Најмалку 20 лица загинаа откако брод со мигранти се преврте кај италијанскиот остров Лампедуза во Средоземното Море, објавија денес локалните медиуми и агенцијата за бегалци на Обединетите нации.

Спасувачите досега пронајдоа 20 тела, а спасувачките операции продолжуваат, според новинската агенција Анса. Се верува дека преживеале помеѓу 70 и 80 лица.

Филипо Унгаро од агенцијата за бегалци на ОН УНХЦР изрази „длабока тага“ поради катастрофата и процени дека дополнителен број мигранти би можеле да се сметаат за исчезнати во море. „Пронајдени се дваесет тела, а ист број луѓе се водат како исчезнати“, напиша тој на својот „Икс“ профил.

Според соопштението за медиумите на француското претседателство, започна онлајн самитот, на кој учествуваат американскиот претседател Доналд Трамп, украинскиот претседател Володимир Зеленски и лидерите на Европската Унија.

Се очекува на состанокот да се разговара за војната во Украина и европската безбедност, пред состанокот помеѓу Трамп и рускиот претседател, Владимир Путин, закажан за в петок.

Русија денес соопшти дека нејзината позиција за војната во Украина не се променила откако претседателот Владимир Путин ги постави своите услови минатата година: Украина целосно да ги повлече своите сили од клучните украински области и да се откаже од своите амбиции за членство во НАТО.

Путин и американскиот претседател Доналд Трамп ќе се сретнат во Алјаска в петок, што ќе биде првиот самит на САД и Русија од 2021 година, за да разговараат за опциите за завршување на војната. Трамп рече дека двете завојувани страни ќе мора да разменат дел од териториите што моментално ги држат за да се случи тоа.

Русија моментално контролира 19 проценти од Украина, вклучувајќи го целиот полуостров Крим, целиот регион Луганск, над 70 проценти од регионите Донецк, Запорожје и Херсон, и помали делови од регионите Харков, Суми, Николаев и Дњепропетровск.

По некои медиумски извештаи дека Вашингтон верува оти Путин е подготвен да направи компромис кога станува збор за територијални претензии, новинарите го прашаа портпаролот на руското Министерство за надворешни работи, Алексеј Фадеев, дали ставот на Русија се променил.

„Ставот на Русија останува непроменет, а беше изразен во оваа сала пред малку повеќе од една година, на 14 јуни 2024 година“, рече Фадеев, осврнувајќи се на говорот на Путин во министерството.

Потоа шефот на Кремљ ги изложи своите барања, вклучително и повлекување на украинските трупи од деловите на регионите Доњецк, Запорожје и Херсон што тие сè уште ги држат, што беше негов прв јавен коментар за евентуален мировен договор.

Путин, исто така, рече дека Киев ќе мора официјално да ја извести Москва дека се откажува од своите планови за влез во НАТО и дека има намера да остане неутрален и неврзан.

Покрај тоа, Путин рече дека правата и слободите на руските говорници во Украина мора да бидат гарантирани, како и „реалноста“ дека Крим, Луганск, Донецк, Запорожје и Херсон сега се дел од Русија. Путин рече дека неговите услови ќе мора да бидат одразени и во меѓународните договори.

Во времето на неговиот говор во 2024 година, Украина ги отфрли тие барања, нарекувајќи ги апсурден ултиматум. Украина постојано повторуваше дека нема да ја признае руската окупација на нејзината територија, а повеќето земји ја признаваат украинската територија во рамките на нејзините граници од 1991 година.

Украинскиот претседател Володимир Зеленски рече дека Русија мора да се согласи на прекин на огнот пред да разговара за територијални прашања. Тој рече дека ќе го отфрли секој руски предлог Украина да ги повлече своите војници од источниот регион Донбас и да ги предаде своите одбранбени позиции.

Зеленски денес пристигна во Берлин, каде што се среќава во живо со германскиот канцелар Фридрих Мерц, а заедно со него на видеоконференција со европските лидери, шефот на НАТО и американскиот претседател Доналд Трамп.

Пред видео повикот, Трамп напиша на платформата Truth Social дека „европските лидери сакаат да постигнат договор“ и дека тие се „одлични луѓе“.