседателот на Турција нема предлози за надминување на кризата, но познати се неговите декадентни градежни проекти, пишува „Дојче веле“.
И покрај критиките од опозицијата, Реџеп Таип Ердоган продолжува со градежните проекти вредни милиони евра. Тој изгради кралска палата на брегот на езерото Ван, што потсетува на палатата на селџучкиот султан Кејкубат од 13 век.
Bitlis ahlatta’ki saray inşaatı tam gaz devam? pic.twitter.com/dKzKEEa5ec
— Veysi Uyanık (@veysiiuyanik) April 4, 2020
Палатата на Ердоган ќе има површина од 1.071 квадратен метар. Турските медиуми јавуваат дека изградбата досега чинела 14 милиони евра, иако турската влада првично планирала трошоци од 3,5 милиони евра. Според овие тврдења, градежниот претприемач е школски другар на Ердоган.
La construction du palace présidentiel (1071 m2) qu’#Erdogan se fait maintenant construire à #Ahlat, sur les bords du lac de Van, a commencé !
Encore un site magnifique saccagé. Cette fois dans une région préservée du tourisme de masse #Turquie
(vidéo) https://t.co/CwZpXrgbyd— Yol (@Yollar9) April 15, 2019
„Поради алчноста на еден човек, брегот на езерото Ван беше жртвуван за профит. Додека милиони наши граѓани треба да се справат со економската криза, еден единствен човек ќе може да си дозволи замок по замок“, рече пратеникот на Републиканската народна партија, Гулизар Бисер Карача, во турскиот парламент.
Покрај оваа резиденција, Ердоган гради и летна резиденција во близина на Мармарис на средоземниот брег. Според извештаите на турските медиуми, тој проект е исто така екстремно скап и не ги зема предвид еколошките стандарди. Палатата со 300 соби досега чинеше 37 милиони евра. Исечени се 50.000 дрвја.
Друга раскошна палата е изградена во 2014 година. Таа е официјална резиденција на Ердоган во Анкара. Чинела половина милијарда евра и е поставена среде природно подрачје, кое е под заштита на законот. Дури и тогаш опозицијата жестоко ја критикува градбата, но сè беше залудно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Црна Гора планира да произведува дронови; САД: Покажуваат дека се сериозни

Црна Гора планира да започне со производство на беспилотни летала во соработка со американска компанија, а првата серија ќе биде донирана на Украина, објавија денес црногорските медиуми, повикувајќи се на „писмо за намери“ усвоено од владата во Подгорица кон крајот на мај.
Во тој документ, како што објави Радио Слободна Европа, црногорската влада наведува дека оваа иницијатива ќе ги подобри капацитетите на војската во однос на НАТО, ќе ги поддржи одбранбените потреби на Украина, како и позицијата на Црна Гора како сигурен снабдувач на најсовремена одбранбена опрема на глобалниот пазар.
Се нагласува дека договорот вреден 15 милиони долари ќе биде поддржан и од американската администрација предводена од претседателот Доналд Трамп. Писмото за намери усвоено од црногорската влада на 29 мај наскоро ќе го потпишат црногорскиот министер за економски развој Ник Ѓељошај и Роберт Џ. Донахју, директор на компанијата „Бај Лајт Профессионал ИТ Сервисиз ДОО“. Тоа ќе биде претходница на договорот што треба да се потпише во септември.
Договорот предвидува користење на компании од Црна Гора и регионот за тестирање на воздушни и подводни технологии на беспилотни системи. Исто така, се наведува дека владата на Црна Гора се согласува да ја донира првата серија беспилотни системи од рано производство и сродна одбранбена опрема на Украина.
Амбасадата на САД објави дека договорот, доколку биде одобрен, ќе промовира заедничка безбедност, стабилност и напредок и дека владата на САД ги охрабрува сите земји-партнери да инвестираат и да соработуваат со американските компании.
„Инвестирањето во одбранбени капацитети, како што се американските беспилотни воздушни системи, ја покажува сериозноста на Црна Гора во исполнувањето на своите обврски кон Алијансата во време кога бараме од Европа да преземе поголем товар за нејзината безбедност“, порачаа тие.
Европа
Естонија се повлекува од Конвенцијата за забрана на противпешадиски мини, стравува од Русија

Парламентот на Естонија денес гласаше за повлекување од Конвенцијата од Отава со која се забранува употребата на противпешадиски мини, поради загриженост за потенцијална воена закана од соседна Русија.
Осумдесет и еден од 101 пратеници го поддржаа предлогот, соопшти прес-службата.
Сите пет земји од Европската Унија и НАТО што граничат со Русија – Литванија, Латвија, Естонија, Полска и Финска – објавија планови за повлекување од меѓународниот договор поради воената закана што ја претставува нивниот многу поголем сосед.
Русија не е членка на Конвенцијата од Отава и користеше мини при инвазијата на Украина. Гласањето на Естонија следеше по гласањето на Латвија и Литванија, чии парламенти веќе го одобрија повлекувањето. Земјите ќе можат да складираат и распоредуваат мини шест месеци откако ќе ги известат другите членки на договорот и Обединетите нации за нивната одлука. Ниту една од петте земји сè уште не го сторила тоа.
Регион
Европската комисија не се откажува од рудникот за литиум во Србија, тој се појави на новата листа

Европската комисија денес објави список од 13 стратешки проекти во областа на критичните суровини во трети земји, вклучувајќи го и проектот Јадар во западна Србија, кој предизвика силни протести и спротивставување во таа земја.
Списокот на стратешки проекти во областа на критичните суровини во трети земји вклучува проекти во Канада, Гренланд, Казахстан, Норвешка, Србија, Украина, Замбија, Нова Каледонија, Мадагаскар, Малави, Јужна Африка и Обединетото Кралство.
Според проценката на Комисијата, избраните проекти, од кои повеќето се однесуваат на суровини неопходни за производство на електрични возила и батерии, како што се литиум, никел, кобалт, манган и графит, бараат вкупно 5,5 милијарди евра капитални инвестиции за да започнат со работа.
На листата е вклучен и проектот Јадар во долината на реката Јадар во западна Србија, кој предизвика широко распространето негодување и отпор поради страв од загрозување на здравјето на луѓето и животната средина.
На почетокот на 2022 година, српската влада го поништи усвоениот просторен план за рудникот во долината на реката Јадар и го запре проектот. Сепак, во јули минатата година, повторно донесе одлука со која му дозволи на британско-австралискиот рударски гигант „Рио Тинто“ да го рестартира својот проект за рударство на литиум.
Избраните стратешки проекти ќе добијат поддршка од Комисијата, земјите-членки и финансиските институции во форма на полесен пристап до финансирање. Комисијата, исто така, ќе ја зајакне соработката со трети земји за да се обезбеди развој на овие проекти, особено преку стратешки партнерства што веќе се воспоставени со некои од земјите.