Свет
Бомбаш самоубиец уби три деца во напад врз воен училиштен автобус во Пакистан

Пет лица загинаа, меѓу кои најмалку три деца, во самоубиствен напад врз воен училиштен автобус во немирната пакистанска покраина Белуџистан, соопшти војската, а Пакистан ги обвини групите за кои тврди дека се поддржани од Индија.
40-ина ученици биле во автобусот што се упатувал кон военото училиште, а неколку од нив се повредени, изјави Јасир Икбал, администратор на округот Хуздар, каде што се случил инцидентот.
Во соопштението пакистанската војска и премиерот Шебаз Шариф го осудија насилството и ги обвинија терористичките посредници од Индија за вмешаност во нападот. Тие не понудија докази што го поврзуваат нападот со Њу Делхи.
Индиската влада не одговори веднаш на барањето за коментар.
Во нападот загинаа најмалку три деца и двајца возрасни, соопшти војската. Тензиите меѓу двата нуклеарно вооружени соседа остануваат високи по согласувањето на прекин на огнот на 10 мај, а за кој дипломатите предупредија дека е кревок. Прекинот на огнот беше договорен по најинтензивната воена акција во последните децении во конфликт за кој аналитичарите и официјалните лица стравуваа дека би можел да излезе од контрола.
Двете земји се обвинуваат меѓусебно за поддршка на милитантни групи на територијата на соседната земја, што двете земји го негираат.
Најновата воена ескалација, за време на која двете земји разменија ракетен оган, се случи кога Индија го обвини Пакистан за поддршка на милитантите, кои нападнаа десетици туристи во индискиот дел од спорниот регион Кашмир.
Исламабад негира вмешаност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.