Европа
Британскиот принц Вилијам оствари ненајавена посета на полско-украинската граница: Поддршка за народот на Украина
Британскиот принц Вилијам вчера ненајавено пристигна во Полска, каде што се сретна со британските и полските војници стационирани во близина на украинско-полската граница, јавува Си-ен-ен.
Вилијам, се додава, ја пофалил нивната „соработка во поддршката на народот на Украина“.
Принцот од Велс најпрвин ја посети базата на територијалните одбранбени сили на 3. бригада во Жешов, каде што се сретна со полскиот министер за одбрана, Мариуш Блашчак. Тој ја посети и изложбата на воена опрема.
40-годишниот принц потоа се сретна со членовите на британските вооружени сили за да дознае повеќе за тоа како тие соработуваат со своите полски колеги во операциите за поддршка на Украина.
„Нашите народи имаат силни врски. Со нашата соработка за поддршка на народот на Украина и неговата слобода, кои се наши и ваши слободи, овие врски дополнително се зајакнуваат“, рече престолонаследникот.
„Тука сум затоа што сакам лично да им се заблагодарам на полските и на британските војници, кои работат во блиско и клучно партнерство. Исто така, сакам да му оддадам почит на полскиот народ за инспиративната хуманост. Ги отворивте вашите срца колку и домовите“, продолжи тој.
Ова е прво патување на Вилијам во Полска од 2017 година.
По ненадејната посета на војниците, Вилијам отпатува за Варшава, каде што посети притворен центар, „за да го види од прва рака хуманитарниот одговор и колку е витална поддршката што заедниците во Полска им ја даваат на Украинците што бегаат од војната“.
Повеќе од осум милиони Украинци избегаа во соседните земји од почетокот на војната. Најмалку 1,5 милион украински бегалци остануваат во Полска, според владините процени.
Британското кралско семејство беше невообичаено отворено за војната во текот на изминатата година нудејќи поддршка за Украина во многу ситуации.
„Светот со ужас гледаше на сите непотребни страдања што им беа нанесени на Украинците“, рече кралот Чарлс III минатиот месец во пораката по повод една година од руската инвазија.
„Можам само да се надевам дека изливот на солидарност од целиот свет ќе донесе не само практична помош туку и сила да се знае дека сме обединети заедно.
Чарлс претходно му ја потврди својата поддршка директно на украинскиот претседател Володимир Зеленски кога двајцата се сретнаа во Бакингемската палата на почетокот на февруари, пренесе „Денес.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.