Јужнокорејските власти ги повикаа синдикатите да ги откажат денешните протести додека земјата се бори против третиот бран на епидемијата и предупредија дека секое кршење на мерките за дистанцирање ќе биде казнето.

Корејската конфедерација на синдикатите објави дека 200.000 нејзини членови ќе почнат штрајк, но дека протестите ќе бидат ограничени на девет лица во Сеул, каде што се забранети јавни собири на десет или повеќе лица, пренесува „Ројтерс“.

Десетици членови на синдикатот се приклучија на митинзи на други места, кои не беа предмет на строги услови за социјално растојание, вклучувајќи го и оној во југоисточниот град Чангвон, на кој учествуваа 30-ина лица.

„Сè уште има висок ризик од инфекција за време на протестите и движењата пред и по протестите“, рече портпаролот на Министерството за здравство, Сон Јанг-ра.

„Важно е да се обезбеди слобода на собирање, но следењето на правилата за заштита на животот на луѓето треба да биде на прво место во сегашната ситуација кога коронавирусот бргу се шири“, предупреди тој.