Овој февруари, Институтот FAME’S ја претставува својата февруарска концертна серија во Камерната сала на Македонската филхармонија, со две концертни вечери кои ја отсликуваат разновидноста и професионалниот фокус на своите оркестарски едукативни програми. На сцената ќе настапат 30 внимателно селектирани млади европски музичари, како кулминација на интензивна повеќедневна работа со меѓународни ментори.

Преку концертите „Од студио до сцена“ и „Барајќи го грувот“, серијата го истражува односот помеѓу оркестарското снимање и изведбата во живо, како и дијалогот помеѓу класичната музика и џез традицијата — два различни, но подеднакво важни аспекти на современото музичко професионално образование.

„Институтот FAME’S е создаден за да ги поддржи младите музичари токму во моментот кога преминуваат од образовниот во професионалниот свет“, вели Од Насју Мапа, основачка на институтот. „Нашите програми ги ставаат во реални работни услови, комбинирајќи интензивни проби, снимање во професионално студио и јавни концертни настапи.“

Институтот FAME’S е европска оркестарска едукативна платформа која нуди интензивни програми што ја интегрираат оркестарската обука со практично искуство во снимање и сценска изведба. Развиен во соработка со FAME’S Project и поддржан од Европската Унија преку програмата Creative Europe, како и од Министерството за култура, институтот обединува млади музичари и меѓународни ментори околу широк репертоар — од класични и современи дела, до џез и хибридни музички форми.

Февруарската концертна серија директно го одразува овој пристап. Првиот концерт, под уметничко водство на Даниел Роланд, реномиран холандски виолинист и професор на Кралскиот колеџ за музика во Лондон, се фокусира на процесот на трансформација на музичкото дело од студиско снимање до концертна интерпретација. Програмата опфаќа дела кои носат силна емоционална длабочина и оркестарска комплексност, преку музика на Рихард Штраус, Петерис Васкс и Филип Глас.

„Разбирањето како музиката се менува помеѓу студиото и концертната сала е суштинско за денешните оркестарски музичари“, истакнува Роланд. „Тој процес развива слушање, флексибилност и уметничка зрелост.“

Вториот концерт ја насочува серијата кон ритамот и меѓу-жанровската соработка. Проектот е предводен од диригентот Тим Редмонд и џез тапанарот Даглас Маринер, кои заедно истражуваат како класичниот оркестар може да комуницира со џез-јазикот преку ритам, грув и импровизациски елементи.

„Кога музичари од различни традиции работат заедно, ритамот станува заеднички јазик“, објаснува Редмонд. „Се работи за слушање, реакција и доверба меѓу музичарите.“

Маринер додава дека ваквите проекти создаваат простор за вистински дијалог меѓу жанровите, без бришење на нивниот уметнички идентитет.

Преку двата концерта во Камерната сала на Македонската филхармонија, февруарската концертна серија на Институтот FAME’S нуди редок увид во современиот модел на оркестарска едукација во Европа — каде што образованието, практиката и јавната изведба се неразделно поврзани. За публиката, тоа е можност да се доживее музиката не само како финален производ, туку како жив процес на создавање и уметнички развој.

Картите за концертите се достапни преку продажната мрежа на MK Tickets.

Горан Ѓорѓиев именуван за регионален директор на Европскиот Центар за поддршка на светското извидништво.

„Сојуз на извидници на Македонија со големо задоволство информира дека Горан Ѓорѓиев од Македонија е именуван за регионален директор на Европскиот центар за поддршка при Светската извидничка организација. Неговото назначување е по одлука на Генералниот секретар на Светската извидничка организација, донесена по конкурентен меѓународен процес на селекција со интерес од цела Европа и пошироко“, се наведува во соопштението.

Ѓорѓиев има повеќе од 15 години искуство во стратешко лидерство, организациски развој и младинска работа во извидништвот, на национално, регионално и глобално ниво.

Од 2019 година, тој работи во Светското извидничко биро, каде што извршуваше повеќе високи раководни функции, последно како Директор за стратешка координација и организациски развој за Европа, обезбедувајќи поддршка за 47 национални извиднички организации воЕвропскиот регион.

Горан своите основи во извидништвото ги добива во својот одред Извиднички Одред Гоце Делчев од Свети Николе. А пред неговиот ангажман на светско ниво, осум години (2010-2018) Горан Ѓорѓиев ја извршуваше улогата на Генерален секретар на Сојуз на извидници на Македонија, каде што раководеше со извршната канцеларија и ги водеше организациските и програмските приоритети на извидништвото во земјата.

Во овој период, тој активно се вклучува во организација на бројни национални и меѓународни извиднички кампови, смотри, натпревари и обуки, како и во едукација и менторство на стотици млади извидници, водачи и волонтери низ целата држава. Покрај работата со млади на терен, Ѓорѓиев даде значаен придонес и во развојот на младински политики и граѓанско учество, меѓу кои и учеството во процесите за креирање и воспоставување на Националниот младински совет на Македонија.

Тој исто така работеше на развој и имплементација на програми за младинско лидерство, градење капацитети и меѓународна соработка.

За неговото именување, Дијана Слабу, актуелна претседателка на Европскиот извиднички комитет, истакнува: „Горан носи богато искуство во стратешко лидерство и организациски развој, заедно со длабоко разбирање на извидништвото на национално, регионално и глобално ниво. Со нетрпение очекуваме да работиме со него на следното поглавје од развојот на извидништвото во Европа.“

Новата функција Горан ја преземаа денес, при што ќе соработува тесно со Европскиот извиднички комитет и светското раководство на организацијата, со цел понатамошно зајакнување на поддршката за националните извиднички организации и зголемување на влијанието на извидништвото низ Европа.

„Именувањето на Горан Ѓорѓиев на оваа позиција претставува значајно меѓународно признание, имајќи предвид дека станува збор за висока раководна функција во една од најголемите и највлијателни младински организации во светот, со над 50 милиони членови глобално. Фактот што за првпат еден македонски кадар ја презема оваа улога е силна потврда за квалитетот, искуството и капацитетите што произлегуваат од македонското извидничко и младинско движење“, велат од Сојузот на извидници на Македонија.

На 30 јануари, со почеток во 20:00 часот, во Македонската филхармонија, Националниот џез оркестар ќе ја отвори концертната сезона со концерт насловен National Jazz Orchestra with String Ensemble.

На концертот, Националниот џез оркестар ќе настапи заедно со гудачки ансамбл составен од музичари на Националната опера и балет. Во овој редок и внимателно обликуван спој, оркестарскиот звук се проширува и продлабочува, создавајќи нова звучна димензија.

Под диригентство на маестро Џијан Емин, ќе бидат изведени авторски композиции на Трајче Велков, Гордан Спасовски, Зоран Костадиновски, Џијан Емин, Гоце Стевковски, Сашко Николовски и Георги Шарески. Како солисти ќе настапат Кирил Кузманов на саксофон и флејта, како и Бојан Цветковиќ на пијано.

Како гостин на вечерта ќе настапи Георги Шарески — гитарист и композитор, чиј израз и музички сензибилитет природно се впишуваат во звучниот карактер на оваа концертна целина.

Со овој концерт, Националниот џез оркестар ја започнува новата концертна сезона, поканувајќи ја публиката на вечер во која музиката зборува сама за себе и нè носи надвор од секојдневниот ритам.

Билетите за концертот се достапни онлајн на платформата MKTickets, како и на нивните продажни места.