Свет
Бајден: Израел се согласи на прекин на огнот за рамазан, ризикува да ја загуби поддршката од светот

Американскиот претседател Џо Бајден изјави дека Израел се согласил да ги прекине воените активности во Појасот Газа за време на рамазан додавајќи дека еврејската држава ризикува да ја изгуби поддршката од остатокот од светот бидејќи Палестинците умираат во голем број.
Бајден, кој ги даде забелешките за време на гостувањето во емисијата „Доцна во ноќта со Сет Мејерс“ на Ен-би-си рече дека Израел е посветен да им дозволи на Палестинците да се евакуираат од Рафа во јужна Газа пред да ја интензивира својата кампања таму за уништување на Хамас. Тој рече и дека постои начелен договор за прекин на огнот меѓу двете страни додека не се ослободат заложниците.
„Рамазан се приближува, а Израелците се согласија да не учествуваат во активности за време на рамазан за да ни дадат време да ги извадиме сите заложници“, рече тој. Муслиманскиот свет месец рамазан во 2024 година се очекува да почне вечерта на 10 март 2024 година, а да заврши вечерта на 9 април 2024 година.
Бајден рече дека привремениот прекин на огнот ќе ги олесни односите меѓу Палестинците и Израел и ќе го забрза процесот на создавање палестинска држава. „Тоа ни дава време да почнеме да се движиме во насоките во кои се подготвени да одат многу арапски земји. На пример, Саудиска Арабија е подготвена да го признае Израел. Разговарав и со Катар“, изјави Бајден.
„Доколку го добиеме тој привремен прекин на огнот, ќе можеме да се движиме во насока каде што можеме да ја промениме динамиката и да не добиеме решение за две држави веднаш, туку процес за да дојдеме до решение со две држави, процес што ги гарантира безбедноста на Израел и независноста на Палестинците“, рече тој.
Бајден рече дека се надева оти ќе постигне прекин на огнот во конфликтот до следниот понеделник. Израелскиот премиер Бенјамин Нетанјаху ја отфрли идејата за решение со две држави. „Израел ризикува да ја загуби поддршката од остатокот од светот“, рече американскиот претседател. „Убиени се премногу невини луѓе. А Израел ги забави нападите во Рафа“, рече Бајден.
„Тие мора – и ми се обврзаа дека ќе се погрижат да има можност да се евакуираат значајни делови од Рафа пред да одат и да го уништат остатокот од Хамас“, рече тој. „Но, тоа е процес. И, гледајте, Израел имаше огромна поддршка од огромното мнозинство нации. Ако продолжи вака, ќе ја изгуби поддршката од целиот свет. И тоа не е во интерес на Израел“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Напад во синагога: има загинати и повредени во Мачестер

Напад со нож се случи во синагогата Крамсал во Манчестер, а полицијата потврди дека две лица се убиени и дека „уште три граѓани се во сериозна состојба“.
Градоначалникот на Манчестер, Енди Бернам, го нарече нападот „сериозен инцидент“ и ги повика луѓето да ја избегнуваат областа.
Би-Би-Си, исто така, објави дека „се чини дека непосредната закана поминала“. Полицијата реагираше брзо и е на местото на настанот, а истрагата е во тек.
Полицијата соопшти дека добила пријава во 9:31 часот по локално време од граѓанин кој видел автомобил како се движи со брзина кон луѓе пред синагогата на хебрејската конгрегација Хитон Парк на патот Мидлтон, Крамсал, и дека еден човек бил избоден со нож.
Во полициското соопштение се наведува дека се верува дека напаѓачот, кон кого пукале припадници на полицијата, исто така е убиен, но дека ова „не може да се потврди во моментов поради безбедносни проблеми“ во врска со сомнителните предмети на неговото тело, објави Би-Би-Си.
Според изјавите на очевидци и објавите на социјалните мрежи, полицијата се сомнева дека напаѓачот поседувал бомба. Оваа информација не е официјално потврдена од членовите на полицијата на Манчестер.
Градоначалникот на Манчестер, Енди Бернам, за Би-Би-Си Радио Манчестер изјави дека се верува дека напаѓачот е „мртов“, но нагласи дека тоа „сè уште не е потврдено“.
Фото: принтскрин
Свет
Силен земнотрес ја погоди Турција

