Свет
Американските гласачи стравуваат од политичко насилство по претседателските избори, според истражувањата

Американските гласачи се исполнети со нелагодност за претседателските избори поради стравот дека може да ги следи политичко насилство, како и обидите за поништување на изборните резултати, покажуваат заклучоците од истражувањето спроведено од агенцијата АП и Центарот за истражување на јавното мислење.
Според наодите од истражувањето, граѓаните се загрижени за кревкоста на американскиот демократски систем – четири години по неоснованите тврдења на поранешниот американски претседател и републикански кандидат Доналд Трамп за нерегуларностите на изборите во 2020 година, како и насилството што ги придружуваше, објави „Гласот на Америка“.
Четири од 10 регистрирани гласачи посочија дека се крајно или многу загрижени поради насилните обиди за поништување на изборните резултати по претходните избори.
Секој трет гласач вели дека е загрижен поради обидите на локалните или државните изборни претставници да го спречат потврдувањето на резултатите од гласањето. Релативно мал број од нив, една третина или помалку, посочуваат дека не се загрижени за тоа.
Напорите на Трамп да ја порази волјата на гласачите и да остане на власт и покрај поразот во 2020 година доведуваат дел од анкетираните гласачи на ставот дека нема да сакаат повторно да го признаат тоа – доколку загуби од демократската кандидатка Камала Харис.
Девет од 10 испитаници сметаат дека губитникот на изборите е должен да се согласи со резултатите кога секоја од државите ќе заврши со броењето на гласовите и ќе се решат правните спорови. Меѓу нив има околу осум од 10 анкетирани републиканци.
Сепак, само една третина од гласачите очекуваат Трамп да ги прифати резултатите доколку загуби. Демократите и републиканците немаат исти ставови за ова прашање: околу две третини од републиканските гласачи мислат дека Трамп би попуштил во споредба со само еден од 10 демократи.
Со Камала Харис нема таква загриженост – речиси осум од 10 гласачи се уверени дека ќе ги прифатат резултатите во случај на загуба, вклучително и солидно мнозинство републиканци.
Членовите на двете партии се загрижени за судбината на демократијата во зависност од исходот на ноемвриските избори. Речиси половина од анкетираните веруваат дека Трамп во случај на победа би ја ослабнал демократијата во САД до одреден степен или целосно. Четири од 10 гласачи изразија таков став во врска со Камала Харис.
Истражувањето покажа и длабока идеолошка поделеност на Американците – речиси осум од 10 републиканци веруваат дека уште еден мандат на Трамп ќе ја зајакне демократијата во голема мера или до одреден степен. Сличен процент од демократите се одлучија за идентичен одговор на тоа прашање кога станува збор за Камала Харис.
Речиси девет од 10 анкетирани гласачи на една од партиите посочија дека кандидатот на спротивната партија веројатно ќе ја ослабне демократијата до одреден степен во случај на избори.
Во истражувањето спроведено од 11 до 14 октомври учествувале 1.072 возрасни лица, пренесуваат американските медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
15-годишно девојче загина по удар од автобус во Земун, повредени се неколку лица

15-годишно девојче загина денеска во сообраќајна несреќа во Земун, додека четири лица се пренесени во болница, меѓу кои бремена жена и шестгодишно дете, пишуваат медиумите во регионот.
Девојчето што починало било удрено од автобус, по што се судриле три патнички возила, според Танјуг.
Според сведоците, жена трчала преку улицата, а возачот на автобусот се обидел да ја избегне, па всушност преминал на тротоарот, каде што го удрил детето.
И јавното комунално претпријатие GSP се огласи по повод тешката сообраќајна несреќа во Земун во која девојче (15) почина кога беше удрено од автобус а неколку лица беа повредени, стои во написите на српските медиуми.
„Денес околу 12:20 часот, на улицата Цар Душан на број 136, се случи тешка сообраќајна несреќа со смртоносен исход и неколку полесни повреди. Во оваа несреќа учествуваа неколку патнички возила и автобус од линија 18 што ја напушти гаражата и се упати кон терминалот за да се вклучи во сообраќајот. Околностите под кои се случи оваа сообраќајна несреќа се уште се непознати и полицијата работи на нивно утврдување“, изјави GSP.
Како што пишува „Телеграф“, автобусот се обидел да избегне жена која трчала преку улицата надвор од пешачкиот премин, поради што свтел на тротоарот, удирајќи го девојчето кое завршило под возилото. На патот, тој удрил во неколку паркирани автомобили, а потоа се забил во порта на куќата.
Телото на девојчето било извлечено од под автобусот од пожарникари, а екипите за итни случаи можеле само да констатираат смрт. Во несреќата биле повредени десет лица, меѓу кои деветмесечна бремена жена, мајка и шестгодишно дете, 74-годишна жена.
Фото: принтскрин
Свет
Фон дер Лајен: Путин мора да седне на преговарачка маса, Европа ќе ја одигра својата улога

