Свет
(Видео) Бездомник среде бел ден се обиде да киднапира тригодишно девојче во Њујорк, го спасиле минувачи

Тригодишно девојче речиси беше киднапирано среде бел ден од бездомник во населбата Бронкс во Њујорк, пишува „Дејли мејл“.
Шокантниот настан е снимен од надзорна камера, а на видеото се гледа како скитникот им приоѓа на деца и киднапира девојче што шетало со својата баба и двајцата браќа.
Бабата веднаш почна да трча по човекот што го зеде девојчето, а другите две деца останаа со ужас да гледаат што се случува.
За среќа, во близина имало неколку храбри минувачи, кои виделе што се случило. Човек што полнел гориво на бензинска пумпа во близина го исплашил киднаперот, па тој го пуштил детето и побегнал со скутер.
„Само ја чистев улицата кога помина таа жена со трите деца. Одеднаш им пријде маж, фрли ќебе над девојчето и избега со неа во рацете. Потоа неколкумина од нас се вклучија и киднаперот го ослободи детето“, изјавил Фермин Брасеро (63), кој исто така се нашол на местото на настанот.
Набргу по инцидентот, полицијата го пронашла 27-годишниот бездомник Сантијаго Салсед како спие покрај врата. Тој е уапсен и обвинет за киднапирање, обид за киднапирање и загрозување на безбедноста на децата.
Овој, за среќа, неуспешен обид за киднапирање е дел од севкупното зголемување на насилните злосторства извршени од бездомници имајќи предвид дека нивниот број во Њујорк се зголеми за 103 проценти во изминатата деценија и продолжи да расте поради кризата предизвикана од коронавирусот.
Во последните неколку години бројот на бездомници во Њујорк ги надмина податоците од времето на големата депресија во 30-тите години, објави хуманитарната организација „Колик“ за бездомниците од Њујорк. Во август 2021 година 47.979 бездомници, вклучувајќи 14.881 деца, спиеле во засолништата за бездомници во градот Њујорк.
Коалицијата за бездомници предупредува дека овие податоци се однесуваат само на бездомниците во засолништата, а вкупниот број бездомници што лутаат по улиците и подземната железница на градот воопшто не е познат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нетанјаху: Наредив веднаш да почнат преговори за ослободување на заложниците

Премиерот на Израел, Бенјамин Нетанјаху, изјави дека дал инструкции веднаш да започнат преговори со цел ослободување на сите заложници во Газа, додека истовремено се работи на одобрување на владин план за преземање контрола над градот Газа.
Во кратка видео-порака снимена во делот на Газа под контрола на јужната команда на израелската војска, Нетанјаху не наведе кому му дал наредба и избегна да коментира дали Израел ќе го прифати предлогот за ослободување на заложниците во фази, кој Хамас го прифати во понеделникот, пренесува „Тајмс оф Израел“.
„Се наоѓаме во фаза на одлучувачка победа. Денес дојдов во Газа за да ги одобрам плановите кои ми ги претставија израелските одбранбени сили (ИДФ) за преземање контрола над градот Газа и пораз на Хамас“, порача Нетанјаху.
Премиерот додаде дека дал инструкции за моментално започнување на преговорите за ослободување на сите заложници и завршување на војната под услови прифатливи за Израел.
„Двете работи, пораз на Хамас и ослободување на сите заложници, одат заедно“, истакна Нетанјаху, додавајќи дека високо ја цени мобилизацијата на резервистите и редовната војска за оваа мисија од витално значење.
Семејствата на заложниците ги одбија овие тврдења, укажувајќи дека Хамас не ослободи ниту еден заложник откако Израел во март се откажа од претходниот предлог за спогодба за заложници. Тие исто така сметаат дека понатамошното ширење на воените операции во градот Газа, каде се верува дека се задржани дел од заложниците, ќе ги изложи нивните најблиски на ризик, пренесува „Тајмс оф Израел“.
Свет
Британски гејмер бил сведок на убиство на пријателка од Финска додека играл онлајн игра

