Свет
(Видео) Убиена озлогласената шефица на најмоќниот мексикански картел

Озлогласената шефица на најмоќниот мексикански картел, Марија Гвадалупе Лопез Ескивел (21), попозната под именто La Catrina, убиена е во престрелка со војската во Мексико, пренесуваат мексиканските медиуми цитирани од „Дејли мејл“.
Заедно со уште седум члена на картелот таа ги нападнала војската, националната гарда и полицијата во Михоакан, а починала во болница од последици од ранување, а „Дејли мејл“ објави и видео од последните мигови на девојката која ја нарекувале и Дамата на смртта.
Во видеото се гледа ранетата La Catrina и мексикански војник кој ѝ вели да издржи додека не дојде хеликоптерот. Било невозможно да ја префрлат во болница на друг начин зашто членовите на бандата ги затвориле патиштата, па војската морала да побара воздушна поддршка.
Мексиканскте власти објавија дека во акцијата е убиена шефицата на наркокартелот и дека се уапсени уште шест члена на картелот, а запленети се и сандаци муниција и оружје.
Според непотврдени информации, La Catrina се сретнала со уште еден шеф на огранок на наркокартелот, по што ги нападнале војската и полицијата. Ранетата La Catrina била префрлена во болница со хеликоптер, но повредите ѝ биле претешки. Еден од куршумите ја погодил во вратот.
Иако мексиканските власти не објавија дека убиената е Марија Лопез Ескивел, на објавените фотографии и снимки се гледа жена која на ногата има тетоважа „Катрина”. Мексиканските власти се сомневаат дека Марија Лопез Ескивел била дел од групата која лани во октомври масакрираше 13 полицајци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан вели дека светот е побезбедно место по средбата меѓу Трамп и Путин

Светот е побезбедно место по средбата меѓу американскиот претседател Доналд Трамп и неговиот руски колега Владимир Путин во Алјаска, изјави денеска унгарскиот премиер Виктор Орбан.
„Со години гледавме како двете најголеми нуклеарни сили ја елиминираат рамката на нивната соработка и си испраќаат пораки едни на други“, напиша Орбан на Фејсбук.
Тој додаде дека сега таа практика е завршена.
„Светот денеска е побезбедно место отколку што беше вчера“, рече Орбан.
Светските лидери денес реагираа на самитот меѓу американскиот и рускиот претседател Доналд Трамп и Владимир Путин, а како што објавија медиумите, реакциите беа поделени – некои го критикуваа недостатокот на конкретни резултати, додека други ја нагласија важноста на самиот дијалог.
Свет
Русија во текот на ноќта лансираше 85 беспилотни летала кон Украина

Русија во текот на ноќта лансираше 85 беспилотни летала и една балистичка ракета кон територијата на Украина, објавија утринава украинските воздухопловни сили.
Нападите во текот на ноќта беа насочени кон области на линијата на фронтот во регионите Суми, Доњецк, Чернигов и Дњепропетровск, објавија воздухопловните сили на каналот Телеграм.
Оттаму, исто така, наведуваат дека нивните единици за противвоздушна одбрана уништиле 61 беспилотно летало.
Главниот штаб на украинските вооружени сили објави во својот дневен утрински извештај дека во текот на изминатите 24 часа на линијата на фронтот имало 139 судири со непријателот.
Од друга страна, руските системи за противвоздушна одбрана во текот на ноќта пресретнале и уништиле 29 украински дронови над различни руски региони, вклучувајќи 10 беспилотни летала над Ростовскиот регион, објавија утринава руските медиуми, повикувајќи се на руското Министерство за одбрана.
Американскиот претседател Доналд Трамп и неговиот руски колега Владимир Путин, по нивната вчерашна средба во Алјаска, не споменаа ништо за потенцијален прекин на огнот во војната во Украина.
Свет
Зеленски во понеделник ќе отпатува за Вашингтон на разговори со Трамп

Украинскиот претседател Володимир Зеленски во понеделник ќе отпатува за Вашингтон на разговори со американскиот претседател Доналд Трамп, објави Зеленски на Телеграм по денешниот телефонски разговор со Трамп, јави ДПА.
Зеленски рече дека претходно телчефонски разговарал со Трамп повеќе од час и половина, откако американскиот претседател синоќа се сретна со рускиот лидер Владимир Путин во Алјаска.
„Во понеделник ќе разговараме за сите детали во врска со завршувањето на убиствата и војната“, рече Зеленски, додавајќи дека е „благодарен за поканата“