Европа
(Видео) Украина гради ѕид на смртта со 42.000 змејски заби, долг е 1.000 километри
![](https://makfax.com.mk/wp-content/uploads/2024/03/odbrana-ukraina.jpg)
Украинскиот претседател Володимир Зеленски објави дека армијата на Киев гради одбранбена линија долга повеќе од 1.000 километри.
По средбата со воените лидери, Зеленски на својот канал на „Телеграм“ објави дека украинскиот премиер Денис Шмихал известил за „темпото на изградба на нови одбранбени линии“, кои ќе поминат приближно 1.000 километри преку три одбранбени линии. Според украинскиот лидер, зајакнувањето на одбранбените позиции на Киев „е огромна задача, но темпото засега е добро“.
„Сметам на навремено завршување“, додаде Зеленски.
Украина работи на прегрупирање и надополнување на силите откако Русија ја постигна својата прва голема победа на бојното поле по неколку месеци бркајќи ги силите на Киев од Авдиивка минатиот месец и туркајќи го источниот фронт понатаму на украинска територија.
Шмихал во јануари објави дека украинската влада потпишала дополнителни 455 милиони долари за „изградба на инженерско-технички и фортификациски конструкции, соодветна опрема и системи на неексплозивни бариери“.
Британското Министерство за одбрана во извештајот на разузнавањето во неделата соопшти дека Украина речиси сигурно ја забрзала изградбата на своите одбранбени позиции. „Мерките вклучуваат противтенковски змејски заби и ровови, пешадиски ровови, мински полиња…“, објави британското разузнавање.
„Многу е веројатно дека проширувањето на одбранбените линии ќе ја намали способноста на Русија да напредува или да ги искористи тактичките придобивки како дел од нејзините тековни офанзивни операции“, додаде британското Министерство за одбрана.
Портпаролот на воената група Тавриск во источниот дел на Украина во петокот на националната телевизија изјави дека условите околу Авдиивка се стабилизирале и дека руското напредување е запрено.
„Волстрит џурнал“ минатата недела објави дека Украина работи на зајакнување на своите одбранбени позиции во очекување на руска офанзива напролет повикувајќи се и на западните и на украинските официјални лица. Според украинскиот командант Максим Жорин, киевските трупи градат ровови и противтенковски пречки за да ги одбијат руските напади.
Украинскиот копнеен командант, генерал-полковник Олександар Павлиук, рече дека Киев работи на стабилизирање на линијата на фронтот и подготовка за сопствена контраофанзива подоцна оваа година.
Украинското Министерство за одбрана на социјалните мрежи објави серија фотографии и видеа од изградбата т.н. ѕид на смртта, кој се состои од противтенковски пречки, подземни бункери, утврдени ровови, бетонски стапици, змејски заби…
Одбраната што ја градат Украинците потсетува на руската брутална линија Суровикин, огромен комплекс од утврдувања и мински полиња изградени од поранешниот генерал Сергеј Суровикин, што ја прекина големата украинска контраофанзива минатата година.
Според западните медиуми, украинската одбрана се состои од дури 42.000 змејски заби.
„Навистина, денес градиме утврдувања во целата наша земја. Во регионот на Запорожје градиме утврдувања заедно со армијата. Некои се изградени од армијата, а некои од цивилни изведувачи, каде што е можно. Тие се состојат од голем број компоненти почнувајќи од противтенковски ровови, змејски заби… сè што може да го забави или запре минувањето на непријателските возила“, изјави началникот на регионалната државна управа на Запорожје, Иван Федоров.
„Се обидуваме да ги подобриме одбранбените капацитети, така што престојот на нашата армија не само што е безбеден туку и удобен при извршувањето на борбените мисии“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Германската полиција уби навивач кој со секира влегол во фан-зоната на Европско првенство (ВИДЕО)
![](https://makfax.com.mk/wp-content/uploads/2024/06/germanija.jpg)
Германската полиција во Хамбург имаше полни раце работа. Во градот каде хрватската фудбалска репрезентација ќе го одигра следниот натпревар на ЕП, оној против Албанија, полицијата застрела и уби еден маж. Германските полицајци биле принудени на тоа, бидејќи мажот сакал со секира да нападне случајни минувачи во фан-зоната за време на Првенството.
