Свет
Американска сенаторка предложи нов закон за Западен Балкан
Претседателката на Поткомитетот за Европа во Комисијата за надворешни односи на Сенатот на САД, сенаторката Џин Шахин, со поддршка од колегите од двете политички партии, уште еднаш го предложи Законот за демократија и просперитет на Западен Балкан пред новиот составо на Сенатот, пренесува „Гласот на Америка“.
Со поддршка на сенаторите Роџер Викер, Бен Кардин, Дик Дурбин и Крис ван Холен, целта на предлогот на сенаторката од Њу Хемпшир е да се унапреди соработката меѓу земјите од Западен Балкан, но и соработката на тие земји со САД во областа на сајбер безбедноста и сајбер отпорноста, имајќи ги предвид, како што посочи таа, штетните напори на Иран и Русија да ги таргетираат земјите од регионот.
„Одржувањето на мирот и зајакнувањето на демократијата на Балканот е од клучно значење за европската безбедност и стабилност, особено додека продолжува неиспровоцираната војна на Путин во Украина“, рече Шахин.
Според соопштението од веб-страницата на Шахин, законот ја поддржува „демократската стабилност и економскиот развој на регионот преку иницијативи во инфраструктурата, трговијата и антикорупцијата, вклучително и правна формализирање на санкциите, со цел да се одвратат актерите кои изведуваат дестабилизирачки активности“.
Законот повторно влезе во процедура на Сенатот во четвртокот, непосредно пред расправата на Комисијата за надворешни политички односи за Западен Балкан. Речиси истата група сенатори го предложи истиот закон пред претходниот состан на Сенатот, но тогаш не беше усвоен.
„Мојот двопартиски закон ќе ја зајакне трговијата и инвестициите меѓу САД и Западен Балкан, ќе ја искорени корупцијата, ќе ги утврди санкциите против дестабилизирачките актери и ќе испрати силен двопартиски сигнал дека САД се посветени на нашите партнери во регионот“, додаде сенаторката од редовите на Демократската партија.
Според еден од поддржувашите на законот, републиканскиот сенатор Роџер Викер, Балканот е дом на разновидно и колоритно културно наследство, а неговата геополитичка важност продолжува да расте.
„Бруталната руска инвазија на Украина ја нагласува важноста на нашите балкански партнерства. Усвојувањето на овој нацрт-закон ќе послужи како јасна, двопартиска изјава за посветеноста на САД на зајакнување на нашите дипломатски партнерства во регионот“, рече Викер.
Законот предвидува воспоставување регионална иницијатива за трговска и економска конкурентност и кодификација на две постоечки извршни уредби за воведување санкции за корупција и за закани за мирот и стабилноста на Западен Балкан.
Исто така, целта на законското решение е да се покрене иницијатива за борба против корупцијата, која би го насочила американскиот државен секретар кон обезбедување техничка помош за сите земји во развојот на националните стратегии за борба против корупцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.