Свет
(Видео) Скандал во најава: Франција негира дека Макрон се извинил за инцидентот со израелските полицајци
Франција негира дека претседателот Емануел Макрон испратил извинување до израелската полиција демантирајќи ја изјавата од полицијата дека Макрон се извинил што им викал на полицајците на влезот од црквата „Света Ана“, која е под администрација на француската влада, пренесува „Спутник“.
„Немаше претседателско извинување за израелските безбедносни сили“, рекоа неименувани официјални лица од Елисејската палата за „Хаарец“.
По пристигнувањето во Ерусалим во средата за да присуствува на комеморацискиот настан за холокаустот, Макрон предизвика вербален инцидент со израелските полицајци кои го придружуваа на турата низ стариот град, што очигледно беше дипломатски гаф, констатираат светските агенции.
Официјалните лица разјаснија дека инцидентот во средата, во кој Макрон скокна во одбрана на француските службеници за безбедност и им се развика на израелските полицајци назначени да го штитат, се заснова на добро воспоставени дипломатски правила.
„’Света Ана’ е француска национална надлежност во Ерусалим. Улогата на Франција е во овој град да ги заштитува овие места. Израелските безбедносни сили сакаа да влезат во неа додека безбедноста ја осигуруваше француското обезбедување. Претседателот реагира на расправијата меѓу израелските и француските безбедносни сили при влегувањето во ‘Света Ана’ за да му стави крај на тоа и да ги потсети на правилата“, објаснија официјалните лица.
Coup de colère de #Macron contre la police israélienne à Jérusalem. Dans les pas de Chirac en 1996 pic.twitter.com/DKP5ICThTK
— Ava Djamshidi (@AvaDjamshidi) January 22, 2020
Тие додадоа дека инцидентот не бил ништо сериозно.
Израелската полиција претходно објави изјава во која се тврди дека Макрон се извинил за инцидентот и се ракувал со безбедносните лица.
Вербалниот дуел на Макрон со израелската полиција стана хит на интернет кога дел од расправијата беше снимен од француски новинар. На видеото може да се чуе видно вознемирениот Макрон, кој бара неговата израелска придружба да излезе надвор повикувајќи ги да ги почитуваат правилата за кои рече дека важат со векови.
Сличен инцидент се случил и во 1996 година кога тогашниот француски претседател Жак Ширак побарал од вооружените израелски сили за безбедност да излезат од црквата „Света Ана“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
ЕК: Користењето на руски средства е законски
Лидерите на Европската Унија ја повторија својата поддршка за планот за заем од 140 милијарди евра за Украина врз основа на замрзнати руски средства.
Претседателката на Европската комисија, Урсула фон дер Лајен, изјави дека планот за користење на руски средства останува „законски“, додека ЕК изјави дека „целосно ќе го почитува меѓународното право“.
Сепак, фон дер Лајен призна дека техничките прашања треба да се решат за да се ублажат белгиските сомнежи за потенцијалните правни и финансиски ризици за Euroclear (група за инфраструктура на финансискиот пазар со седиште во Белгија, специјализирана во сегментот на централен депозитар за хартии од вредност), како и за стабилноста на Еврозоната, објави Euractiv.
Данската премиерка Мете Фредериксен нагласи дека „нема алтернатива на овој заем за репарации“.
„Навистина ми се допаѓа идејата Русија да плати за штетата што ја предизвика и изврши во Украина“, рече Фредериксен, чија земја моментално претседава со Советот на ЕУ.
Таа додаде дека е од суштинско значење лидерите на ЕУ да го усвојат планот на претстојниот самит во декември.
Во исто време, портпаролката на ЕК, Паула Пињо, за време на денешниот брифинг, нагласи дека Европската комисија целосно ќе го почитува меѓународното право во својот предлог за користење на руски средства за обезбедување заеми за Украина.
Белгија го држи најголемиот дел од замрзнатите руски средства, кои беа блокирани кратко по руската инвазија на Украина, и е особено претпазлива во однос на репутациските ризици за Euroclear доколку земјите од ЕУ не обезбедат гаранции за нивно враќање во Москва доколку санкциите против Русија одеднаш бидат укинати, објаснува бриселскиот портал.
Свет
Кина ги испраќа својот најмлад астронаут и четири глувци на вселенска мисија оваа недела
Кина ќе го испрати најмладиот астронаут во својата историја на вселенската станица како дел од својот следен лет со екипаж, соопштија властите во четврток, додавајќи дека таму ќе бидат и четири лабораториски глувци.
