Свет
Асад одбива примирје во Вади Барада и не сака да се преговара за неговото повлекување

Сирискиот претседател Башар ал-Асад одби во понеделникот какво и да е примирје во областа Вади Барада од каде што главниот град Дамаск се снабдува со вода и повтори дека не сака неговото отстапување од должноста да биде на дневниот ред на мировните преговори кои под покровителство на Русија и Турција за крајот на јануари се закажани во казахстанската престолнина Астана.
Откако целосно го ослободија Алепо, вториот по големина и по важност град во земјата, сириските владини сили помогнати од локалните милиции и борците на либанското шиитско движење Хезболах започнаа офанзива за истиснување на бунтовниците од градот Вади Барада, на 15 километри од Дамаск, за да воспостават контрола над главните извори на вода од кои се снабдува престолнината.
Продолжувањето на овие борби в Вади Барада, западните престолнини инсистираат дека може да го загрози примирјето чиишто покровители се Русија и Турција и кое стапи на сила на 30-ти декември, и коешто главно се почитува на целата територија на земјата, а треба да преставува вовед во мировните меѓусириски преговори во Астана. Меѓутоа, Вади Барада е под контрола на џихадистичките групации кои се изземени од примирјето склучено меѓу владините сили и вооружената опозиција.
„Задачата на сириската војска е да го ослободи тој сектор, за да не можат терористите со водата како оружје да ја уништуваат престолнината“, изјави сирискиот претседател Башар ал-Асад во интервјуто за француските медиуми – радиото RTL, телевизиската мрежа LCP и радио-телевизијата France Info од кое дел беше емитуван во неделата, а дел во понеделникот.
„Примирјето е нарушено бидејќи терористите го заземаа главниот извор на вода за Дамаск, поради што повеќе од пет милион цивили веќе три седмици се без вода за пиење“, истакна Асад.
„Примирјето не ги вклучува (ултрарадикалните терористички исламистички групации) Исламска држава ниту Џебхат ан-Нусра, а секторот (Вади Барада) каде што се водат борбите за негово ослободување, е во рацете на ан-Нусра… Значи таа не учествува во примирјето“, појасни Асад.
Џебхат ан-Нусра, сириското крило на Ал Каеда, се преименуваше од Џебхат ал-Фатах ал-Шам и наводно се дистанцираше од Ал Каеда, пред октомврискиот договор за примирје под покровителство на САД и Русија. Тогаш Москва го обвини Вашингтон за сугерирање за преименувањето на оваа џихадистичка група за да биде изземена од договорот кои бунтовнички групи ќе бидат напаѓани од страна на коалициските сили предводен од САД и од руската авијација, бидејќи сириската Ал Каеда беше најсилната вооружена бунтовничка формација во северната покраина Алепо и им даваше најсилен отпор на владините сили.
Алавитот Асад, кој со победата во Алепо што ја прогласи на 22-ри декември – извојуван со помош на руските воздушни напади и иранските воени стручњаци, Хезболах и шиитски доброволци од регионот – направи голем пресврт во војната која започна во март 2011 година, како и претходно ја одбива можноста во Астана да се преговара за неговото заминување од власта, што го бара сунитската опозиција, регионалните сунитски монархии и нивните сојузници од Западот.
„Имаме желба да разговараме за сé. Но мојата позиција ја одредува уставот, а тој многу јасно кажува како се избира и се менува претседателот“, додаде.
„Значи, доколку сакаат (опозицијата) да разговараат за тоа, мора да разговараат за уставот, а тој не му припаѓа ниту на претседателот, ниту на владата, ниту на опозицијата, туку само на сирискиот народ и за тоа е неопходен референдум“, порача Асад./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Мерцедес, златни прачки, готовина: сопругата на некогаш моќниот сенатор земала мито за него

Поротата во Њујорк ја прогласи Надин Менендез, сопруга на поранешен сенатор од Њу Џерси, за виновна за нејзината улога во долгогодишниот корупциски скандал со готовина, златни прачки и луксузен Мерцедес.
Надин Менендез (58) беше прогласена за виновна по сите 15 точки од обвинението, вклучително и поткуп и попречување на правдата, бидејќи му помагала на нејзиниот сопруг Роберт Менендез да прифати подароци во замена за политички услуги. Таа беше обвинета заедно со него уште во септември 2023 година, но нејзиното судење беше одложено поради лекување од рак на дојка.
Пресудата ќе и биде изречена на 12 јуни. Нејзиниот сопруг минатата година веќе беше осуден на 11 години затвор. Канцеларијата на американското правобранителство ја опиша двојката како „партнери во криминалот“ и рече дека „владината моќ не е на продажба“.
На судењето, обвинителите тврдеа дека Надин била клучна за целата шема, често добивајќи готовина и подароци во име на нејзиниот сопруг.
Во тоа време, Менендез беше еден од највлијателните демократи во американскиот Сенат. Тој беше член на Комитетот за надворешни работи, што му даде голема моќ во обликувањето на американската надворешна политика. „Таа го информираше за сè што прави“, рече обвинителот Пол Монтелеони, според Њујорк тајмс.
Адвокатите на Надин Менендез тврдеа дека обвинителите не докажале дека златото и готовината пронајдени во нивниот дом имаат директни врски со каква било официјална постапка на нејзиниот сопруг. Нејзиниот адвокат Бери Кобурн не го криеше разочарувањето пред судот: „Се боревме со сите сили и овој исход беше тежок за нас. Денес е многу тежок ден за нас“.
За време на судењето, обвинителите презентираа докази пронајдени за време на претресот на нивниот дом во 2022 година – повеќе од 100.000 долари во златни прачки и стотици илјади долари во готовина скриени во облека и пликови. Прикажаа и пораки меѓу сопружниците и нивните соработници и пребарување на Гугл на поранешниот сенатор: „Колку вреди еден килограм злато?“
Во целата афера, покрај Надин и Роберт Менендез, биле вмешани и градежниот претприемач Фред Даибес и Ваел Хана, сопственик на компанија за сертификација на халал од Египет, кои исто така биле осудени. Осигурителот Хозе Урибе се изјасни за виновен во март оваа година за учество во корупциска шема.
Европа
Што прави папата?

