Свет
Блинкен побара од Кина, Турција и од Саудиска Арабија да го одвратат Иран да го нападне Израел

Американскиот државен секретар Ентони Блинкен телефонски разговара со министрите за надворешни работи на Кина, Турција и на Саудиска Арабија и побара од нив да го искористат своето влијание врз Иран и да го одвратат официјален Техеран од потенцијален напад врз Израел.
„Секретарот Блинкен имаше низа повици до странски колеги, вклучително и турскиот министер за надворешни работи, Хакан Фидан, кинескиот министер за надворешни работи, Ванг Ји, и министерот за надворешни работи на Саудиска Арабија, Фајсал бин Фархан, на кои јасно им стави до знаење дека ескалацијата не е во ничиј интерес и дека земјите треба да го одвратат Иран од ескалација“, рече Милер на брифингот со новинарите.
Тој додаде дека американските претставници претходните денови разговарале со европските партнери и ги повикале да испратат јасна порака до Иран дека „ескалацијата не е во интерес на Иран, регионот и светот“.
Претходно оваа недела, „Блумберг“, повикувајќи се на неименувани извори, објави дека САД и нивните сојузници веруваат дека иранскиот напад врз Израел е неизбежен.
Потенцијален напад, со употреба на ракети со висока прецизност, наводно би можел да се случи во наредните денови, наведуваат изворите на „Блумберг“ додавајќи дека прашање е само кога Иран директно или индиректно ќе го нападне Израел, а не дали ќе го нападне.
Веста за ова подоцна ја објави „Ројтерс“.
Односите меѓу Израел и Иран станаа позатегнати по избувнувањето на конфликтот меѓу Израел и Хамас на 7 октомври минатата година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Свет
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.
Свет
Повеќе од 40 повредени во масовниот руски напад врз Киев, меѓу оние кои починаа има и дете

Украина соопшти дека најмалку четири лица се убиени, а 13 други се ранети во главниот град Киев за време на голем руски напад врз земјата во текот на ноќта.
„Според ажурираните податоци, досега 13 лица се повредени (вклучувајќи едно дете) и четворица починаа (вклучувајќи едно дете) како резултат на нападот врз Киев“, изјави Тимур Ткаченко, началник на Воената администрација на градот Киев, на Телеграм.
Ткаченко додаде дека е предизвикана штета на неколку станбени и нестанбени згради во областите Дарницки, Свјатошински, Соломијански, Холосиевски и Днепровски, вклучувајќи го и кардиолошкиот институт. Гувернерот на регионот Киев, Микола Калашник, изјави дека најмалку 28 лица, меѓу кои и три деца, се повредени во регионот околу главниот град.
„Четири лица се хоспитализирани во регионалните болници, тројца возрасни и едно дете. Сите се хоспитализирани во умерено сериозна состојба“, додаде Калашник.
Украинските воздухопловни сили тврдат дека воздушната одбрана соборила 568 од 595 дронови, како и 43 од 48 различни видови ракети лансирани од Русија преку ноќ, а главна цел бил Киев.