Свет
Блинкен побара од Кина, Турција и од Саудиска Арабија да го одвратат Иран да го нападне Израел

Американскиот државен секретар Ентони Блинкен телефонски разговара со министрите за надворешни работи на Кина, Турција и на Саудиска Арабија и побара од нив да го искористат своето влијание врз Иран и да го одвратат официјален Техеран од потенцијален напад врз Израел.
„Секретарот Блинкен имаше низа повици до странски колеги, вклучително и турскиот министер за надворешни работи, Хакан Фидан, кинескиот министер за надворешни работи, Ванг Ји, и министерот за надворешни работи на Саудиска Арабија, Фајсал бин Фархан, на кои јасно им стави до знаење дека ескалацијата не е во ничиј интерес и дека земјите треба да го одвратат Иран од ескалација“, рече Милер на брифингот со новинарите.
Тој додаде дека американските претставници претходните денови разговарале со европските партнери и ги повикале да испратат јасна порака до Иран дека „ескалацијата не е во интерес на Иран, регионот и светот“.
Претходно оваа недела, „Блумберг“, повикувајќи се на неименувани извори, објави дека САД и нивните сојузници веруваат дека иранскиот напад врз Израел е неизбежен.
Потенцијален напад, со употреба на ракети со висока прецизност, наводно би можел да се случи во наредните денови, наведуваат изворите на „Блумберг“ додавајќи дека прашање е само кога Иран директно или индиректно ќе го нападне Израел, а не дали ќе го нападне.
Веста за ова подоцна ја објави „Ројтерс“.
Односите меѓу Израел и Иран станаа позатегнати по избувнувањето на конфликтот меѓу Израел и Хамас на 7 октомври минатата година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин вели дека денес ќе разговара со Трамп

Рускиот претседател, Владимир Путин, денес изјави дека подоцна во текот на денот ќе разговара со својот американски колега Доналд Трамп.
Ова ќе биде шестиот јавно познат разговор меѓу двајцата лидери откако Трамп се врати во Белата куќа во јануари, а ќе се одржи во услови на досега неуспешни напори на Соединетите Американски Држави да преговараат за прекин на огнот во Украина.
Двајцата претседатели последен пат разговараа на 14 јуни, а главната тема на нивниот разговор беше Иран.
Европа
Украина припаѓа на Европската Унија, му рече данската премиерка на Зеленски

Претседателот на Украина, Володимир Зеленски, пристигна во Орхус, западна Данска, каде што ќе присуствува на одбележувањето на почетокот на данското претседателство со Советот на Европската Унија.
Според најавата на данската влада, Зеленски ќе разговара со премиерката Мете Фредериксен, претседателката на Комисијата, Урсула фон дер Лајен, и со претседателот на Европскиот совет, Антонио Коста.
Тие ќе разговараат за поголема воена поддршка за Украина, соработка со украинската одбранбена индустрија и нови санкции против Русија.
„Украина припаѓа на Европската Унија, тоа е во интерес и на Данска и на Европа. Затоа данското претседателство ќе направи сè што може за да ѝ помогне на Украина на патот кон членство во ЕУ“, рече Фредериксен.
Данската премиерка истакнува дека ЕУ мора да ја зајакне Украина и да ја ослаби Русија.
„Украина е клучна за безбедноста на Европа. Мора да го зголемиме притисокот врз Русија“, рече Фредериксен.
Свет
Песков: Крајот на специјалната воена операција во Украина ќе биде поблиску доколку пристигнува помалку оружје од Западот

Крајот на војната во Украина ќе зависи од количината западно оружје што ќе го добие Киев, изјави Дмитриј Песков, портпаролот на рускиот претседател, додавајќи дека Русија внимателно ја следи ситуацијата во врска со снабдувањето на Украина со оружје и дека забележува одредени проблеми.
„Колку помалку ракети пристигнуваат во Украина од странство, толку е поблиску крајот на специјалната воена операција“, истакна Песков.
Претходно, како што објави „РИА новости“, порталот „Политико“ пишуваше за привременото запирање на испораките на муниција и оружје од САД за Украина поради исцрпувањето на американските резерви.
Заменик-портпаролката на Белата куќа, Ана Кели, потврди за Ен-би-си дека имало прекин во испораките наведувајќи дека одлуката е донесена за да се заштитат интересите на Америка како приоритет.
Исто така, републиканскиот конгресмен и член на Комитетот за разузнавање на Претставничкиот дом, Брајан Фицпатрик, побара итен брифинг од Белата куќа и од Пентагон во врска со прекинот на воените испораки на Киев.
Коментирајќи ги овие наводи, Песков изјави дека „се чини оти американската индустрија не успева да произведе доволен број ракети, особено затоа што големи количини беа испорачани во Израел и во Украина, а испораките сè уште се во тек“ додавајќи дека Русија внимателно ја следи ситуацијата, пренесува „Танјуг“.