Свет
(Видео) Невреме со обилни врнежи од снег и мраз предизвика хаос во Америка
Силна зимска бура ги погоди централниот и североисточниот дел на САД, проследена со обилни врнежи од снег и мраз.
Невремето предизвика колапс во сообраќајот и доведе до затворање училишта во неколку американски држави, а илјадници луѓе останаа без струја.
Предупредувањата за зимска и ледена бура се во сила во поголемиот дел од Америка, од Тексас до Среден Запад и Нова Англија, соопшти Националната метеоролошка служба.
Повеќе од 100 милиони жители во најмалку 25 држави се предупредени за временските непогоди.
Снегот, според најавата на метеоролозите, ќе биде проследен со ветрови до 56 километри на час, што би можело значително да ја намали видливоста на патиштата, пренесуваат тамошните медиуми.
Невремето предизвика хаос и во авиосообраќајот. До средината на денот повеќе од 4.000 лета беа откажани, според веб-страницата „Флајтавер“. Само на аеродромот во Далас, Тексас, откажани се околу 2.000 лета.
Делови од Тексас, Арканзас, Кентаки и Тенеси беа погодени од опасна ледена бура. На некои места може да се формира повеќе од еден сантиметар мраз, што може да доведе до прекин на електричната енергија и опасни услови на патиштата, предупреди метеоролошката служба.
Сè ќе замрзне во текот на ноќта поради што постои можност на патиштата да има тенки слоеви мраз, што е многу тешко забележливо“, објави Секретаријатот за сообраќај на државата Арканзас на „Твитер“ .
Повеќе од 220.000 дома и продавници во Тексас, Арканзас, Мисисипи и Тенеси се без струја.
Училишните области во неколку држави, вклучително и Тексас, Мичиген и Охајо, ги откажаа часовите во четвртокот.
Поради невремето, температурите на повеќе места во наредните денови ќе бидат екстремно ниски – понекогаш и до 6 степени под просекот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Разговараме за договор што обезбедува силни гаранции за безбедноста на Украина
САД соопштија дека ѝ понудиле на Украина силни безбедносни гаранции слични на оние од НАТО, а Вашингтон изрази увереност дека Русија ќе ги прифати. САД го опишаа потегот како потенцијален пробив во напорите за завршување на војната, објави „АФП“.
Американските претставници ги опишаа часовите разговори во Берлин со претседателот Володимир Зеленски како позитивни и рекоа дека претседателот Доналд Трамп ќе оствари телефонски разговори подоцна на 15 декември и со украинскиот лидер и со европските партнери за да го унапредат договорот.
Во исто време, американските претставници нагласија дека Украина исто така мора да го прифати договорот, за кој велат дека ќе обезбеди безбедносни гаранции во согласност со Член 5 на НАТО – принципот на колективна одбрана, според кој нападот врз еден сојузник се смета за напад врз сите.
„Основата на овој договор е во суштина да обезбеди навистина, навистина силни гаранции – слични на Член 5 – како и многу силно одвраќање преку обемот на украинските вооружени сили“, рече американски функционер, зборувајќи под услов на анонимност.
„Овие гаранции нема да бидат на маса засекогаш. Тие се на маса токму сега, ако се постигне заклучок на правилен начин“, додаде тој.
Трамп претходно ја отфрли можноста Украина формално да се приклучи на НАТО, идентификувајќи ги аспирациите на Киев за членство во алијансата како една од причините за инвазијата на Москва во 2022 година.
Сепак, друг американски функционер изрази увереност дека Русија ќе го поддржи предложениот договор.
„Мислам дека Украинците, како и Европејците, би ви кажале дека ова е најробусниот пакет безбедносни гаранции што некогаш го виделе. Ова е исклучително силен пакет“, рече вториот претставник.
„Се надевам дека Русите ќе го разгледаат и ќе речат: „Ова е прифатливо бидејќи немаме намера – им веруваме на збор – да го прекршиме“. Но, ако има прекршувања, тие ќе бидат решени преку овој безбедносен пакет“, додаде тој.
