Свет
(Видео) Сѐ е подготвено за историската средба: Трамп и Ким пристигнаа во Сингапур
Севернокорејскиот лидер, Ким Џонг-ун, денеска прв пристигна во Сингапур во пресрет на историскиот самит со претседателот на САД, Доналд Трамп, објавија локалните медиуми.
Како што претходно беше објавено, Ким слетал на аеродромот „Чанги“ во Сингапур, по што се упатил кон хотелот „Сеинт Регис“, каде што ќе престојува неговата делегација. Светските медиуми објавија фотографии и видеа од неговото доаѓање.
Си-Ен-Ен објави дека и Доналд Трамп пристигнал во Сингапур, во недела навечер по локално време, 36 часа пред почетокот на историскиот самит. Тој исто како и севернокорејскиот лидер, бил пречекан од страна на сингапурскиот министер за надворешни работи, Вивиан Балакришнан.
Новинарите го прашале како се чувствува за претстојниот состанок, а Трамп одговорил „многу добро“. Потоа влегол во лимузината и заминал во хотелот.
Инаку, регионалните медиуми пренесоа дека на патот до Сингапур, авионот на американскиот претседател на кратко слетал во Грција, поточно во воздухопловната база Суда, во северозападниот дел на островот Крит. Претходно се шпекулираше дека Трамп би можел да излезе и да ги поздрави американските војници сместени во НАТО базата, но сепак претседателскиот авионот наполнил гориво и го продолжил патот без да ги отвори вратите.
Средбата на Трамп и Ким ќе се одржи во вторник, во девет часот наутро по локално време, во хотелот „Чапел“. Тоа ќе биде прва средба на севернокорејски лидер со американски претседател.
Рускиот претседател, Владимир Путин, ја поздрави претстојната средба, како и напорите за решавање на кризата и додал дека и самиот е подготвен да се состане со американскиот колега.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Саливан: САД нема на располагање ниту еден „Патриот“ систем за противвоздушна одбрана што би можел да го достави до Киев
Советникот за национална безбедност на американскиот претседател, Џејк Саливан, рече дека Вашингтон во моментов нема достапни системи за противвоздушна одбрана „Патриот“ што би можел да му ги достави на Киев.
„Американските системи „патриот“ се распоредени низ целиот свет, вклучително и на Блискиот Исток, за да ја заштитат американската војска. Доколку има можност да се ослободи батерија, ќе ја испратиме во Украина“, рече тој, а пренесе телевизијата „Ем-ес-ен-бси“.
Истовремено, Саливан додаде дека Америка, додека не дојде во ситуација да испрати свои „патриотски“ системи во Украина, ќе работи да ги убеди своите сојузници од Европа да ги испратат своите системи за противвоздушна одбрана.
Свет
Бакингемската палата ја објави здравствената состојба на кралот Чарлс: познато кога ќе се врати на должностите
Кралот Чарлс ќе продолжи со јавните ангажмани следната недела откако е постигнат охрабрувачки напредок во лекувањето на ракот, објави Бакингемската палата.
За кралот тоа нема да биде целосно враќање на официјалните ангажмани, но палатата испраќа позитивни сигнали, јавува Би-Би-Си.
Следниот вторник кралот ќе започне со симболично патување во центар за лекување рак, пренесува медиумот.
Неговите летни планови вклучуваат државна посета, каде што ќе биде домаќин на императорот и царицата на Јапонија.
Во наредните недели, соопштија од палатата, тој ќе преземе неколку надворешни ангажмани.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.