Свет
Белорусија формира нова територијална одбрана, да се пријават 150.000 доброволци

Претседателот на Белорусија, Александар Лукашенко, нареди формирање нова доброволна територијална одбрана, која ќе има меѓу 100.000 и 150.000 члена.
„Ситуацијата не е лесна. Јас повеќепати изјавив дека секој човек, а не само мажите, треба барем да знае како да ракува со оружје“, рече Лукашенко на состанокот на Советот за безбедност на Белорусија.
Според претседателот на Белорусија, човекот треба да користи оружје „барем да го заштити своето семејство, својот дом, своето парче земја и, доколку е потребно, својата земја“.
Министерот за одбрана на Белорусија, Виктор Хренин, прецизира дека новата територијална одбрана ќе има меѓу 100.000 и 150.000 доброволци. Идеално овие единици би биле присутни во секое село и град во Белорусија.
Лукашенко рече дека украинското искуство ја истакна потребата од дополнителни одбранбени сили.
„Одговорот на секој акт на агресија против Белорусија ќе биде брз, жесток и адекватен“, повтори Лукашенко.
Во извештајот на Меѓународниот институт за стратешки студии за армијата на Белорусија за 2022 година беше наведено дека Минск има речиси 48.000 војници и приближно 12.000 припадници на граничната полиција, пренесе „Ројтерс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Австралија го отфрли предлогот на Кина заеднички да се спротивстават на американските царини

Австралија денеска го отфрли предлогот на Пекинг да работи заедно за да се спротивстави на американските царини, велејќи дека наместо тоа ќе продолжи да ја зајакнува својата трговија и да ја намали зависноста од Кина, нејзиниот најголем трговски партнер.
„Нема да се држиме за рака со Кина во врска со каков било конфликт што се случува во светот“, изјави вицепремиерот Ричард Марлс за Sky News, реагирајќи на предлогот на кинескиот амбасадор двете земји да „работат заедно“ на полето на трговијата. Тој рече дека Австралија ќе ја изгради својата економска отпорност со зајакнување на трговските врски со Европската унија, Индонезија, Индија, Велика Британија и Блискиот Исток, според Ројтерс.
Кинескиот амбасадор во Австралија, Ксијао Киан ја повика Канбера да соработува со Пекинг за одбрана на мултилатералниот глобален трговски систем. „Под новите околности, Кина е подготвена да им се придружи на Австралија и меѓународната заедница за заеднички да одговорат на промените во светот“, рече Ксијао.
Американскиот претседател Доналд Трамп вчера изјави дека привремено ќе ги намали високите царини за десетици земји, но ќе продолжи да ја таргетира Кина, зголемувајќи ги тарифите од 104 на 125 отсто.
Ова може да претставува ризик за Австралија, која извезува речиси една третина од својата стока во Кина, според Ројтерс. Извозот во САД сочинува помалку од пет проценти од вкупниот извоз на стока на Австралија. Премиерот рече дека иако царините за Австралија, клучен американски безбедносен сојузник во Индо-Пацификот, немаат основа во логиката, неговата влада нема да му возврати на Вашингтон, пренесува Танјуг.
Свет
Бројот на загинати во уривањето на покривот на ноќниот клуб „Џет Сет“ се искачи на 184

Бројот на загинати во уривањето на покривот во ноќниот клуб „Џет Сет“ во Санто Доминго се искачи на најмалку 184, соопштија властите, додека потрагата по исчезнатите продолжува.
Директорот на Центарот за вонредни ситуации Хуан Мануел Мендез изјави дека спасувачките тимови се уште се на терен во потрага по тела и можни преживеани, иако никој не бил пронајден жив до вторник попладне, пренесе АП.
„Ние нема да оставиме никого. Продолжуваме да работиме“, рече Мендез.
Несреќата се случила ноќта помеѓу понеделникот и вторникот, додека стотици луѓе уживале во концертот на познатиот пејач Рубио Перез. Во клубот во тој момент имало музичари, спортисти и официјални лица.
Прво почнала да паѓа прашина од таванот, а потоа се урнал покривот и ги затрупал посетителите со бетонски плочи.
Досега се идентификувани 54 тела, додека најмалку 33 остануваат неидентификувани.
Повеќе од 200 луѓе се повредени, а најмалку 20 лица се хоспитализирани, од кои осум се во критична состојба.
Причината за уривањето на покривот се уште не е позната, а истрагата е во тек. Се огласи и сопственикот на клубот „Џет сет“, кој изјави дека соработува со надлежните, додека одговорноста за евентуалните пропусти се уште се истражува.
Свет
Кина со години се подготвува за царините на Трамп, вели уредник на „Економист“

Кина внимателно и долгорочно се подготвуваше за царините од Вашингтон и има низа краткорочни и долгорочни контрамерки, тврди Дејвид Рени, уредник за геополитика на „Економист“.
Во интервју за Би-би-си, Рени вели дека кинеските функционери и академици со кои неодамна разговарал во Пекинг, свесно очекувале трговски конфликт за време на претседателската кампања на Трамп.
„Кина сака да планира. Сакаат петгодишни планови. За нив е исклучително тешко да се справат со таков каприциозен, трансакциски американски претседател“, рече Рени.
„Тие се подготвуваа многу внимателно и многу долго. Имаа краткорочни подготовки специфични за САД, но и долгорочни мерки за да се обидат да ја преориентираат и ребалансираат целата нивна економија, да ја намалат зависноста од извозот“, додаде тој.
Еден од најјасните примери на кинеската стратегија е воведувањето царини за американската соја. Рени истакнува дека мерката директно влијае на гласачката база на Трамп во средниот запад на САД, додавајќи дека Пекинг може истовремено да набавува соја од Бразил и Аргентина.
„Логиката во Пекинг оди вака: Што можеме да направиме за да ги повредиме гласачите на Трамп, да го привлечеме неговото внимание и да го купиме на друго место?“, објасни Рени.
Од утрово стапија на сила кинеските царини од 84 отсто за американските стоки, како одговор на тарифите од 125 отсто што претходно ги наметна администрацијата на Трамп. Аналитичарите предупредуваат дека ваквиот развој на настаните може силно да го погоди американското земјоделство, но и да ги зголеми цените за американските потрошувачи.
Засега и двете страни не покажуваат знаци на попуштање. Пекинг вели дека „ќе се бори до крај“, додека слични пораки доаѓаат од Вашингтон.