Свет
Американски претставник за Сирија: „Постојат докази за турски воени злосторства“

Специјален претставник на американскиот претседател Доналд Трамп во Сирија соопшти дека американските сили виделе докази за воени злосторства од страна на турската војска за време на неодамнешната офанзива против Курдите во североисточниот дел на земјата.
Не видовме широко распространети докази за етничко чистење во турскиот воен напад, но има извештаи за неколку инциденти кои ги сметаме за воени злосторства, рече Џејмс Џефри на сослушувањето во Претставничкиот дом на Конгресот.
Американските власти ги испитуваат овие извештаи, истакна тој, додавајќи дека побарал објаснување и од турската влада.
САД исто така истражуваат и извештај според кој Турција користела забранет бел фосфор за време на офанзивата.
Потврдено е и тврдењето на министерот за одбрана Марк Еспер дека повеќе од стотина борци на Исламска држава побегнале поради турската операција, а во моментов нивната локација е непозната.
Џефри и Метју Палмер, заменик државниот секретар задолжен и за односите со Турција, втор ден по ред сведочеа пред американскиот Конгрес, пренесува хрватски „Индекс“.
Голем дел од претставниците, републиканци и демократи не се согласуваат со одлуката на Трамп да се повлече од Сирија, што пак го отвори патот за турската војска да ја премине границата и да ги нападне курдските сили кои со години им помогнаа на САД во борбата против милитантите од Исламска држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Најмалку 25 лица загинаа во текот на ноќта во нови напади на израелската армија врз Појасот Газа

Најмалку 25 лица загинаа во текот на ноќта во нови напади на израелската армија врз Појасот Газа, во време кога мировните преговори се во застој.
Според здравствени извори, голем дел од жртвите се убиени додека чекале хуманитарна помош во близина на граничниот премин Зиким со Израел. Меѓу загинатите има и четири лица од иста семејна зграда во градот Газа.
Организацијата на Обединетите нации предупреди на ризик од масовна глад во енклавата, и покрај тврдењата на Израел дека не ги блокира доставите на помош. Според ОН, големиот дел од помошта не може да стигне до населението поради воени блокади и грабежи.
Преговорите за прекин на огнот меѓу Израел и Хамас се прекинати, откако американските и израелските преговарачи се повлекоа од Катар. Израелскиот премиер Бенјамин Нетанјаху најави дека се разгледуваат „алтернативни опции“, додека Хамас смета дека повлекувањето било тактика на притисок.
Свет
Поради пожарите во Турција евакуирани се над 2.600 лица

Турската Дирекција за управување со вонредни ситуации (АФАД) евакуираше 2.619 лица откако оваа недела Турција се соочи со серија интензивни шумски пожари во повеќе провинции, јави весникот „Дејли сабах“.
Пожарите, поттикнати од екстремно високи температури, силен ветер и сушно време, мобилизираа илјадници спасувачи и доброволци кои учествуваат во гаснењето на огнот. Екипите се активни од воздух и копно, а според АФАД, ангажирани се 4.231 лице, 45 летала и 1.236 копнени возила.
Најтрагичниот инцидент се случи во средата, во руралниот дел на провинцијата Ескишехир, каде животот го загубија десет лица – пет шумски работници и пет припадници на организацијата АКУТ за пребарувачко-спасувачки операции, додека се бореле со огнената стихија.
Претседателот на Турција, Реџеп Тајип Ердоган, изјави во петокот дека во гаснењето учествуваат 27 авиони, 105 хеликоптери, 6.000 возила и 25.000 лица. Тој изрази сочувство до семејствата на загинатите.
Свет
Париз, Лондон и Берлин повикаа да престане хуманитарната катастрофа во Газа

Хуманитарната катастрофа во Појасот Газа мора веднаш да престане, повикаа вчера во заедничко соопштение Париз, Лондон и Берлин.
„Хуманитарната катастрофа на која сме сведоци во Газа мора веднаш да престане“, нагласија трите европски земји.
Тие на овој начин одговорија на алармот објавен од ОН и невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментално прекин на огнот.