Напаѓачот во Хамбург прво ги нападнал навивачите со секира, а потоа ги нападнал и обезбедувањето.
Полицијата прво употребила солзавец, а потоа пукала. Еден од истрелите на полицаецот бил предупредувачки, а вториот го погодил.
Наспроти првичните вести, нападот очигледно нема никаква врска со Европското фудбалско првенство.
„Местото на нападот е далеку од просторот каде се следат првенствените натпревари. Нема индиции дека напаѓачот има врски со некоја од навивачките групи“, соопштија од полицијата.
Денеска во Хамбург се игра натпреварот помеѓу Полска и Холандија и градот е преполн со навивачи на двата табора.
Европа
Четворица загинати во страшна сообраќајка во Грција, пожарникарите го сечеа возилото за да ги извадат телата (ВИДЕО)
![](https://makfax.com.mk/wp-content/uploads/2024/06/soobrakajka.jpg)
Во сударот меѓу автобус и автомобил, што се случи денес наутро пред Токсотес Ксанти, на стариот национален пат Ксанти-Кавала во Грција, четири лица загинаа, а три се повредени.
Според првите информации, во судирот што се случил нешто по 08:00 часот, едно возило изгубило контрола и удрило во автобус што минувал.
Патниците загинале на лице место, а пожарникарите го сечеле возилото за да дојдат до телата на настраданите во автомобилот.
Европа
Без пратеници Роми остана Европскиот парламент
![](https://makfax.com.mk/wp-content/uploads/2022/04/evropski-parlament.jpg)
Со приближно 10 до 12 милиони жители во Европа, од кои околу шест милиони живеат во ЕУ, Ромите се едно од најбројните европски етнички малцинства. Сепак, во новиот состав на Европскиот парламент, избран минатата недела, првпат по 2004 година нема ниту еден европратеник припадник на ромската заедница.
Еден од најгласните застапници за правата на Ромите во Европскиот парламент досега беше Интергрупата за антирасизам и различности (АРДИ), чии цели се промовирање на расната еднаквост и информирање за проблемите со кои се соочуваат малцинствата. Без претставници на Ромите во ова тело, постои стравување од потенцијално поместување на приоритетите, како и намалување на сфаќањето на вистинските предизвици со кои се соочува ромската заедница.
Вклучувањето на претставниците на Ромите во процесот на одлучување би овозможил посеопфатно разбирање за потребите на заедницата, која има тешка историја низ целиот европски континент. Припадниците на ромската заедница се соочуваат со дискриминација низ цела Европа – 68 отсто од Ромите предвремено го напуштаат образовниот систем, а 80 проценти од нив живеат под прагот на сиромаштија.
Ваквите предизвици се вкоренети во стотиците години систематски предрасуди и социјална исклученост, кои продолжуваат да се одржуваат дури и до денес.
Една од земјите со процентуално најголема застапеност на Ромите во ЕУ е Романија. Според официјалните статистичките податоци 2,99 проценти од жителите на Романија се Роми, но според ромските организации реалната стапка на припадници на ромската заедница во земјата надминува осум отсто од вкупното население. Но, меѓу кандидатите за европратеници од Романија немаше ниту еден Ром, што е уште еден доказ за маргинализација на ромската заедница во земјата.
За споредба, унгарското малцинство кое сочинува 5,25 отсто од населението, освои два од вкупно 33-цата романски европратеници.
Отсуството на ромски кандидати за европратеници може да се припише на предизвиците со кои се соочуваат Ромите во политичкото мобилизирање, како поради систематското угнетување кое го одржува циклусот на сиромаштија во заедницата, така и поради бројните стереотипи кои ги спречуваат гласачите да се одлучат за ромските партии.