Свет
Шолц: Убиствата во Баварија претставуваат терористички чин

Германскиот канцелар Олаф Шолц го осуди денешното убиство на две лица во Баварија, извршено од Авганистанец чие барање за азил беше одбиено, наведувајќи дека станува збор за терористички чин.
Шолц рече дека поради честите насилства на мигрантите кои дошле да бараат заштита во Германија, мора да се преземат одредени мерки, без да прецизира кои, пренесе АП.
Тој посочи дека властите мора да разјаснат зошто осомничениот Авганистанец се уште е во Германија, иако неговото барање за азил е одбиено.
Шолц истакна дека нападот, кој се случи нешто повеќе од еден месец пред парламентарните избори во Германија, мора да има последици.
Полицијата соопшти дека осомничен за денешните убиства е 28-годишен државјанин на Авганистан кој веќе најмалку три пати извршил насилство, по што секој пат добивал психијатриско лекување.
Се претпоставува дека осомничениот пристигнал во Германија во ноември 2022 година и дека побарал азил на почетокот на 2023 година.
На 4 декември тој им кажа на властите дека доброволно ќе ја напушти Германија и дека ќе побара документи од авганистанскиот конзулат, според написите.
Една недела подоцна, германските власти официјално ја затворија процедурата за азил и му наредија да ја напушти Германија.
Две лица, меѓу кои и двегодишно момче, се убиени денеска во напад со нож во германскиот град Ашафенбург во Баварија, а уште тројца се повредени, меѓу кои и едно дете.
Нападот се случил во градскиот парк, а полицијата го уапсила напаѓачот, јавува Танјуг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Обвинителство во БиХ: Мајката и детето најверојатно се убиени со гушење, се чека обдукција

Како што соопштија од Обвинителството на кантонот Тузла, дежурниот обвинител и истражителите од секторот за криминалистичка полиција при МВР на кантонот Тузла синоќа извршиле увид на лице место во семеен стан во Калесија, каде во вечерните часови биле пронајдени две безживотни тела, 37-годишна жена и нејзиниот 13-годишен син.
Осомничениот за двојното убиство моментално е во бегство и по него се трага.
„Најверојатно жената и синот се убиени од задушување. Денеска ќе биде издадена наредба за обдукција на телата на починатите за да се утврдат точните причини за смртта. Во тек се сите потребни истражни дејствија кои по наредба на обвинителството ги спроведуваат истражителите за утврдување на сите околности поврзани со двојното убиство“, соопшти Обвинителството, пренесе „Кликс“.
Европа
(Видео) Зеленски му воведе санкции на Порошенко, причината може да е велепредавство, објави Форбс

Советот за национална безбедност и одбрана на Украина воведе санкции за Петро Порошенко, објави поранешниот претседател во соопштението.
Претседателот Володимир Зеленски рече дека официјалната уредба ќе биде објавена на 13 февруари, но не го спомна Порошенко по име, пишува Киев Индипендент.
Порошенко во својата видео изјава не прецизираше какви ограничувања ќе му бидат наметнати, но санкциите би можеле да бидат поврзани со наводно „велепредавство“, објави Форбс Украина, повикувајќи се на два извори.
„Советот за национална безбедност и одбрана штотуку донесе неуставна, политички мотивирана одлука да воведе санкции против мене, Петро Порошенко, лидерот на опозицијата и петти претседател на Украина“, рече Порошенко во соопштението.
„Денес Зеленски му зададе силен удар на внатрешното единство до кое нашиот тим строго се придржува од февруари 2022 година и кое е нашето главно оружје во борбата против агресорот“, рече тој.
„Целата одговорност за негативните последици е директно на него“, додаде Порошенко.
Зеленски во вчерашното вечерно обраќање рече дека учествувал на седница на Советот за одбрана и дека нивните одлуки ќе бидат објавени следниот ден.
„Ние ја браниме нашата земја и ја враќаме правдата. Секој што ја уништи националната безбедност на Украина и и помогна на Русија мора да одговара за своите постапки“, рече Зеленски, без да прецизира кој точно би можел да биде казнет и што значи тоа.
Свет
Поранешен извршен директор на Гугл: Терористите би можеле да користат вештачка интелигенција

Поранешниот извршен директор на Гугл, Ерик Шмит, изјави дека е загрижен дека вештачката интелигенција би можела да биде искористена од терористи или непријателски држави за да им наштетат на невини луѓе.
„Вистинските стравови што ги имам не се оние за кои повеќето луѓе зборуваат со вештачката интелигенција, јас зборувам за екстремен ризик“, изјави Шмит за Би-Би-Си.
Технолошкиот милијардер, кој беше на високи позиции во Гугл од 2001 до 2017 година, рече дека „Северна Кореја, или Иран, па дури и Русија“ би можеле да ја усвојат и злоупотребат технологијата за создавање биолошко оружје.
Со оглед на тоа дека развојот на вештачката интелигенција е воден од приватни компании, Шмит повика владите внимателно да ги следат и регулираат тие процеси.
„Навистина е важно владите да разберат што правиме и да не држат под надзор“, рече тој.