Рускиот министер за надворешни работи Сергеј Лавров денеска, според објавените изјави, кажа дека не гледа објективни знаци дека Украина или Западот се подготвени за мировни преговори и покрај се погласните изјави за потребата од такви преговори, пренесува Ројтерс.

„И покрај се погласните разговори за потребата од мировни преговори, објективно нема практични дејства што би укажале дека Киев и Западот се навистина подготвени за нив“, рече Лавров, според транскриптот од прашањата и одговорите што ги доби од новинарите, објавен на официјалната веб-страница на неговото министерство.

„Напротив, продолжуваат западните воени испораки на украинските вооружени сили, ѝ се поставуваат ултиматуми на Русија, постои (украинска) законска забрана за преговори, а не се решава прашањето за легитимноста на украинските власти“, додаде тој.

Рускиот претседател Владимир Путин во декември изјави дека Русија нема услови за почеток на преговори со Украина и е подготвена да преговара со секого, вклучително и со украинскиот претседател Володимир Зеленски.

Но, тој рече дека Зеленски, чиј мандат требаше да истече минатата година, но беше продолжен поради воената состојба, ќе мора да биде реизбран за Москва да го смета за легитимен потписник на кој било договор, со што ќе се обезбеди неговата правна важност.

Киев тврди дека не станува збор за легитимноста на Зеленски и дека руските изјави на оваа тема се дизајнирани да го поткопаат неговиот авторитет.

Генералниот секретар на НАТО, Марк Руте, денеска на панел во рамките на Светскиот економски форум во Давос изјави дека американскиот претседател Доналд Трамп е во право и дека Европа троши премалку за одбрана.

„Тој (Трамп) е во право дека проблемот не е во САД. Проблемот е Европа. Делумно поради него, го видовме ова подобрување во однос на трошењето на европската страна на НАТО. Проблем број еден е што ние сè уште не сме на два процента од БДП во одвојувањето за одбрана“, рече Руте на панелот „Украински појадок“.

Како друг проблем тој посочи дека „два процента не се ни приближно доволни“. НАТО претходно постави цел да троши 2 отсто од БДП за одбрана, а Трамп неодамна изјави дека земјите од НАТО треба да потрошат 5 отсто од домашниот бруто-производ.

Некои официјални лица и аналитичари веруваат дека предлогот на Трамп од пет проценти е намерно висок за да почнат преговорите и очекуваат договорот да биде околу три проценти. „Сега сме безбедни, но НАТО нема да може колективно да се брани за четири или пет години ако останеме на два отсто“, истакна Руте.

Тој додаде дека неговиот претходник Јенс Столтенберг почнал процес, кој ќе заврши во мај или јуни оваа година, „до кога ќе одлучиме што точно ни треба во однос на капацитетот“.

„Сите (земји членки) што не се на 2 процента мора да достигнат 2 процента во следните неколку месеци. Не можеме повеќе да чекаме, а потоа мораме колективно да го засилиме. Ќе одлучиме за точниот број подоцна оваа година, но тој ќе биде значително поголем од 2“, најави Руте.

Вооружените сили на Русија синоќа извршија ракетен напад врз украинскиот град Запорожје, изјави Иван Федоров, шеф на регионалната администрација. Според него, во градот се случиле четири експлозии, а во нападот биле погодени и станбени згради, пренесува „Медуза“.

Во рускиот напад загина 47-годишен маж, а повредени се 45 лица, меѓу кои и едно двомесечно бебе, според УНН. Меѓу повредените има и четворица вработени во Државната служба за итни случаи на Украина.

Шефот на регионалната администрација објави фотографии и видеа на кои се гледаат последиците од ракетниот напад. Во описот на видеото Федоров напиша: „Вака изгледа куќа погодена од руски проектил“.

At night, the Russian army launched missile and drone attacks on Zaporizhzhia, targeting residential areas and infrastructure. As of now, one person has been reported killed as a result of this terror. 26 others were injured, including a two-month-old baby.

During the second… pic.twitter.com/RpbdIbBT1K

— Volodymyr Zelenskyy / Володимир Зеленський (@ZelenskyyUa) January 23, 2025