Воениот суд во Москва го осуди во отсуство поранешниот украински министер за одбрана Анатолиј Гриченко на шестгодишна затворска казна за повикување на терористички напади на територија на Русија.

Гриченко моментално престојува на територија на Украина, која не може да го екстрадира во Русија во склад со меѓународните правни норми и украинското законодавство.

Кривичната пријава против него е покрената по јавните изјави дадени на 16 јули 2014 година и на 2 јули 2017 година.

Гриченко во 2014 година јавно повикувал на терористички активности во Русија со разнесување на руски возови. Во 2017 година ја изнел идејата за секоја експлозија на автомобил во Киев или Мариупол, Украинците да вратат со иста мера во Москва или Таганрог.

На полноќ во Авганистан стапи на сила делумното примирје меѓу САД и талибанците, кое ќе го отвори патот за повлекување на американската војска и постигнување договор.

Договорот, како што најави американскиот државен секретар Мајк Помпео, ќе биде потпишан на 29 февруари во Доха.

Во текот на седумдневниот период на намалено насилство, нема да бидат изведувани големи офанзиви.

Според Помпео, договорот на крајот ќе доведе до траен прекин на огнот.

Во Италија почина уште едно лице како последица од коронавирусот, јави агенцијата „Анса“. Тоа е втора жртва на вирусот во Италија за 24 часа.

Втората жртва е жителка на регионот Ломбардија.

Претходно агенцијата јави дека починал пациент заразен со коронавирус во градот Падова, на северот на Италија, со што стана прва жртва на вирусот во Италија, но и во Европа.

Во северниот регион Ломбардија се регистрирани 15 заразени со коронавирус, а два случаи има во Венето, каде што се наоѓа Падова.

Мажот кој починал имал 78 години, пренесе агенцијата „Анса“.