Претседателката на Европската комисија, Урсула фон дер Лајен, денес разговараше телефонски со украинскиот претседател Володимир Зеленски и американскиот претседател Доналд Трамп по веста за комбинираниот руски напад синоќа, во кој беше погодена и Делегацијата на ЕУ во Украина, меѓу другите цивилни цели.
„Тукушто разговарав со украинскиот претседател Володимир Зеленски, а потоа и со американскиот претседател Доналд Трамп по масовниот напад врз Киев, кој ја погоди и нашата канцеларија во ЕУ“, напиша фон дер Лајен на платформата X.
Таа рече дека рускиот претседател Владимир Путин мора да започне преговори со Киев.
„Путин мора да седне на преговарачка маса. Треба да обезбедиме праведен и траен мир за Украина со цврсти и веродостојни безбедносни гаранции“, истакна претседателката на Европската комисија.
Таа додаде дека Европа „целосно ќе ја одигра својата улога“.
„Нашиот одбранбен инструмент SAFE, на пример, ќе биде важен за зајакнување на храбрите украински вооружени сили“, истакна фон дер Лајен.
Таа претходно објави дека руските напади врз Киев, во кои загинаа 18 лица во текот на ноќта, меѓу кои и четири деца, „само ќе го зајакнат единството на Европа и пркосот на Украина“.
Фото: принтскрин
Свет
Заложничка преживеала 471 ден во тунелите на Хамас: „Ги молев да не ме убиваат“

Додека Израелците протестираат низ целата земја и вршат притисок врз владата да гарантира ослободување на преостанатите заложници од Газа, поранешната заложничка Дорон Штајнбрехер (32) се присети на своите 471 дена во заложништво. Во интервју за Ројтерс, таа изрази надеж дека сите преостанати заложници наскоро ќе бидат ослободени.
„Ги молев да не ме убиваат“, рече таа во интервјуто додека семејствата на заложниците се собираа и повикуваа на прекин на речиси двегодишната војна. Денес, вели, може само да се моли за ослободување на преостанатите 50 заложници, од кои, според израелските проценки, околу дваесет се уште живи. Надежта опстојува и покрај бројните неуспешни обиди на медијаторите да обезбедат прекин на огнот меѓу Израел и Хамас.
Нејзините пријатели, браќата близнаци Гали и Зив Берман, сè уште се во рацете на палестинската милитантна група што го нападна Израел на 7 октомври 2023 година. Во тој напад, најсмртоносниот ден за Евреите од Холокаустот, 1.200 луѓе беа убиени, а 251 лице беше однесено во Газа, според израелските бројки.
Последователната израелска воена кампања во Газа одзеде повеќе од 62.000 палестински животи, според здравствените власти во Газа, а гладот се прошири низ регионот.
„Сега е важно да се вратат сите заложници дома. Секој момент, секоја секунда тие се во опасност затоа што нема храна, нема вода, а санитарната состојба е многу лоша“, нагласи таа. „Знам што мислат и чувствуваат сега. Страв за своите животи секој момент. Секој ден одите на спиење и не знаете дали ќе се разбудите.“
Штајнбрехер била држена во подземни тунели каде што, како што вели, развила силна врска со другите млади жени кои биле со неа. „Нема светлина во тунелите, нема свеж воздух. Не знаете дали е ден или ноќ“, рекла таа. Во еден тунел, едвај можела да стои, рекла таа.
Милитантите на Хамас ѝ рекле дека ќе биде веднаш погубена ако ја слушнат израелската армија како се приближува. Таа рекла дека била под интензивен психолошки притисок, ѝ било забрането да покажува емоции и ретко ѝ било дозволено да се мие. Морала да моли за храна секој ден, рекла таа.
Израелскиот премиер Бенјамин Нетанјаху вети дека ќе го уништи Хамас. И покрај протестите дома и меѓународната осуда, Израел се подготвува да започне нова офанзива во градот Газа, кој таа го опишува како последно упориште на милитантите.
Додека притисокот врз Нетанјаху расте да склучи договор со кој ќе се ослободат преостанатите заложници, министрите од крајната десница, кои се клучни за неговиот политички опстанок, се заканија дека ќе ја соборат неговата влада ако заврши војната.
Фото: принтскрин