Кардиналите ќе се состанат на конклава по смртта на папата Франциско за да го изберат неговиот наследник – но кои се вистинските должности и овластувања на поглаварот на Католичката црква? Зборот папа доаѓа од грчкиот „pappas“ што значи „татко, патријарх“. Поради оваа причина, верниците го нарекуваат и „Свети Отец“.
Управител на Црквата
Сметан за наследник на Свети Петар, на кого Христос му ја доверил мисијата за управување со Црквата, папата е духовен водач на повеќе од 1,4 милијарди католици ширум светот. Неговата улога е да ја зачува и поучува христијанската вера, да ги толкува евангелијата и да го обезбеди единството на Црквата.
Шефот на државата
Папата е и шеф на државата Ватикан, независна држава опкружена со Рим, која со 44 хектари е најмалата во светот. Во ова својство, папата има апсолутна власт – извршна, законодавна и судска.
Папите ги примаат шефовите на држави на „приватна аудиенција“ што овозможува размена на мислења за актуелни теми или позиции на Светата столица, која како духовна и административна власт за римокатолиците во светот има статус на суверен субјект според меѓународното право.
Доктрина и учење
Папата пишува документи како што се енциклики или апостолски опомени, со што ги одредува доктринските и моралните прашања, ги води верниците и ја реформира Црквата. Во дванаесетте години од неговиот понтификат, Франциско на тој начин го отвори патот за благослов на истополовите парови, ги ограничи латинските миси и презеде мерки за борба против сексуалното насилство во Црквата.
Папата има и учителска мисија преку своите говори. Покрај тоа што проповеда на миси, тој секоја среда наутро во Ватикан одржува јавни катехези за време на неделната општа аудиенција.
Именувања
Папата го има последниот збор во назначувањето епископи во епархиите ширум светот, од кои има приближно три илјади. Папата назначува и кардинали, а оние помлади од 80 години го избираат неговиот наследник. Неговиот збор е конечен дури и во именување на блажените и светителите. Може да свикува и синоди – собири на лаици и верски поглавари на кои ќе разговараат за одредени теми.
Патувања
Покрај тоа, тој патува низ светот за да се сретне со верниците, одговарајќи на официјалните покани од шефовите на држави. Најголем патник бил папата Јован Павле Втори кој во своите 26 години понтификат остварил 104 патувања во странство. Вториот е Франциско со 47 патувања.
Римски бискуп
Папата, покрај тоа што е поглавар на целата Католичка црква, е и водач на својата епархија, Римската епархија. Поради сите обврски, оваа должност најчесто се делегира на генералниот викар. И покрај тоа, папата учествува во животот на локалната црква, редовно појавувајќи се во црквите во главниот град на Италија за време на големите празници.
Свет
(Видео) Се запали моторот на авион пред полетување во САД, евакуирани речиси 300 луѓе

Патниците биле принудени да го напуштат авионот на Делта откако се запалил мотор додека авионот бил паркиран на асфалтот на меѓународниот аеродром Орландо во Флорида, јавува Би-би-си. На снимките објавени на социјалните мрежи се гледа чад и пламен кои доаѓаат од десниот мотор и патниците кои излегуваат од авионот на надуени тобогани за евакуација.
Летот 1213 на Делта требаше да тргне од Орландо, познат по Дизни Ворлд, за Атланта, со речиси 300 луѓе во авионот. Нема извештаи за повредени. „Патниците се евакуирани. Спасувачките и противпожарните екипи брзо реагираа“, објави аеродромот на социјалните мрежи.
Делта во изјава за Си-би-ес Њуз соопшти дека авионот бил Ербас А330 со 282 патници, 10 членови на кабинскиот екипаж и двајца пилоти во авионот. Компанијата соопшти дека членовите на екипажот ја евакуирале кабината откако бил забележан пламен на еден од двата главни мотори.