Свет
(Видео) Трамп предложи вбризгување дезинфекциски средства во телото на болните од коронавирус

Американскиот претседател, Доналд Трамп, повторно ги шокираше медицинските работници со последните коментари за лек за коронавирус. Неговите коментари експертите ги нарекоа неодговорни и опасни.
Трамп на прес-конференција за коронавирусот сугерирал дека вбризгувањето дезинфекциски средства како изопропилен алкохол во телото би можело да го убие коронавирусот, а предложил и зрачење на телото на болниот од Ковид-19 со УВ-зраци.
Американските научници откриле дека вирусот брзо ја губи силата кога е изложен на сонце, топлина и влага, а истражувањето го претставиле пред јавноста на прес. Заедно со тоа, истражувањето открило и дека избелувач би можел да го убие вирусот во капките или во респираторните течности во рок од пет минути, а изопропилниот алкохол наводно може да го стори истото во покусо време. Трамп истакнал дека треба многу внимателно да се сфати ова истражување.
„Да претпоставиме телото да го изложиме на големи УВ-зраци или некое друго моќно зрачење“, рекол Трамп и и` се обратил на докторката Дебора Биркс, која е координаторка за борба против коронавирусот во Белата куќа. „Мислам дека рековте дека тоа сè уште не сте го провериле, но дека ќе го тестирате“.
Тој предложил вбризгување во белите дробови.
„Јас тогаш реков што ќе се случи ако пуштиме зраци внатре во телото, што може да се направи преку кожата или на некој друг начин, па вие рековте дека ќе тестирате. Тогаш видов дезинфекциски средства кои го уништуваат вирусот во минута, постои ли начин да направиме такво нешто, преку инјекција или со чистење? Средството да влезе некако во белите дробови. Тоа е интересно да се провери“, додал Трамп.
Тој ја прашал докторката за тоа дали слушнала за третман на лекување на коронавирусот со топлина и зраци?
„Не како третман. Мислам, температурата е добра работа, помага на телото да одговори на болеста, но сè уште не сум видела третман со помош на топлина или зрачење“, рекла Биркс додека Трамп и` одговорил дека би било многу добро ако се провери такво нешто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Габи Новак беше вистинска дама на југословенската поп-музика

Пејачката Габи Новак (1936–2025) беше вистинска дама на југословенската и хрватската забавна музичка сцена, вели музичкиот публицист и новинар Бранимир Локнер.
Во врска со веста за смртта на Габи Новак, Локнер изјави за „Танјуг“ дека првата фаза од нејзината кариера вклучувала поп, твист и други жанрови од шеесеттите години, потоа помек вокален џез.
Според него, нејзиниот стил се менувал низ годините и таа се обидела и со шансона, „што може да се види од композициите што ги направил нејзиниот сопруг Арсен Дедиќ (1938–2015)“.
Локнер рече дека Габи Новак не била фокусирана само на една музичка форма, а нејзиниот музички опус во однос на дискографијата, особено сингловите, е многу богат и таа била присутна на сцената континуирано.
Според неговите зборови, изведбата на Габи Новак на песната „Вино и гитари“ „до ден денес останува една од најголемите екс-џу еврегрини од 1960-тите“.
„Во првата фаза од нејзината кариера, таа беше покомерцијална, а нејзиниот подоцнежен пристап немаше таков комерцијализам, но беше препознаена и ценета. Секогаш ја сметаа за дама“, истакна Локнер.
Како што додаде, Габи Новак беше учесник на бројни забавни музички фестивали на домашната музичка сцена, а нејзината кариера беше придружена со релевантна дискографија.
Локнер додаде и: „Нејзините најплодни години во креативна смисла беа во втората половина на шеесеттите и првата половина на седумдесеттите“.
Свет
Трамп: Во првите две минути од средбата со Путин ќе знам дали може да се постигне договор

Американскиот претседател Доналд Трамп денес изјави дека украинскиот претседател Зеленски може да присуствува на неговиот самит со рускиот лидер Владимир Путин во Алјаска во петок, но изрази скептицизам дека тоа ќе направи разлика во постигнувањето мировен договор, објави денес телевизиската мрежа Си-Ен-Ен.
„Тој (Зеленски) не беше дел од тоа. Би рекол дека може да оди, но беше на многу состаноци. Знаете, тој е таму три и пол години. Ништо не се случи“, им рече Трамп на новинарите во Белата куќа.
„Ќе имаме состанок со Владимир Путин и на крајот од тој состанок, веројатно во првите две минути, ќе знам точно дали може да се постигне договор или не“, рече Трамп.
На прашањето на новинарите „како ќе го знаe тоа“, Трамп одговори: „Затоа што тоа го правам. Склучувам договори“.
Трамп подоцна додаде дека состанокот меѓу Путин и Зеленски ќе биде неопходен.
„На крајот на краиштата, ќе ги ставам двајцата во иста просторија. Или ќе бидам таму, или нема да бидам таму, и мислам дека ќе се среди“, рече Трамп.
Претседателот на САД рече дека „може да има многу дефиниции“ за добар договор, но исто така, според „Си-ен-ен“, се чини дека ги намали очекувањата пред самитот во петок.
„Се радувам на средбата со Путин за која мислам дека ќе биде добра, но може да биде и лоша“, рече Трамп.
Свет
Канаѓанец преживеал 9 дена во дивината, спасен благодарение на порака на камен

Маж кој исчезна пред повеќе од една недела во огромната дивина на Британска Колумбија, Канада, е пронајден жив откако го напишал зборот „Помош“ на карпа и напишал „СОС“ во калта.
Ендру Барбер (39) преживеал девет дена пиејќи вода од локва и градејќи импровизирано засолниште додека спасувачите не го пронашле, пишува „Би-би-си“.
Барбер исчезнал на 31 јули во близина на езерото Меклис, околу 587 километри северно од Ванкувер, откако неговиот камион се расипал. Девет дена подоцна, на 8 август, хеликоптер на Кралската канадска коњаничка полиција (RCMP) го забележал неговото возило на шумски пат, што значително ја стеснило областа за пребарување и на крајот довело до негово спасување.
Полициски хеликоптер набрзо го забележал Барбер во близина на неговото импровизирано засолниште. Пораката „ПОМОШ“ што ја напишал на каменот го привлекла нивното внимание. Тој бил тешко дехидриран и имал повреда на ногата, но сега е „прилично добро“.
„По повеќе од една недела во дивината, тој беше пронајден жив за време на воздушното пребарување денес“, објави локалната волонтерска група за пребарување и спасување Quesnel Search & Rescue на Фејсбук. „Овој исход е резултат на безброј часови на земја и во воздух, користејќи секој ресурс и технологија што ни е достапна“.
Спасувачкиот тим, исто така, сподели фотографија од засолништето што Барбер го изградил од стапчиња и кал, потпрен на карпа на која напишал порака за помош. По спасувањето, тој бил однесен во болница, каде што бил лекуван и отпуштен.
Барбер јадел што можел да најде додека бил во шумата. „Тој буквално сркал валкана вода од езерцето за да остане хидриран“, рече тој. „Човечкото тело може да издржи долго време без храна, но ситуацијата е поинаква со водата.“
Боб Цимерман, претседател на „Кеснел Рискју“, изјави за CBC News дека не е сигурен дали Барбер „ќе издржеше уште 24 часа ако не го пронајдовме ние“.