Свет
(Видео) Работниците бараа повисоки плати за 2 долара пред куќата на Џеф Безос
 
																								
												
												
											Актуелни и поранешни работници на американскиот гигант за онлајн шопинг „Амазон“ и активисти за работнички права организираа мал протест пред вилата на основачот на „Амазон“ и извршен директор Џеф Безос, вреден 165 милиони долари, во Беверли Хилс, Калифорнија.
Тие бараа повисоки плати за работниците во „Амазон“, подобри бенефиции и построга заштита при работа во магацините на компанијата, пред сè од инфекција со коронавирус.
Стотици поранешни работници и активисти дојдоа во раскошниот имот што Безос го купи на почетокот на оваа година од познатиот основач на издавачката куќа „Гефен Рекордс“ и филмското студио „Дрим Воркс“, Дејвид Гефен.
Here at Will Rogers Memorial Park, where labor activists have gathered (thread)
— Eric Levai (@ericlevai) October 4, 2020
Протестот го организираше здружението „Конгрес на работниците од суштинско значење“, основан од поранешен работник во „Амазон“, Кристијан Смолс, кој беше отпуштен во март откако зборуваше против условите за работа и организираше протести пред магацин на Стејтн Ајленд, каде што работел.
Иако „Амазон“ тврди дека тој е отпуштен бидејќи со протестот ги прекршил нивните мерки за карантин, сепак, внатрешен документ, кој во меѓувреме се појави во јавноста, а кој го напишал адвокатот на компанијата, Дејвид Заполски го опишува Смолс како црнец кој „не е паметен ниту добро артикулира“. Во документот се препорачува Смолс да биде главна цел на борбата на „Амазон“ против синдикалната организација на нејзините работници.
Демонстрантите го извикуваа името на Безос и паролите „без правда нема мир“ и „ако не го добиеме, ја затворивме (компанијата)“. Во говорот на протестот, Смолс ги повика луѓето да ја откажат претплатата на услугата за стриминг на „Амазон прајм“ во знак на солидарност со работниците.
„Не ви треба Џеф Безос. Ние му требаме на него. Ние го направивме најбогатиот човек на светот”, им рече Смолс на работниците.
Барањата на демонстрантите вклучуваат бесплатна грижа за децата на работниците, здравствено осигурување и удели за работниците, минимална плата од 30 долари на час и затворање на магацините каде што избувна инфекцијата со Ковид-19.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Свет
Дипломатите на Европската Унија лути на Мерц поради Украина
 
														Дипломатите на Европската Унија сметаат дека статијата на германскиот канцелар Фридрих Мерц во „Фајненшл тајмс“ сериозно го отежнала обезбедувањето заеми за Украина од средства од замрзнати руски средства, објавува „Еурактив“.
Според публикацијата, Европската Унија се обидела итно да обезбеди нов кредитен пакет за Киев, но процесот бил блокиран откако Мерц јавно ја презентирал својата иницијатива. „Поради статијата на Мерц во „Фајненшл тајмс“ минатиот месец, ситуацијата почнала да се развива во неочекуван правец уште од самиот почеток“, се наведува во статијата, повикувајќи се на изјавите на европските дипломати.
Еден од изворите на „Еурактив“ проценил дека прашањето за користење на руски средства требало да се реши дискретно, зад затворени врати, а не јавно, како што направил германскиот канцелар.
На 25 септември, Мерц презентираше предлог во британскиот весник „Фајненшл тајмс“ за развој на механизам со кој на Украина ќе ѝ биде доделен заем од 140 милијарди евра, финансиран од замрзнати руски средства. Според неговата идеја, тој заем би бил вратен само кога Русија ќе ја надомести штетата на Украина, додека средствата би останале блокирани сè додека Европскиот совет не донесе поинаква одлука.
Сепак, како што е оценето во дипломатските кругови, оваа иницијатива не само што предизвика поделба меѓу членовите, туку и го отежна постигнувањето консензус за нов финансиски пакет за Киев.
Фото: принтскрин
Свет
Калас: ЕУ разгледува опции за помош на Меѓународниот кривичен суд
 
