Најмалку пет лица, меѓу кои три деца, беа убиени кога ирачки милитантни групи истрелаа две ракети „каќуша“, кои погодија куќа во Багдад. Информацијата ја соопшти ирачката армија.

Според изјавата, три деца и две жени биле убиени, додека уште две деца биле повредени во нападот, пренесува „Ројтерс“.

Неименувани полициски извори соопштија дека целта била аеродром во Багдад. Ова е првпат по неколку месеци да бидат убиени цивили во нападот, додава АП.

Според официјалните лица, ракетата била истрелана од населбата Ал-Џихад во Багдад.

Нападот е последен во низата ракетни и минофрлачки напади на американското присуство во Ирак, вклучувајќи ја и Амбасадата на САД во Зелената зона.

Турција ги испрати своите сојузници во Сирија да го поддржат Азербејџан во конфликтот со соседна Ерменија, изјави ерменскиот амбасадор во Москва. Вардан Тогањан изјави дека Турција испратила околу 4.000 борци од северниот дел на Сирија во Азербејџан и дека тие се борат таму, што го негираше помошникот на претседателот на Азербејџан, Илхам Алиев, објави „Ројтерс“.

Ерменија исто така изјави дека турските воени експерти се борат заедно со Азербејџанците во Нагорно-Карабах, отцепена област во Азербејџан со мнозинство ерменско население, и дека Турција обезбедила беспилотни летала и воени авиони. Азербејџан ги демантираше извештаите.

Турција исто така не ги коментираше извештаите, иако високи претставници, вклучително и претседателот Реџеп Таип Ердоган, ветија поддршка за Баку.

Двајца борци од бунтовничките групи поддржани од Турција во северна Сирија, под контрола на Турција, соопштија дека се распоредени во Азербејџан во координација со Анкара.

Тие одбија да бидат именувани поради чувствителноста на проблемот.

„Не сакав да одам, но немам пари. Животот е многу тежок и сиромашен”, ја пренесуваат медиумите изјавата на борецот кој се борел во Сирија за групата Ахрар ал-Шам, која беше поддржана од Турција.

Двајцата велат дека нивните команданти од сириските бригади им рекле дека ќе заработат околу 1.500 долари месечно, што е голема плата за Сирија.

• Ерменскиот амбасадор во Русија, Вардан Тогањан, изјави дека Ереван ќе користи ракети „Искандер“ доколку Баку употреби турски ловци „Ф-16“ во нападите. Како што рече, во моментов има доволно противвоздушни системи на располагање за соборување на турски беспилотни летала, пренесува „Спутник“.
• Во исто време Тогањан ги отфрли како неточни информации дека Ереван работи на формирање хуманитарни коридори од Нагорно-Карабах, велејќи дека сè уште нема потреба од такво нешто.

„Бидејќи Азербејџан го бомбардира Степанакерт за првпат од 1992 година, беше речено дека цивилите мора да се засолнат во засолништата и подрумите. Сепак, никој не спомна ниту еден збор за евакуација на граѓаните од главниот град Нагорно-Карабах“, објасни тој.

Амбасадорот додаде дека границата меѓу Ерменија и Нагорно-Карабах функционира нормално, луѓето се движат без никакви потешкотии, а има и сообраќај со камиони.

Шефот на азербејџанската дипломатија, Џејхун Бајрамов, изјави дека вооружените сили на неговата земја имаат соодветен одговор на можната употреба на системот „Искандер“ од страна на Ерменија во судирот во Нагорно-Карабах.

Русија има одбранбен сојуз со Ерменија, а Турција ја поддржува нејзината етничка заедница во Азербејџан, пишува Ројтерс.

Властите во регионот Нагорно-Карабах во Азербејџан со мнозинство ерменско население тврдат дека 59 нивни војници биле убиени во судири со азербејџанските сили. Претходно, од Азербејџан беше објавено дека Ерменија претрпе големи загуби првиот ден – 550 мртви и ранети.

Конечниот број на жртви од обете страни сè уште не е утврден.