Британски гејмер бил сведок на страшно злосторство кога неговата онлајн пријателка (32) била смртно избодена во својот дом во Финска, а тој оддалечен повеќе од 1500 километри слушал без можност да спречи. Нападот се случил додека двајцата играле видео игра, јавува „Сан“.
Според полицискиот извештај, непознатиот Британец играл онлајн со пријателката околу 22 часот кога изненадно слушнал звук од скршен прозорец. Во паника ја прашал дали ги заклучила вратите, но веднаш потоа слушнал како убиецот на фински разговара со жртвата.
Британецот, немоќен да помогне, на 23 април во 5 часот наутро локално време, испратил е-пошта до финската полиција. Полицијата следниот ден го пронашла безживотното тело на жената во дневната соба и веднаш започнала истрага.
Истражувањето покажало бизарен ред на настани. По бруталното убиство, убиецот се упатил педесетина километри северно до градот Јува и запалил штала. Сосед го забележал пожарот и излегол надвор, а десетина минути подоцна бил сведок на страшна глетка– маж со рацете раширени излегол од изгорениот објект. Итната помош брзо стигнала и го пренела во болница, но мажот починал од тешките изгореници.
Криминалистичката инспекторка Марфа Раипела изјавила дека извршителот не бил познат на полицијата и дека случајот не се третира како терористички чин. Утврдено е дека ден претходно се преселил од својот дом во Иматра до Пумалу, каде што немал договорена средба со никого. Мотивот за ова дело останува непознат.
Полицијата верува дека жртвата била случајно избрана, поради тоа што нејзината куќа била лесно достапна и единствена со вклучено светло во тој момент. Со оглед на тоа што единствениот осомничен починал, случајот е официјално затворен.
Свет
Лавров: Распоредувањето европски војници во Украина е неприфатливо

Рускиот претседател Владимир Путин е подготвен да се сретне со украинскиот претседател Володимир Зеленски, но прво мора да се решат некои прашања, вклучувајќи го и тоа дали украинскиот лидер има легитимитет за потпишување договор, изјави денес рускиот шеф на дипломатијата Сергеј Лавров.
Путин и американскиот претседател Доналд Трамп се сретнаа минатата петок на Аљаска на првиот руско-американски самит во повеќе од четири години, и двајцата лидери разговараа за тоа како да се заврши војната во Украина.
На прашањето на новинарите дали Путин е подготвен да се сретне со Зеленски, Лавров рече дека рускиот претседател повеќепати изјавил дека е подготвен да се сретнат.
„Нашиот претседател повеќепати изјави дека е подготвен да се сретне, вклучително и со Зеленски. Но, сите прашања кои бараат разгледување на највисоко ниво мора да бидат добро разработени, а стручњаците и министрите ќе подготват соодветни препораки.“
Лавров рече дека пред потпишување на идните договори треба да се „реши прашањето за легитимитетот на лицето кое ги потпишува тие договори од украинската страна“.
Путин повеќепати го изразил сомнежот во легитимитетот на Зеленски затоа што неговиот мандат требаше да заврши во мај 2024 година, но поради војната не беа одржани нови претседателски избори. Киев тврди дека Зеленски и понатаму е легитимен претседател.
Руски официјални лица велат дека се загрижени дека евентуален иден претседател, ако Зеленски потпише договор, би можел да го оспори тој документ со образложение дека мандатот на Зеленски технички е завршен.
Лавров исто така ги обвини европските лидери дека се обидуваат да го поткопаат напредокот постигнат на минатонеделниот самит САД-Русија на Аљаска за можен мировен договор во Украина.
Европските сојузници на Киев, според Русија, се обидуваат да го свртат вниманието од решавањето „на основните причини“ за војната, рече тој.
Тој повтори дека Русија е загрижена за начинот на кој се води европската дискусија за безбедносните гаранции за Украина без учество на Москва.
Лавров рече дека распоредувањето европски воен контингент во Украина би било неприфатливо за Москва.
„Странска интервенција на дел од украинската територија (…) би била целосно неприфатлива за Русија“, рече Лавров по разговорот со индискиот колега во Москва.
Лавров ја обвини Украина дека не сака праведно и трајно решение на конфликтот.