Првиот американски функционер призна дека сè уште нема договор за прашањето за територијата. Трамп постојано изјавуваше дека Украина неизбежно ќе мора да отстапи територија на Русија, исход што е неприфатлив за Зеленски по речиси четири години одбрана на земјата.
Истиот извор посочи дека САД разговарале со Зеленски за идејата за создавање „економска слободна зона“ во областите што моментално се предмет на воен спор.
„Поминавме многу време дефинирајќи што би значело тоа и како би функционирало. На крајот, ако можеме да го разјасниме тоа, тогаш од страните ќе зависи да ги решат конечните прашања поврзани со суверенитетот“, рече тој.
Разговорите во Берлин ги водеа Стив Виткоф – деловниот партнер на Трамп и патувачки глобален преговарач – и Џаред Кушнер, зет на американскиот претседател.
Свет
(Видео) Украина: Погодивме руска подморница со подводни дронови
Украинската Служба за безбедност (СБУ) објави снимка за која тврди дека прикажува напад врз руска подморница од класата 636.3 „Варшавјанка“ во пристаништето Новоросијск. Според СБУ, станува збор за прв напад изведен со подводни дронови „Sub Sea Baby“, при што подморницата претрпела критични оштетувања и е оневозможена за понатамошна употреба.
Погодената подморница, која НАТО ја класифицира како класа „Кило“, е вооружена со лансери за крстосувачки ракети „Калибр“, што руските сили ги користат за напади врз Украина.
СБУ наведува дека операцијата е заедничка акција на 13. Главна управа на воената контраразузнавачка служба и украинската Морнарица.
Подморниците од класата „Варшавјанка“ се проценуваат на околу 400 милиони долари, а поради санкциите, изградбата на нова би можела да чини и до 500 милиони долари. Оваа класа е позната и како „Црна дупка“, поради способноста да апсорбира звук и тешко да се открие.
Фото: Unplash
Свет
Нови детали за убиството на режисерот Роб Рајнер и сопругата: синот уапсен, истрагата во тек
Славниот холивудски режисер Роб Рајнер и неговата сопруга Мишел Сингер се пронајдени мртви во нивниот дом во Лос Анџелес, а нивниот син Ник Рајнер е уапсен, соопштија американските власти.
Според полициски извори, 78-годишниот Рајнер и неговата 68-годишна сопруга биле избодени до смрт во домот во населбата Брентвуд, пренесува Еј-Би-Си Њуз. Полицијата била повикана на местото на настанот во 15:40 часот по локално време, а случајот се води како убиство.
Нивниот 32-годишен син Ник Рајнер е уапсен и задржан со кауција од 4 милиони долари, соопшти канцеларијата на шерифот на округот Лос Анџелес. Засега не се објавени деталите за обвиненијата.
„Со длабока тага ја објавуваме трагичната смрт на Мишел и Роб Рајнер. Скршени сме од овој ненадеен губиток и молиме за приватност“, соопшти семејството.
Соседи изјавиле дека пред куќата по пристигнувањето на полицијата биле забележани и актерите Били Кристал и Лери Дејвид.
Во интервју за списанието Пипл од 2016 година, Ник Рајнер јавно зборувал за својата долгогодишна борба со зависност од дрога, која започнала во тинејџерските години и довела до период во кој живеел како бездомник. Подоцна изјавил дека таа животна фаза била инспирација за полуавтобиографскиот филм „Being Charlie“, чиј коавтор е.
Роб Рајнер, роден во 1947 година во Њујорк, ја започнал кариерата како актер, а светска слава стекнал како режисер на култни филмови како „Остани со мене“, „Принцезата невеста“, „Кога Хари ја запозна Сали“, „Мизери“. Во текот на кариерата бил повеќекратно номиниран за Златен глобус.

