Свет
(Видео) Трамп ја објасни битката со коронавирусот: Ова е многу заразна болест!
Американскиот претседател Доналд Трамп го даде своето прво интервју на телевизија пред камера откако на 1 октомври му беше дијагностициран коронавирус.
Трамп се појави на телевизијата „Фокс Њуз“, каде рече дека се чувствува многу добро. Во разговор со д-р Марк Сигел, тој рече дека е повторно тестиран и дека смета дека е или негативен или скоро негативен. Тој додаде дека не знае кога му е следниот тест.
На прашањето како се чувствувал во болницата, тој рече дека бил уморен и дека ја немал енергијата која вообичаено ја има. Тој исто така рече дека смета дека можел да ја напушти болницата порано по земањето на лекот.
„ Тие сакаа да ме остават под опсервација, но јас сакав да заминам по првиот ден. Дојдоа најдобрите доктори од секаде, добро е да си претседател веројатно“, рече Трамп и додаде дека верува дека ќе бил во многу полоша состојба ако не останел и не ги земел лекарствата што му ги дале во болницата.
Тој ги пофали болницата и лекарите кои се грижеа за него. Нагласи дека е многу важно тоа што рано открил дека е заразен.
На прашањето дали имал идеја како се заразил со коронавирусот, тој одговори: „ Не знам. Имавме неколку големи настани во Белата куќа и можеби таму“.
„ Едно е што ќе научиш. Ова е многу заразна болест“, заклучи Трамп.
Тој додаде дека денес планира да одржи говор од балконот на Белата куќа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дојде време интеграцијата на Западен Балкан во ЕУ да стане реалност: Лајчак од самитот на Берлинскиот процес
Специјалниот пратеник на ЕУ за дијалогот меѓу Белград и Приштина, Мирослав Лајчак, кој учествуваше на денешниот самит на Берлинскиот процес, изјави дека е дојдено време интеграцијата на Западен Балкан во ЕУ да стане реалност.
Лајчак на социјалната мрежа „Х“ оцени дека во рамките на Берлинскиот процес биле направени многу корисни работи за луѓето од регионот.
„На 10-годишнината пораките беа многу јасни: многу е постигнато за луѓето од регионот, но дојде време интеграцијата на Западен Балкан во ЕУ да стане реалност“, рече Лајчак.
Тој додаде дека на денешниот самит на Берлинскиот процес учествувал на покана на германскиот канцелар Олаф Шолц.
Свет
Цело семејство во болница откако се затруле со печурки: пешачеле еден час за да повикаат помош во Пенсилванија
Дури 11 членови на семејство Амиши во САД, вклучително и деца, биле пренесени во болница откако јаделе отровни печурки.
Доброволната противпожарна компанија „Делта-Кардиф“ го опиша труењето како „инцидент со масовни жртви“ во градот Пич Ботом во округот Јорк, Пенсилванија.
Од противпожарната служба за локалните медиуми изјавиле дека член на семејството им кажал дека се разболеле откако јаделе диви печурки.
Еден од нив пронашол печурки во шумата и ги донел дома на вечера, јавува Би-Би-Си.
Членот на семејството кој пријавил дека на семејството му се слошило пешачел речиси еден километар за да повика помош бидејќи немале телефон, изјави портпаролот на пожарникарите.
Шест возила на брзата помош го однеле семејството во болница, а на местото била повикана и полиција.
Американската администрација за храна и лекови препорачува луѓето да се консултираат со искусен професионалец за правилно да ги идентификуваат печурките што се безбедни за јадење, и вели дека е многу побезбедно да се набават печурки од продавници за храна или професионални фарми за печурки.
Постојат околу 250 видови отровни диви печурки пронајдени низ Северна Америка, според Центарот за контрола на болести на Британска Колумбија.
Свет
Шефот на германското разузнавање: Русија ќе биде подготвена да го нападне НАТО до крајот на деценијата
Шефовите на германското разузнавање издадоа остри предупредувања на денешното парламентарно сослушување за руската шпионажа и подготовките на Москва за воен конфликт со НАТО.
„Подготвеноста на Москва да користи хибридни и тајни мерки достигна невидено ниво“, рече Бруно Кал, шеф на германската надворешна разузнавачка служба (БНД), истовремено предупредувајќи дека „директната воена конфронтација со НАТО стана опција за Москва“.
Кал им објасни на парламентарците дека целта на Кремљ е да ја зајакне војската во подготовка за потенцијален напад и да го подели Западот за да ја попречи способноста на Европа да се брани.
„Путин ќе продолжи да ги тестира црвените линии на Западот и дополнително да го ескалира конфликтот. Руските вооружени сили веројатно ќе бидат во позиција, кадровски и материјално, најдоцна до крајот на оваа деценија да извршат напад врз НАТО“, нагласи тој.
Додаде дека Кремљ, кој води сеопфатна војна против соседна Украина од февруари 2022 година, троши многу повеќе на својата војска отколку европските земји и значително ги зајакнува своите конвенционални сили. „Фокусот на ова акумулирање е, се разбира, долж источното крило на НАТО“, истакна тој, пренесува „Политико“.
Тој тврди дека крајната цел на рускиот претседател Владимир Путин е да ги „истурка САД од Европа“, да го врати НАТО на границите од крајот на 1990-тите и на тој начин да создаде „руска сфера на влијание“ и да воспостави „нов светски поредок“.
Томас Халдеванг, шефот на германската домашна разузнавачка агенција, потврди дека неговата агенција забележува „агресивно однесување на руските разузнавачки служби“ и дека шпионажата и саботажата во Германија се зголемени „и квантитативно и квалитативно“, при што Русија дури е подготвена да „положи човечки животи во ризик“, пренесува медиумот.
Претходно оваа година, Си-Ен-Ен објави дека американското и германското разузнавање спречиле руски заговор за атентат врз извршниот директор на производителот на оружје „Рајнметал“.