														Високата претставничка на Европската унија за надворешна политика и безбедност, Каја Калас, денес изјави дека постои тековен „напад врз меѓународниот правен поредок“ и дека ЕУ разгледува опции за помош на Меѓународниот кривичен суд (МКС).
„Постои широк напад врз меѓународниот правен поредок, човековите права, меѓународно договорените норми и институциите воспоставени за нивно спроведување. ЕУ има долга и силна политика на поддршка на МКС, но таа има и свои недостатоци“, рече Калас за време на нејзиниот говор на Колеџот на Европа во белгискиот град Бриж, пренесува Ројтерс.
Таа истакна дека сите земји од ЕУ се членки на МКС, но дека една од овие земји го започнала процесот на напуштање.
„Една земја-членка ја објави својата намера да се повлече од МКС, но сите земји-членки се правно обврзани со одлуките донесени од Европскиот совет, вклучително и поддршката на МКС во случај на напуштање на судот“, рече таа, осврнувајќи се на Унгарија, пренесува Танјуг.
Калас изјави дека се бараат механизми за судска помош во рамките на ЕУ.
„Во Брисел, моментално ги разгледуваме сите достапни опции, вклучително и конкретни мерки за ублажување, за да продолжиме да го поддржуваме МКС“, рече Калас.
Фото: принтскрин
Свет
Полицијата во САД откри сериски убиец по 20 години
 
														По речиси 20 години, полицијата во американската држава Висконсин верува дека конечно ја решила мистеријата за исчезнувањето и убиството на 21-годишната самохрана мајка Деидре Харм. Властите го именуваа Кристофер Ревак, поранешен болничар кој изврши самоубиство во 2009 година и кој е поврзан со најмалку два други случаи на исчезнати жени, објави Unilad.
Деидре Харм исчезна на 10 јуни 2006 година, откако излегла од бар во Висконсин Рапидс. Пет месеци подоцна, ловци ги пронајдоа нејзините останки во блиската пошумена област. Оваа недела, канцеларијата на шерифот на округот Вуд објави дека истрагата за нејзината смрт е официјално затворена.
Окружниот обвинител Џонатан Е. Барнет, во писмо до шерифот Шон Бекер, рече дека би поднел обвинение против Кристофер Е. Ревак доколку тој беше сè уште жив. „Го сметам овој случај за завршен. Верувам дека ќе имав доволно докази за да поднесам обвинение и, доколку Ревак беше сè уште жив, да добијам судење“, додаде тој.
Ревак, кој си го одзеде животот во затвор во Мисури во 2009 година, беше обвинет за убиство на друга жена, 36-годишната мајка на три деца Рене Вилијамс. Таа исчезна во 2007 година откако ја заврши смената во бар каде што Ревак наводно бил виден таа ноќ, но нејзиното тело никогаш не било пронајдено.
Шерифот на Мисури Крис Дегасе, кој го истражуваше случајот Вилијамс, го потврди сомневањето за Фокс њуз диџитал. „Кога почнав да работам на случајот на Кристофер Ревак, тој беше мој осомничен за убиството на Рене Вилијамс и не мислев дека му е прв пат“, рече тој.
Името на Ревак се појави и во истрагата за исчезнувањето на водителката на вести Џоди Хајзентруит во Мејсон Сити, Ајова, во 1995 година. Таа исчезна на пат кон работа, оставајќи зад себе само чевли со високи потпетици и свиткан клуч од автомобилот. Иако беше законски прогласена за мртва во 2001 година, нејзиното тело никогаш не беше пронајдено, а полицијата тогаш немаше докази што го поврзуваат Ревак со случајот.
Информациите што го поврзуваат Ревак со убиството на Деидре Харм фрлаат нова, вознемирувачка светлина врз сите случаи. „Изгледа како да се работи за сериски убиец“, рече шерифот Дегасе. „Во текот на денот, како болничар, тој им помагаше на луѓето и ги спасуваше, но Крис Ревак имаше и темна страна“, додаде тој.
За семејството на Џоди Хајзентруит, потрагата по вистината не е завршена. „Вистинскиот мир ќе дојде само кога Џоди ќе биде пронајдена и правдата ќе биде задоволена“, рекоа тие. Награда од 50.000 долари сè уште се нуди за информации што би можеле да доведат до решение за нејзиното исчезнување.


 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											