Вселенската станица Тјангонг, управувана од тимови со три астронаути кои ротираат на секои шест месеци, е круната на вселенската програма на Кина вредна милијарда долари, додека се обидува да ги стигне САД и Русија.
Мисијата Шенжоу-21 е закажана да полета во петок во 23:44 часот по локално време од Центарот за лансирање сателити Џиукван во северозападна Кина, изјави Џанг Џингбо, портпарол на Кинеската агенција за вселенски летала со екипаж (CMSA).
Инженерот на летот, Ву Феи, кој штотуку наполни 32 години, ќе стане најмладиот кинески астронаут кој летал во вселената, соопштија властите.
„Се чувствувам исклучително среќен“, им рече тој на новинарите во четврток. „Можноста да ги комбинирам моите лични соништа со славното патување на вселенската програма на Кина е најголемата среќа што ми ја донесе оваа ера.“
Надреден ќе му биде вселенскиот пилот Џанг Лу, 48, кој леташе на мисијата Шенжоу-15 пред повеќе од две години. Специјалистот за товар, Џанг Хонгџанг, 39, е третиот член на екипажот.
Патувањето ќе вклучува и четири лабораториски глувци – два мажјаци и две женки – за првите кинески експерименти со глодари во орбитата, изјави портпаролот на CMSA Џанг.
Командантот Џанг Лу рече дека е уверен дека неговиот тим „ќе ја заврши работата за татковината и нејзиниот народ со целосен успех“.
Вселенската програма на Пекинг, трета која во орбитата испраќа човечки екипаж, претходно слета роботски ровери на Марс и на Месечината.
За време на владеењето на претседателот Кси Џинпинг, Кина ги засили плановите за остварување на својот „вселенски сон“.
Пекинг вели дека планира да испрати мисија со екипаж на Месечината до 2030 година и планира да изгради база на површината на Месечината.
CMSA во четврток објави дека „цврсто се држи“ до таа цел. Во тек се голем број „клучни претстојни тестови“, вклучувајќи го и тестирањето на лунарниот модул Ланјуе и вселенското летало со екипаж Менгжу.
фото: принтскрин
Регион
Вучиќ во Узбекистан: Тука нè гледаат како Европејци, иако не сме во ЕУ
Претседателот на Србија, Александар Вучиќ, за време на посетата на Ташкент, изјави дека Узбекистан е „земја на иднината“ и нагласи дека Србија мора да се позиционира за соработка со земјите кои бележат брз економски раст, пренесува РТС.
„Најсилниот впечаток врз мене, а верувам и врз сите вас, останува огромниот напредок на Узбекистан – неверојатен напредок. Минатата година стапката на раст беше 6,5 проценти, а оваа година веројатно ќе биде уште поголема. Во првите три квартали веќе се достигнати 7,6 проценти“, рече Вучиќ, додавајќи дека ова е земја на млади, со оглед на тоа што 60 проценти од населението е под 30 години.
Тој најави дека се очекува посета на узбекистанскиот претседател Шавкат Мирзијоев во Белград на почетокот на 2026 година, кога треба да започне и стратешко партнерство.
„Ова ќе биде почеток на нашето стратешко партнерство. Ќе ги подготвиме најважните документи што ќе бидат основа за подобрување на соработката“, рече Вучиќ.
„Знам дека луѓето во Србија не се секогаш доволно заинтересирани за вакви теми, но ова е нашата иднина. Ова се земји кои растат неверојатно брзо и ние мора да ја позиционираме Србија тука“, нагласи тој.
Српската делегација беше особено импресионирана од паркот за информатичка технологија, за кој Вучиќ рече дека ги покажува огромните инвестиции на Узбекистан во знаење и развој. Она што, вели тој, особено го фасцинирало е напорната работа и дисциплината на неговите граѓани.
„За разлика од Европејците – а тие нè сметаат во Европа иако не сме дел од Европската Унија – тие не бараат да работат што е можно помалку и да бидат платени што е можно повеќе. Овие луѓе сакаат да работат што е можно повеќе, тие го имаат тоа „тигрово око“ и јасно гледаат дека со својата работа можат да нè надминат сите нас“, истакна српскиот претседател.
Тој додаде дека Србија, иако нема да биде лесно да го промени својот менталитет, може да учи од ваквите партнери и да ја искористи таа енергија во корист на своите граѓани. Како пример за добра пракса, тој го наведе узбекистанскиот модел на централизирани јавни набавки, кој донесе големи заштеди и кој Србија планира да го проучи.
фото: принтскрин

