Европа
Шпанија се подготвува за температури од 42 степени

Температурите во делови од јужна Шпанија утре ќе надминат 42 степени, додека топлотниот бран ќе донесе правливо небо, зголемен ризик од шумски пожари и топли услови кои се почести во средината на летото отколку во средината на мај, објавија медиумите.
Шпанската влада почна национален план за екстремни температури, откако метеоролошката агенција предупреди дека овој мај во Шпанија ќе биде еден од најтоплите во изминатите неколку години, објави „Гардијан“.
Од метеоролошката агенција додаваат дека воздушната маса на топол и сув воздух пристигнува од Африка, а со себе носи прашина од Сахара и исклучително високи дневни температури, кои се за 10 до 15 степени над сезонскиот просек.
„Најновите податоци од метеоролошките модели го потврдуваат силниот интензитет на овој топлотен бран“, изјави портпаролот на „Аемет“, Рубен дел Кампо.
Тој додаде дека за Шпанија ова може да биде најинтензивниот топлотен бран во мај во последните 20 години.
Најтопло ќе биде в петок и в сабота, а потоа в недела ќе има голем пад на температурата.
Метеорологот соопшти дека температурите во Андалузиската Долина денеска би можеле да надминат над 40, а утре ќе бидат и до 42 степени.
„Дури и топлотниот бран да се смири некаде, во североисточната долина Ебро повторно би можеле да се измерат температури од 40 или повеќе степени. Тоа е нешто што не е забележано во овој период“, додаде Дел Кампо.
Шпанија ја забележа најтоплата температура досега во август, кога живата во термометарот во градот Монторо во Андалузија достигна 47,4 степени.
Дел Кампо ги предупреди граѓаните на екстремен ризик од шумски пожари во јужните, централните и североисточните области и рече дека очекуваат нов облак од прашина.
„Се соочуваме со екстремна епизода и ризикот од високи температури ќе биде изразен во многу области“, рече Дел Кампо.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Песков: „Русија има план доколку НАТО се прошири“

Портпаролот на Кремљ Дмитриј Песков изјави дека руското Министерство за одбрана има планови за безбедноста на земјата доколку НАТО се прошири.
Песков денеска изјави дека Русија прави напори да ја обезбеди својата безбедност, особено во контекст на можното распоредување на оружје на НАТО во Финска и Шведска.
„Таквите опции се разгледуваат, а тоа не го прави Кремљ, туку Министерството за одбрана. Веќе кажавме дека имаат соодветни планови и се прават напори за да се обезбеди нашата безбедност“, изјави Песков на прашањето дали Русија разгледува опции за одговор на евентуалното формирање на базата НАТО во Финска недалеку од руската граница, пренесува ТАСС.
Прашан за коментар за процесот на приклучување на Финска и Шведска во НАТО, Песков рече дека претседателот Владимир Путин веќе ја разјаснил својата позиција „и нема што да се додаде“.
Шефовите на дипломатиите на Финска и Шведска и амбасадорите на 30 членки на НАТО рано денеска ги потпишаа протоколите за пристапување во алијансата.
Тие ќе можат да влезат во НАТО откако сите членки ќе ги ратификуваат документите.
Европа
Шолц: Мораме да се подготвиме дека оваа ситуација нема да се промени во догледна иднина

Германскиот канцелар Олаф Шолц ги подготвува граѓаните на Германија за натамошни поскапувања.
„Актуелната криза нема да помине за неколку месеци – порача социјалдемократот (СПД) на почетокот на таканаречената „заедничка акција“ со највисоките претставници на работодавачите и синдикатите, во кабинетот на канцеларката. Војната на Русија во Украина и нарушените синџири на снабдување поради пандемијата на корона создадоа општа неизвесност. Мораме да се подготвиме за фактот дека оваа ситуација нема да се промени во догледна иднина“, рече Шолц. „Германија се соочува со „историски предизвик“, додава тој.
Целта на овој прв од серијата состаноци е да се најдат инструменти за потиснување на растот на цените. Резултатите ќе бидат познати дури наесен, пишуваат тамошните медиуми.
„Како држава, добро ќе ја поминеме оваа криза само ако се обединиме, ако заеднички, рака под рака, изнаоѓаме решенија“, нагласи Шолц.
„Пораката што ми е важна е да се држиме заедно“, рече канцеларот.
Претседателот на работодавците Рајнер Дулгер исто така гледа темни облаци на хоризонтот.
„Земјата се соочува со најтешката економска и општествено-политичка криза од обединувањето. Тоа може да се надмине само со заеднички напори. Постојаниот економски раст, како што е забележан пред пандемијата на корона и почетокот на војната во Украина, веќе не е нешто што се зема здраво за готово. Пред нас се тешки години“, рече тој.
Европа
Рускиот министер за одбрана: Воспоставуваме поморски коридори за извоз на жито

Рускиот министер за одбрана Сергеј Шојгу изјави дека Русија воспоставува два хуманитарни поморски коридора во Црното и Азовското Море за да го олесни извозот на жито.
„Преземаме сет на мерки за да овозможиме безбедна пловидба во водите на Црното и Азовското Море. Опасноста од мини во пристаништето Мариупол е целосно елиминирана“, рече Шојгу, а пренесе руската новинска агенција РИА Новости.
Русија постојано повторува дека не го попречува извозот на украинско жито.