Свет
Балон полн со ѓубре од Северна Кореја повторно падна врз претседателскиот комплекс во Јужна Кореја

Балон со отпад од Северна Кореја падна денеска врз претседателскиот комплекс во центарот на Сеул, Јужна Кореја, што предизвика загриженост за безбедноста на клучните локации во случај на можна севернокорејска агресија.
Ова е вторпат да се фрла отпад на таа локација, првиот ваков инцидент е забележан во јули годинава.
Инцидентот следува по зголемувањето на меѓусебните закани меѓу двете земји поради тврдењата на Северна Кореја дека Јужна Кореја летала беспилотни летала над главниот град Пјонгјанг и фрлала пропагандни летоци.
Во ѓубрето не се пронајдени опасни предмети, соопшти службата за безбедност на јужнокорејскиот претседател, Џун Сук-Јул.
Не е познато дали тој бил во комплексот за време на инцидентот.
Јужнокорејските медиуми објавија дека летоците во кои се критикуваат претседателот и неговата сопруга биле пронајдени во квартот Јонгсан во Сеул, каде што се наоѓа канцеларијата на претседателот.
Тие објавија фотографии од летоците, кои ја опишуваат сопругата на претседателот, Ким Кеон-Хи, како Марија Антоанета, француската кралица, која беше обезглавена за време на Француската револуција.
Исто така, се вели дека ова е првпат да се најдат пропагандни летоци од Северна Кореја во Јужна Кореја откако Северна Кореја ја почна својата балонска кампања пред пет месеци.
Северна Кореја испрати илјадници балони со отпад од пластика и хартија во Јужна Кореја од мај оваа година.
Експертите тврдат дека Северна Кореј, веројатно, не поседува доволно напредна технологија, која би овозможила фрлање балони на одредени цели.
Северна Кореја ја обвини Јужна Кореја за инфилтрирање беспилотни летала и фрлање пропагандни летоци над Пјонгјанг трипати овој месец и се закани со сила доколку тоа се повтори.
Јужна Кореја одби да потврди дали ги испратила беспилотните летала, но предупреди дека Северна Кореја ќе се соочи со крај на нејзиниот режим доколку биде загрозена безбедноста на јужнокорејските граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.
Свет
Израелски министер: Војната нема да заврши сè додека стотици илјади луѓе не ја напуштат Газа

Израелскиот министер за финансии, Безалел Смотрич, изјави денес дека Израел нема да ја заврши војната во Појасот Газа сè додека стотици илјади Палестинци не ја напуштат енклавата.
„Ќе ја завршиме оваа кампања кога Сирија ќе биде уништена, Хезболах ќе биде тешко поразен, Иран ќе биде лишен од својата нуклеарна закана, Газа ќе биде исчистена од Хамас и кога стотици илјади жители на Газа ќе избегаат во други земји, нашите заложници ќе бидат вратени, некои во своите домови, а некои во гробовите на Израел“, рече Смотрич за време на говорот во населбата Ели во централниот Западен Брег.
Тој изјави дека ова не се само цели на владата, туку и консензус на израелскиот народ и војниците. Смотрич апелираше до премиерот Бенјамин Нетанјаху да „направи сè за да ја зајакне безбедноста на Израел“ и го предупреди да не „ја пропушта оваа можност“.
Израелската војска го обнови нападот врз Газа на 18 март, прекршувајќи го договорот за прекин на огнот и размена на затвореници со палестинската милитантна група Хамас од 19 јануари.
Над 52.300 луѓе, претежно жени и деца, се убиени во Газа во израелската офанзива од октомври 2023 година, која започна по нападот на Хамас врз Израел на 7 октомври 2023 година, во кој беа убиени 1.300 луѓе.