Иран вчера соопшти дека е отворен за индиректни преговори со Соединетите Американски Држави откога претседателот Доналд Трамп побара преговори за нов нуклеарен договор. „Патот е отворен за индиректни преговори“, изјави иранскиот министер за надворешни работи, Абас Арагчи, отфрлајќи ја можноста за директни разговори „додека не дојде до промена во пристапот на другата страна кон Исламската Република“, пишува „Економик тајмс“.

Највисокиот ирански дипломат рече дека Техеран нема да се вклучи во директни разговори со Вашингтон под закана и сѐ додека Трамп ја одржува својата политика за максимален притисок.

Според оваа политика во неговиот прв мандат како претседател, Трамп во 2018 година ги повлече САД од клучниот договор за иранската нуклеарна програма и повторно воведе осакатувачки санкции кон Техеран. Договорот, потпишан во 2015 година меѓу Техеран и западните сили, бара од Иран да ги ограничи своите нуклеарни амбиции во замена за укинување на санкциите.

Западните земји, вклучително и САД, долго време го обвинуваат Иран за нуклеарно оружје, што Техеран го негира инсистирајќи дека неговите активности за збогатување се чисто за мирољубиви цели. Претходно овој месец, на 7 март, Трамп рече дека напишал писмо до иранскиот врховен водач, ајатолахот Али Хамнеи, повикувајќи на разговори за нуклеарните амбиции и предупредувајќи за можна воена акција доколку Техеран одбие.

Писмото беше доставено до Техеран на 12 март преку советникот на претседателот на ОАЕ, Анвар Гаргаш, објави тогаш иранската новинска агенција „Фарс“.

Во петокот Хамнеи рече дека американските закани нема да ги одведат никаде предупредувајќи на реципрочни мерки ако направат нешто злонамерно против Иран. Арагчи во четвртокот рече дека писмото на Трамп е повеќе закана, но додаде дека тоа исто така може да отвори некои можности и дека Техеран набргу ќе одговори.

Американскиот пратеник за Блискиот Исток, Стивен Виткоф, во интервју објавено во петокот рече дека целта на Трамп е да избегне воен конфликт преку градење доверба со Иран. Тој инсистира на тоа дека писмото не било наменето како закана.

Техеран и Вашингтон ги прекинаа дипломатските односи откога Иранската исламска револуција во 1979 година го собори шахот поддржан од Западот. Оттогаш швајцарската амбасада во Техеран ја олесни комуникацијата меѓу двете нации.

Белорускиот претседател Александар Лукашенко изјави денеска дека трупите на НАТО се на прагот на Белорусија и дека Западот прави сѐ што може за да ја вовлече земјата во конфликт.

„Ескалацијата околу нас само се засилува. Војниците на НАТО се на прагот на нашиот дом и прават сѐ за да ја вовлечат Белорусија во конфликтот“, изјави Лукашенко по церемонијата на инаугурација во Палатата на независноста во Минск, пренесува „РИА новости“.

Претседателските избори во Белорусија се одржаа на 26 јануари, а според податоците на Централната изборна комисија на Републиката, Лукашенко, кој седми пат беше избран на највисоката државна функција, доби рекордни 86,82 отсто од гласовите.

Сообраќаен полицаец од Канзас пронашол и спасил шестгодишно девојче кое било киднапирано еден месец претходно, а двајцата мажи со кои била биле уапсени од полицијата, соопштија властите.

Службеникот го запрел теренецот поради сообраќаен прекршок и открил дека дека сопатникот има налог надвор од друга држава за киднапирање на шестгодишно девојче кое еден месец претходно било пријавено за исчезнато.

Полицаецот во возилото видел мало девојче кое во автомобилот било со мажи на возраст од шеесет години. По проверка, тој открил дека возачот имал досие во кое имало убиство и бројни прекршоци со оружје. Полицаецот со помош на заменик на локалниот шериф ги приведе и двајцата и безбедно го извади девојчето од возилото, соопшти сообраќајната патрола.

„Ова шестгодишно девојче на полицаецот му дало лажно име и датум на раѓање, откако било подучено од возрасни да го стори тоа за да ги задржи надвор од затвор“, соопшти полицијата. „На крајот, нашиот офицер успеа да го смири и да го убеди да му го каже нејзиното вистинско име.

Според властите, девојчето е идентификувано како жртва на киднапирање, која била во бегство со осомничениот повеќе од еден месец. Шестгодишното девојче не е повредено.

Патролата за автопат во Канзас изјави за Fox News Digital дека во овој момент не можат да дадат дополнителни информации за да се заштити идентитетот на детето и истрагата.