Ревизијата на ЦИА откри недостатоци во подготовката на проценката на американското разузнавање дека рускиот претседател Владимир Путин се обидел да влијае на претседателските избори во САД во 2016 година во корист на Доналд Трамп, но не го оспори тој заклучок.

Ревизијата „не го оспорува квалитетот или кредибилитетот“ на строго доверливиот извештај на ЦИА на кој се потпирале авторите на проценката за да дојдат до тој заклучок, соопшти денес ЦИА.

Но, ревизијата ја доведува во прашање „високата доверба“ во тој заклучок, како што е оценета од ЦИА и ФБИ. Наместо тоа, на заклучокот требало да му се даде оценка „умерена доверба“ што му ја дала Националната агенција за безбедност (НСА).

Трамп ја отфрли проценката на разузнавањето, објавена во јануари 2017 година. По состанокот со Путин во ноември 2017 година, тој рече дека верува оти Путин не се мешал во изборите.

Директорот на ЦИА, Џон Ратклиф, поранешен конгресмен кој беше директор на националното разузнавање за време на првиот мандат на Трамп, нареди преглед и на делот „научени лекции“ „за да се промовира аналитичка објективност и транспарентност“, соопшти ЦИА.

Дирекцијата за анализа на ЦИА, која ја спроведе ревизијата, „идентификуваше повеќе процедурални аномалии“ во подготовката на класифицираната проценка за руското мешање во изборите во декември 2016 година.

Меѓу нив беа „екстремно тесниот временски рок… и прекумерната вклученост на раководителите на агенцијата“, што „доведе до отстапувања од стандардните практики во подготовката, координацијата и прегледот“ на извештајот, се вели во неа.

„Овие отстапувања ја спречија ригорозната примена на експертизата, особено за најспорната оценка на проценката“.

Сепак, ревизијата не ја поништи проценката дека Путин користел дезинформации и сајбер кампања за да влијае на изборите во 2016 година во корист на Трамп.

Одборот на Сенатот за разузнавање дојде до истиот заклучок во извештајот од 2018 година.

Светската здравствена организација (СЗО) вчера ги повика земјите да ги зголемат цените на алкохолот, тутунот и безалкохолните пијалоци за 50 проценти во следните десет години преку даноци за да помогнат во борбата против хроничните болести.

СЗО истакна дека ова ќе помогне да се намали потрошувачката на овие производи, кои придонесуваат за болести како што се дијабетес и некои видови рак, и да се соберат пари во време кога помошта за развој се намалува, а јавниот долг расте.

„Даноците за здравство се едни од најефикасните алатки што ги имаме“, рече помошникот генерален директор на СЗО за промоција на здравјето и превенција и контрола на болести, Џереми Фарар.

„Време е да се дејствува“, додаде тој.

СЗО започна иницијатива наречена „3 до 35“ на Конференцијата на ОН за финансирање на развојот во Севиља. Иницијативата би можела да собере 1 трилион американски долари до 2035 година.

СЗО со децении ги поддржува даноците на тутунот и зголемувањето на цените, а во последниве години повикува на даноци на алкохолот и безалкохолните пијалоци, но ова е прв пат да предложи специфични зголемувања на цените за сите три производи.

Генералниот директор на СЗО, Тедрос Аданом Гебрејесус, на конференцијата изјави дека даноците би можеле да им помогнат на владите „да се прилагодат на новата реалност“ и да ги зајакнат своите здравствени системи со зголемени приходи. Речиси 140 земји веќе ги зголемија даноците и цените на тутунот за просечно повеќе од 50 проценти од 2012 до 2022 година, забележа СЗО.

СЗО разгледува други даночни препораки, вклучително и оние за ултра-преработена храна, и ја финализира дефиницијата за тој вид храна во наредните месеци. Иницијативата е поддржана од Bloomberg Philanthropies, Светската банка (СБ) и OECD и вклучува поддршка за земјите кои сакаат да дејствуваат.

Силен топлински бран го погоди големиот дел од Европа, при што досега се пријавени осум смртни случаи — четворица во Шпанија, двојца во Франција и двојца во Италија. Стотици лица се хоспитализирани, а температурите достигнаа и до 40°C во некои региони.

Во Шпанија, шумски пожари предизвикаа загуби на животи и штети на земјоделски површини. Во Франција, министерството за здравство предупредува на висок ризик особено за ранливите групи, а земјата е поделена поради дебатата за потребата од климатизација во јавните објекти. Крајно десничарскиот политичар Марин Ле Пен ја користи кризата за кампања, додека владата ја критикува таквата политика како штетна за климата.

Поради топлинскиот бран, некои региони се соочуваат и со опасност од силни невремиња, додека еден од нуклеарните реактори во Швајцарија беше привремено исклучен поради високите температури на водата за ладење.

Економски анализи предупредуваат дека екстремните температури може да го забават економскиот раст во Европа, додека научниците потенцираат дека климатските промени се главен фактор зад овие екстреми.