Според тврдењата на официјална Москва, рускиот претседател Владимир Путин синоќа се појавил на полноќната велигденска литургија во катедралата Христос Спасител во руската престолнина. Путин е виден сам или во друштво на московскиот градоначалник Сергеј Собјанин, одблиску, со свеќа во рацете, а Кремљ ја пренесе официјалната изјава на претседателот.

„ Овој голем празник ги обединува православните христијани, сите граѓани на Русија кои го слават Христовото воскресение, околу високите морални идеали и вредности, кај луѓето ги буди најсветлите чувства, вербата во триумфот на животот, добрината и правдата“ – посочи Путин.

? RUSSIAN PROPAGANDA FAKE: Easter on Russian State TV. Putin was too much of a coward to be present in the church during the actual event. Pre-recorded footage of him added in, and quite poorly. He is missing next to the painting of a crown on a red table on the wall. pic.twitter.com/udLKxKeuov

— Igor Sushko (@igorsushko) April 24, 2022

Сепак, на социјалните мрежи кружат видеа на кои се тврди дека го разоткриваат најновиот бизарен пропаганден трик на Кремљ. Според тие снимки, Путин или воопшто не бил на литургијата или стоел настрана за време на богослужбата, целосно изолиран од сите, на место оддалечено десетици метри од другите верници и што е најважно, далеку од местото каде што е прикажан во официјалното видео.

На првото, официјално видео на московските државни медиуми, Путин јасно се гледа на снимката од литургијата, но внимателно око ќе забележи дека секој пат е во кадар исклучиво или сам или во друштво на градоначалникот на Москва Сергеј Собјанин. Во еден момент Путин јасно може да се види како стои со свеќа во рацете, пред пиедестал со круна и се крсти.

Меѓутоа, во следниот кадар од официјалното видео, на кое се прикажува самата богослужба, додека камерата го снима патријархот Кирил како го извршува обредот, во позадина е местото каде што стои Путин во претходниот кадар – пред пиедесталот со круната – но рускиот претседател го нема никаде! Дури и Собјанин е на негово место од претходниот кадар, но од Путин нема ни трага ни глас.

И за крај, следува третото видео кое го прикажува просторот на целата црква и кое наводно целосно го разобличува заговорот на Кремљ! На него јасно се гледаат Путин и Собјанин како стојат на истите места каде што официјалниот Кремљ ги прикажал – пред пиедесталот со круната, а во еден момент јасно се гледа дека воопшто нема луѓе околу нив. Освен двајцата членови на обезбедувањето кои стојат на пристојна дистанца, во позадина се гледаат само луѓе кои или чекаат да започне литургијата или се назначени за статисти.

Ова не е првпат да се појават теории на заговор за контактите на Путин со луѓето. Од почетокот на пандемијата, имаше неколку извештаи дека рускиот претседател е целосно изолиран во својата резиденција од сите негови соработници, дека на секој контакт со него му претходат детални проверки и недели карантин, а секоја средба со Путин се одржува исклучиво со видео повик. За време на неговите ретки јавни настапи, Путин често беше виден во жолт заштитен костим кој повеќе потсетува на опрема за космонаути, а теориите на заговор кулминираа кога беа прикажани снимки од средбите на Путин со соработниците, седејќи сам, далеку од сите, на голема, долга маса. Потоа се појави веста дека Путин е во параноичен страв од короната, а од почетокот на инвазијата на Украина на тој страв, наводно, додал и фобија од труење.