Земјотрес со магнитуда од 5,0 степени ја погоди денес западна Турција, со епицентар во Мраморното Море, на 39 километри оддалеченост од покраината Текирдаг, соопшти Европско-медитеранскиот сеизмолошки центар (EMSC).
Земјотресот беше почувствуван и во Истанбул, кој е оддалечен околу 100 километри од епицентарот на земјотресот, објавија медиумите.
Според соопштението на EMSC, епицентарот на земјотресот бил на длабочина од девет километри.
Свет
Илон Маск – првиот полубилионер во светот

Илон Маск, директорот на компанијата „Тесла“, е првиот човек во историјата со богатство од повеќе од 500 милијарди долари (приближно 425 милијарди евра).
Богатството на Маск накратко достигна 500,1 милијарди долари во попладневните часови на 1 октомври по њујоршко време за пред малку да падне на нешто над 499 милијарди долари, според листата на милијардери на „Форбс“.
Покрај „Тесла“, вредностите на другите компании на Маск исто така се зголемија, како што се стартапот во областа на вештачката интелигенција „хВИ“ и компанијата „Спејс икс“.
Сето ова дополнително го зајакнува статусот на Маск како најбогат човек во светот далеку пред конкурентите во глобалниот технолошки сектор.
Втор најбогат човек во светот моментно е Лари Елисон, основачот на технолошката компанија „Оракл“, чие богатство се проценува на речиси 350,7 милијарди долари.
Елисон накратко го престигна Маск минатиот месец кога акциите на „Оракл“ скокнаа за повеќе од 40 проценти по оптимистичките деловни прогнози во областа на вештачката интелигенција.
Огромното богатство на Маск е главно поврзано со неговиот удел од над 12 проценти во „Тесла“, чии акции значително пораснаа оваа година.
Во средата, на затворањето на берзата во Њујорк, акциите на „Тесла“ пораснаа за повеќе од 3,3 проценти, а од почетокот на годината забележаа раст од повеќе од 20 проценти.
Инвеститорите позитивно реагираат на фактот дека Маск во последно време повеќе се посветува на своите компании, а помалку на политиката.
Неодамна, тој беше цел на критики за неговата работа со администрацијата на Трамп, првенствено со Одделот за владина ефикасност, кој беше задолжен за намалување на владините трошоци и бројот на вработени во јавниот сектор.
Маск, кој е и сопственик на социјалната мрежа „Икс“, често јавно ги искажува своите ставови за теми, како што се имиграцијата и програмата за разновидност, еднаквост и вклучување (DEI), што исто така предизвикува големо внимание.
Тој сега е целосно посветен на „Тесла“, изјави Робин Денолм, претседател на управниот одбор на „Тесла“, во септември.
Управниот одбор исто така објави бонус од една милијарда за Маск ако постигне многу амбициозни цели во следните десет години.
За да го постигне ова, тој би морал да ја зголеми вредноста на „Тесла“ осумпати, да продаде милион роботи базирани на вештачка интелигенција, дополнителни 12 милиони автомобили и да исполни голем број други барања.
Минатиот месец Маск објави дека купил акции на „Тесла“ во вредност од речиси една милијарда долари, што многу инвеститори го протолкуваа како знак на доверба во иднината на компанијата.
Сепак, во последните години „Тесла“ се соочи со сериозна конкуренција, првенствено од кинескиот гигант BYD, како и со предизвици поврзани со трансформацијата во компанија што се занимава со вештачка интелигенција и роботика.
Фото: принтскрин