Свет
(Видео) Судир меѓу полицијата и студентите на протестите во Иран

Иранската полиција во неделата се судри со студентите на еден од најпрестижните универзитети во земјата, објавија социјалните мрежи и државните медиуми.
Извештаите велат дека голем број студенти на Универзитетот „Шариф“ во Техеран биле заробени на паркингот во кампусот, објави Би-би-си.
На едно видео објавено на социјалните мрежи се гледа како студенти бегаат од безбедносните сили во кампусот на Универзитетот „Шариф“, а во далечината се слушаат звуци што потсетуваат на истрели, пренесува медиумот.
Students flee for their lives at Sharif University in Tehran!
Please do not give up on the people of Iran…they need you more than ever!
Please keep tweeting, posting, and retweeting! #MahsaAmini #ZhinaAmini pic.twitter.com/GCgtw0zvOT
— Yashar Ali ???? یاشار (@yashar) October 2, 2022
Телевизискиот канал „Иран интернешнл“ објави дека безбедносните сили нападнале студентски домови и отвориле оган.
Според извештаите, голем број луѓе се собрале пред главната капија на кампусот доцна вечерта кога слушнале за судирите.
Би-би-си јавува дека не е во можност да потврди што всушност се случило на универзитетот.
Антивладините протести избувнаа во Иран во септември по смртта на жената, која беше приведена од полицијата за морал.
Махса Амини (22) падна во кома неколку часа по апсењето од полицијата за морал поради наводно кршење на правилата за носење хиџаб.
Протестите почнаа по нејзиниот погреб, се проширија во целата земја и станаа најголемите немири видени во земјата во последните години, јавува Би-би-си.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија го нападна Киев – најмалку шест загинати, меѓу нив и шестгодишно дете

Најмалку шест лица беа убиени, а десетици ранети во руските ракетни и напади со беспилотни летала врз Киев во зори утрово, неколку часа пред клучното гласање во украинскиот парламент – Врховната рада, за укинување на контроверзниот закон против корупција.
„Ноќеска, непријателот го нападна главниот град со ракети и беспилотни летала. Една ракета погоди станбена зграда, од која еден дел беше уништен“, објави министерот за внатрешни работи Игор Клименко на Телеграм, осудувајќи го „најновото воено злосторство“.
Во тој напад беа погодени 27 локации во градот, најмалку шест лица ги загубија животите, а 52 беа ранети, објави шефот на воената администрација на Киев, Тимур Ткаченко.
„Службите за итни случаи досега потврдија шест смртни случаи. Меѓу загинатите има дете, шестгодишно момче“, објави Ткаченко на Телеграм.
Градоначалникот на Киев, Виталиј Кличко, објави дека прозорците на педијатриското одделение во болницата биле скршени поради силата на експлозиите, но дека никој не е повреден.
Руските сили ги засилија нападите врз Украина во последните денови, откако американскиот претседател Доналд Трамп му даде рок од 10 дена на својот руски колега Владимир Путин во вторникот да ги прекине нападите под закана од нови санкции.
По последниот бран напади врз украинската престолнина, се очекува членовите на парламентот да гласаат за поништување на законот со кој се укинува независноста на антикорупциските тела и кој наиде на силни критики и отпор од јавноста и Европската Унија. Пратениците ќе го искажат своето мислење за новиот закон, кој им враќа целосна автономија на антикорупциските тела.
Законот донесен на 22 јули, кој подоцна го потпиша претседателот Володимир Зеленски, предвидува ставање на Националната агенција за борба против корупцијата (НАБУ) и Специјализираното обвинителство за борба против корупцијата (САПО) под надлежност на Генералниот обвинител, кој го назначува самиот шеф на државата.
Соочен со жестоки критики од граѓанското општество и Европската унија, претседателот Зеленски на крајот предложи нов нацрт-закон за враќање на независноста на двете агенции, за кој Врховната рада ќе гласа денес.
Министерот за надворешни работи Андриј Сибиха доцна во среда објави дека се работи на измена на законот.
„Украина има силно граѓанско општество и активна младина. Тие го искажаа своето мислење, украинските власти ги слушнаа нивните гласови и гласовите на нашите партнери“, рече тој.
Тој оцени дека „прилагодувањата“ се неопходни за да се заштитат антикорупциските тела од политички игри, особено од „руските“.
Свет
Орбан: Го почитувам Зеленски, но мислам дека направи грешки

Унгарскиот премиер Виктор Орбан во интервју за полскиот телевизиски канал wPolsce24 изјави дека се обидува да се однесува со почит кон украинскиот претседател Володимир Зеленски.
Орбан го нарече конфликтот во Украина „војна меѓу Западот и Русија“. Тој верува дека војната нема да заврши без средба меѓу лидерите на двете спротивставени страни, американскиот претседател Доналд Трамп и рускиот претседател Владимир Путин.
Тој нагласи дека се води од принципот на почит во меѓународните односи, кој важи и за Украина и украинскиот претседател Володимир Зеленски.
„Украинците го избраа. Секогаш се обидувам да се однесувам правилно, што е неопходно ако сакате да имате добри односи со некого. Затоа го почитувам претседателот Зеленски, но мислам дека направи грешки“, додаде унгарскиот премиер.
Тој тврди дека една од тие грешки била отфрлањето на неговата понуда за мир минатата година.
„Зеленски потоа го отфрли моето мислење дека времето е на страната на Русија, но денес го имаме она што го имаме. Ситуацијата на претседателот Зеленски не е лесна. Многу е тешко да се обединат луѓето во безнадежна војна“, тврдеше Орбан.
Односите меѓу Киев и Будимпешта се напнати во последните месеци. Унгарија го блокира почетокот на преговорите за пристапување на Украина во Европската Унија. Покрај тоа, новиот нацрт-буџет на ЕУ предизвика негодување во Унгарија. Главниот проблем за Унгарците е што буџетот вклучува над 100 милијарди евра за Украина.
Свет
Канада најави дека ќе ја признае Палестина

Канада има намера да ја признае палестинската држава на состанокот на Обединетите нации во септември, изјави вчера премиерот Марк Карни, зголемувајќи го притисокот врз израелската влада на премиерот Бенјамин Нетанјаху, додека хуманитарната криза во Газа се влошува.
Карни им рече на новинарите дека планираниот потег се базира на посветеноста на Палестинската самоуправа да спроведе реформи, вклучително и сеопфатни промени во управувањето и одржување општи избори во 2026 година во кои Хамас „не може да има никаква улога“.
Канада долго време тврдеше дека ќе ја признае палестинската држава само по завршувањето на мировните преговори со Израел. Но, Карни рече дека реалноста на терен, вклучително и гладот на граѓаните во Газа, значи дека „перспективата за палестинска држава буквално исчезнува пред нашите очи“.
Објавата дојде откако Франција минатата недела објави дека ќе признае палестинска држава и еден ден откако Велика Британија изјави дека ќе го стори истото на Генералното собрание на Обединетите нации доколку борбите во Газа, дел од палестинските територии под израелска окупација, не завршат дотогаш.