Семејствата на двете австралиски тинејџерки кои починаа од сомнително труење со метанол во Лаос, ја коментираа веста дека осум лица се приведени за време на полициската истрага за случајот.

Бјанка Џонс и Холи Боулс, и двете 19-годишни, беа меѓу шесте странски туристи кои загинаа откако наводно консумирале токсична супстанција која често се додава во шверцуваниот алкохол.

Останатите четири жртви беа идентификувани како Симон Вајт, 28-годишна адвокатка од Обединетото Кралство; Џејмс Луис Хатсон, 57-годишен Американец; и Ен-Софи Оркилд Којман (20) и Фреја Венервалд Соренсен (21) од Данска. Хатсон беше пронајден мртов во неговата соба во хостелот на 13 ноември, со неколку празни чаши во близина. Истото утро, Ен-Софи Оркилд Којман и Фреја Венервалд Соренсен исто така беа пронајдени во несвест во нивните соби и итно пренесени во локалната болница.

Телата на Австралијките беа вратени во Мелбурн во вторникот вечерта, во придружба на нивните семејства.

„Ужасно ни недостасуваат нашите ќерки. Ми олесна кога знам дека има напредок во Лаос – не можеме да дозволиме нашите девојки да умираат и трагедии како оваа продолжуваат да се случуваат“, рече Марк Џонс, таткото на Бјанка Џонс, пред новинарите.

Говорејќи на аеродромот во Мелбурн, Џонс ја повика владата на Лаос да „продолжи да истражува“, додавајќи дека семејствата ќе се обидат „да ја подигнат свеста за опасностите од труење со метанол“.

Приведени се осум лица, а се работи за вработени во хостелот „Нана Бакекерс“ каде што биле сместени сите жртви, јавуваат локалните медиуми. Сопствениците на хостелот, кој сега е затворен, претходно ги негираа тврдењата дека служеле нелегален алкохол.

Непосредно пред планираниот почеток на прекин на огнот во војната против либанската милиција Хезболах, израелската војска денеска објави дека убила уште еден висок член на палестинската милитантна организација Хамас во Појасот Газа.

Израелските воздухопловни сили „прецизно го погодија“ Мумин ал-Џабари, кој го опиша како искусен терорист во снајперската единица на Хамас, кој оперирал во просторија на зграда што порано била училиште, објавија рано утрово израелските одбранбени сили (ИДФ) на својот Телеграм канал.

Информациите од израелската армија не можеа независно да се проверат, пренесува Дпа. Договорот меѓу Израел и Хезболах, кој треба да започне во среда наутро, не вклучува никакви одредби за прекин на огнот со Хамас во Газа.

ИДФ соопшти дека Ал Џабари складирал „големо количество оружје во просторијата каде што дејствувал“. Во август, израелската армија ја нападна зградата, која се користеше како активно засолниште, елиминирајќи повеќе од 30 „терористи на Хамас и Исламски џихад“.

Израел соопшти дека презел голем број мерки за намалување на ризикот за цивилите пред нападот.

Од почетокот на војната во Појасот Газа, која избувна откако Хамас го нападна Израел во октомври 2023 година, Хезболах започна напади против Израел во поддршка на Хамас. Израел одговори со воздушни напади врз Либан и копнена инвазија.

Прекинот на огнот меѓу Израел и Хезболах стапи на сила во 4 часот по локално време, откако беше прифатен од двете страни со посредство на САД и Франција

Египетските спасувачи пронајдоа четири тела и пет преживеани вчера, за време на потрагата во Црвеното Море, еден ден откако потона туристички брод со 44 луѓе.

Досега се спасени вкупно 33 лица, но потрагата по седум исчезнати лица се уште трае, соопштено е во вторникот вечерта.

Идентитетот на жртвите се уште не е официјално објавен. Според Би-би-си, меѓу исчезнатите се и двајца британски државјани.

Современиот брод со четири палуби превезувал 31 патник и 13 членови на екипажот кога се верувало дека бил погоден од голем бран во близина на Марс Алам, поради што се превртел.

Повикот за помош бил испратен во 5:30 часот по локално време (3:30 по Гринич), потврдија локалните власти.

Според гувернерот на регионот на Црвеното Море, генерал Амар Ханафи, бродот потонал за пет до седум минути, а некои луѓе не можеле да излезат од своите кабини.

Спасувањето започнало веднаш по несреќата. Вкупно 28 лица беа спасени од армијата и еден туристички брод што минуваше во првите часови по несреќата.

Гувернерот исто така изјави дека други преживеани биле пронајдени во областа Вади ел-Гемал.

Според информациите од локалните власти, екипажот на бродот бил од Египет, додека патниците биле од Белгија, Велика Британија, Кина, Финска, Германија, Ирска, Полска, Словачка, Шпанија, Швајцарија и САД.