Американскиот претседател Доналд Трамп, по средбата со Владимир Путин во Алјаска, изјави дека сака „директно да оди кон мировен договор“, наместо кон прекин на огнот, по што би следеле преговори за крај на војната. Тоа е изјава која, како што пишува „Би-би-си“ во анализа на ситуацијата, звучи зачудувачко, но во исто време го одразува светот во кој живее Трамп.

За време на изборната кампања, Трамп рече дека војната во Украина ќе заврши за еден ден. Потоа ја смени во 100 дена, потсетува BBC.

Трамп е горд што ја напишал книгата „Уметноста на договорот“, но мирот во оваа област не е само договор меѓу двете страни. Тоа е регион каде што се испреплетени историските спорови и длабоко вкоренетите непријателства.

Како и во сите преговори од оваа сложеност, договор може да се постигне само ако двете страни покажат подготвеност да направат отстапки. А во моментов тоа не е случај, според Би-Би-Си.

За Киев, не станува збор само за територија, туку и за суверенитет. Путин постојано повторува дека не ја гледа Украина како вистинска земја, туку како дел од Русија, се додава.

Украинскиот претседател Володимир Зеленски го отфрли предлогот на Владимир Путин Украина да се повлече од Донецк и Луганск како дел од мировниот план поддржан од Доналд Трамп, објави Ројтерс. Зеленски јасно рече дека таква опција не е можна.

По средбата со рускиот претседател Владимир Путин во Алјаска, Трамп разговараше со Зеленски повеќе од час и половина. Лидерите на НАТО и европските земји се придружија на поканата.

Според извор запознаен со разговорот, Трамп му рекол на Зеленски дека Путин е подготвен да престане да се бори на други фронтови ако Украина се повлече од истокот на земјата. Зеленски одби, нагласувајќи дека нема повлекување од Донбас.

„Фајненшл тајмс“ претходно денес објави дека на самитот со Трамп, Путин побарал Украина да се повлече од регионот Донецк во замена за замрзнување на фронтот во регионите Херсон и Запорожје. Потоа „Њујорк тајмс“ објави дека Трамп го поддржува планот и верува дека мирот може брзо да се постигне ако Украина се согласи да го предаде остатокот од Донбас, вклучително и областите што не се заземени од руските сили.

Трамп и Зеленски треба да се сретнат во понеделник во Белата куќа, а поканети се и европски лидери, иако сè уште не е јасно кој од нив ќе одговори.

Зеленски јасно ја отфрли можноста за повлекување од Донбас и минатата недела. „Ако денес се повлечеме од Донбас – од нашите утврдувања, од теренот и височините што ги држиме, очигледно ќе им го отвориме патот на Русите за нова офанзива“, рече украинскиот претседател.

Таквиот план би бил спротивен и на предупредувањата од европските лидери дека секој мировен договор мора да го почитува територијалниот интегритет на Украина и принципот дека меѓународните граници не можат да се менуваат со сила. Таквиот предлог би барал и одобрение од украинскиот парламент.

Претседателот на САД, Доналд Трамп, поддржува план за завршување на војната, според кој Украина би отстапила дел од својата територија на Русија, вклучувајќи ги и областите што не се под руска окупација, пишува „Њујорк Тајмс“, повикувајќи се на двајца високи европски функционери.

Според весникот, по средбата со Владимир Путин, Трамп им рекол на европските лидери дека верува оти мирот може брзо да се постигне доколку Зеленски се согласи да го предаде остатокот од Донбас на Русија, вклучувајќи ги и оние области што руските сили не ги окупирале. Во замена, тврди „Њујорк Тајмс“, Путин би се согласил на прекин на огнот по сегашните борбени линии и би дал писмено ветување дека нема да ја нападне Украина или другите европски земји.

Донбас вклучува два источноукраински региони: Донецк и Луганск. Од почетокот на војната, Русите го окупираа речиси целиот Луганск и околу 70% од Донецк, додека 30% сè уште го држат Украинците.

Трамп ќе го разговара планот со Володимир Зеленски во понеделник во Белата куќа, а на состанокот се поканети и европски лидери.