Српскиот премиер Милош Вучевиќ остро ги осуди, како што истакна, застрашувачките смртни закани кон претседателот Александар Вучиќ, неговото семејство и претседателката на Народното собрание Ана Брнабиќ упатени на социјалната мрежа Х и ги повика надлежните органи итно да реагираат со цел да се идентификуваат и санкционираат оние кои повикуваат на убиство на српскиот претседател.

Вучевиќ во објава на Инстаграм истакна дека ова не е прв пат некој да му се заканува на претседателот Вучиќ и членовите на неговото семејство на социјалните мрежи, додавајќи дека тоа обично се случува во ситуации кога Србија е нападната и однадвор и од внатре, а претседателот на Србија дава натчовечки отпор и му ја кажува на народот вистината за се што се случува.

„Во атмосферата на линч создадена од разни интересни групи и опозицијата, свесни дека немаат што да добијат од изборите, ваквите монструозни закани можат да бидат поттик за некое чудовиште да помисли да го пренесе напишаното на социјалните мрежи во реалниот живот“, рече Вучевиќ, осврнувајќи се на заканите упатени на социјалните мрежи на српскиот претседател.

Вучевиќ додаде дека очекува надлежните државни органи итно да реагираат за да се откријат и санкционираат оние кои повикуваат на убиство на претседателот и неговото семејство.

Тој нагласи дека е неприфатливо некој да користи насилство и закани во борбата против легално и легитимно избран претседател и постојано да промовира насилство како средство за доаѓање на власт, а, како што вели, лицемерно да се залага за цивилизирано и демократско општество во кое власта се добива и губи на избори, а не со атентат на претседателот.

„Мојата порака до сите насилници, нивните истомисленици, финансиери, спонзори и други болни умови е дека сме порешителни од кога било да ја зачуваме нашата Србија и да го браниме нејзиниот уставен и правен поредок. Нема сила што ќе не спречи уште посилно да ја браниме волјата на народот, а народот јасно кажа дека сака да биде предводен од Александар Вучиќ затоа што тој е гарант за сигурна иднина затоа што гради модерна, силна и слободна Србија“, рече Вучевиќ.

Тој додаде дека тоа е она што најмногу им пречи на хејтерите, дека Александар Вучиќ е најсилната бариера за сите странски и домашни обиди Србија да се врати во времето кога беше слаба, сиромашна и угнетена.

Вучевиќ истакна дека очекува, покрај јасниот одговор од државните органи на смртните закани кон претседателот на Републиката, дополнително да се подигне нивото на будност на целата јавност, нагласувајќи дека секоја закана за Александар Вучиќ е закана и за Србија, нејзината стабилност и нејзината иднина.

„Нема да ја победите Србија“, нагласи Вучевиќ.

Синоќа при гостувањето на српскиот претседател Александар Вучиќ во емисија, на социјалната мрежа Х беа објавени брутални закани кон претседателот на Србија, неговото семејство и претседателката на Собранието, Ана Брнабиќ.

Американскиот претседател Доналд Трамп инсистираше на тоа дека Украинецот Володимир Зеленски ќе биде вклучен во какви било мировни преговори за ставање крај на војната со Русија, а исто така рече дека може да се сретне со рускиот лидер Владимир Путин „многу наскоро“.

„Нема одредено време, но тоа би можело да биде многу наскоро“, им рече Трамп на новинарите во Air Force One на прашањето за потенцијален состанок со Путин, најверојатно во Саудиска Арабија.

„Мислам дека тој сака да ја заврши војната и тие и двајцата сакаат брзо да ја завршат“, рече тој. „Зеленски исто така сака да стави крај.

Подоцна во Флорида – каде Трамп го гледаше Дејтон 500 им рече на новинарите дека Зеленски „ќе биде вклучен“ во мировните преговори поради некои стравувања дека Вашингтон ќе склучи договор со Русија што може да ги заобиколи Киев и Европа.

Блумберг, повикувајќи се на неименувани официјални лица, вчера објави дека Трамп сака да обезбеди примирје до Велигден.

Коментарите дојдоа додека клучните американски лидери се подготвуваа за разговори со Русија во Саудиска Арабија во наредните денови, предводени од државниот секретар Марко Рубио.

Ќе учествуваат и блискоисточниот преговарач Стив Виткоф и советникот за национална безбедност Мајк Волц, соопшти Белата куќа.

„Се надеваме дека ќе постигнеме навистина добар напредок“, изјави Виткоф за „Фокс њуз“.

Трамп им рече на новинарите дека неговиот тим имал „долги и тешки“ разговори со руски официјални лица и дека Виткоф неодамна разговарал со Путин три часа.

Во изјава за Си-Би-Ес, Рубио, кој пристигна во Израел на 15 февруари по учеството на Минхенската безбедносна конференција, рече дека наредните денови ќе одредат дали Путин е сериозен за мирот во Украина.

До рано утринава остана нејасно прашањето кој ќе биде вклучен во разговорите во Саудиска Арабија или кога би можеле да се одржат.

Кит Келог, специјалниот пратеник на Трамп за Украина и Русија, предизвика контроверзии кога рече дека Европа можеби нема да биде „на маса“ доколку САД посредуваат во преговорите за ставање крај на руско-украинската војна.

Ова ги зголеми стравувањата во ЕУ и во Киев дека тие би можеле да бидат исклучени од одлуките во врска со потенцијалниот договор.

Сепак, Келог рече дека Европа нема да биде исклучена од процесот на донесување одлуки – дури и ако не е „на маса“ – и дека Украина ќе има свое место во преговорите, иако Киев рече дека не биле поканети на разговорите во Саудиска Арабија.

Зеленски пристигна на Блискиот Исток на 16 февруари, но Киев рече дека неговата посета на Обединетите Арапски Емирати, Саудиска Арабија и Турција има за цел зајакнување на економските врски и дека нема планови за средби со американски или руски претставници.

Михаило Подољак, висок советник на Зеленски, рече дека „нема преговарач кој ќе ја претставува Украина во Саудиска Арабија“ во мировните преговори.

„Денеска нема ништо на преговарачката маса за што може да се разговара. Русија не е подготвена за преговори“, изјави тој за украинската телевизија.

Претходно, Зеленски рече дека нема да учествува во преговорите пред да се сретне со сојузниците, вклучително и европските лидери, за да се развие стратегија.

„Никогаш нема да прифатам какви било одлуки меѓу САД и Русија за Украина, никогаш“, изјави Зеленски за NBC на маргините на Минхенската безбедносна конференција.

Здравствената состојба на папата Франциско (88), кој пред два дена поради бронхитис беше примен во римската болница „Агостино Гемели“, е стабилна и тој добро одмараше во текот на ноќта, соопшти денеска Ватикан.

„Клиничката состојба на папата е стабилна, а терапевтскиот дијагностички процес пропишан од медицинскиот персонал продолжува. Тој утрово ја прими евхаристијата и ја следеше светата миса на телевизија“, се вели во соопштението на Ватикан, пренесено од АНСА.

Папата беше примен во римската болница Гемели во петокот откако се влоши нападот на бронхитис.

Тоа е негова четврта хоспитализација од неговиот избор за папа во 2013 година и покрена прашања за неговото сè понесигурно здравје.

Лекарите потврдија дека папата има инфекција на респираторниот тракт и му препишаа „апсолутен одмор“ заедно со неодредена терапија со лекови.