Свет
(Видео) Хорор во Москва: петгодишно девојче пронајдено во стан затрупан во ѓубре и лебарки

Полицијата морало да носи заштитна облека во акцијата за спасување на петгодишното девојче во Русија, кое го нарекоа женски Могли. Девојчето не зборува, ниту знае да се однесува со луѓето, а подолго време живеело во стан во Москва кој личи на депонија, полн со лебарки.
Запоставеното девојче го нарекоа Љубов. Кога го пронашле, тоа било дехидрирано и болно бидејќи неговата мајка Ирина Гарасенко (47) го оставила во валкан стан полн со ѓубре веќе подолго време, пишува „Дејли мејл“.
Прегладнетото девојче во ѓубрето си направило засолниште, каде што се криело, а станот толку бил запуштен што полицијата морало да носи заштитна облека за да влезе внатре.
Медиумите откриваат стравотни детали за случајот. Синџирчето што детето го носело му зараснало во вратот, кој бил во рани. Првата средба со детето покажала дека тоа не знае да зборува, туку дека испушта само некакви крици.
Кога спасувачите му понудиле вода, руските медиуми пишуваат дека тоа испила два литра. Се претпоставува дека девојчето има анорексија, што ќе биде утврдено при прегледите што следуваат. Во станот прв влегол соседот кога го слушнал плачот на детето по што ја повикал полицијата.
„Речиси се онесвестивме кога видовме во каква состојба е станот и колку смрдеше. Полицајците мораа да носат заштитна облека. Ѓубрето беше изгниено и се чувствуваше ужасна реа. Девојчето седеше покрај прозорецот на кујната. Имаше шапка и кошула на себе. Немаше долна облека. Ужасно плачеше. Во станот немаше храна, а насекаде лазеа лебарки“, изјави соседот.
Соседите раскажуваат дека мајката дошла пред пет години носејќи со себе бебе, но дека набргу го оставила да живее со бабата. Нејзиниот сопруг го депортирале во Украина.
Претпоставките се дека детето од неговото раѓање никогаш не излегло надвор ниту, пак, имало контакт со надворешниот свет.
Кога полицијата го спаси бебето, мајката се вратила дома, но соседите ја спречиле да побегне. Таа е уапсена под обвинение за обид за убиство и е задржана во притвор. Соседите исто така сведочат дека жената елегантно се облекувала, им велела дека има постојана работа и помагала во чистењето на заедничките простории во блокот во кој живееле.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Руски преговарач објави провокативна карикатура со Трамп и европските лидери

Клучниот помошник на Владимир Путин и главен преговарач на Русија, Кирил Дмитриев, објави карикатура на социјалната мрежа X, коментирајќи го ставот на Западот кон Украина пред најавените меѓународни преговори.
Тој напиша: „Лажни вести од ЕУ кои промовираат лажни наративи пред големиот ден“.
Сликата ја прикажува Белата куќа во позадина, додека американскиот претседател Доналд Трамп, облечен во престилка и држејќи кујнски нож, стои пред голем ковчег со украинско знаме и среќно свирка додека го остри сечилото. Пред него има кофа.
Fake EU news promoting fake narratives ahead of a Big Day. pic.twitter.com/cbe4gSoTXE
— Kirill A. Dmitriev (@kadmitriev) August 18, 2025
На левата страна од сликата се европските лидери кои пристигнуваат денес, предводени од Зеленски, на средба со Трамп.
Францускиот претседател Макрон и британскиот премиер Стармер се чини дека носат голем ковчег со украинско знаме. Другите, претседателката на Европската комисија Урсула фон дер Лајен, италијанската премиерка Џорџија Мелони, германскиот канцелар Фридрих Мерц, финскиот претседател Александар Стаб и Зеленски, стојат и клекнуваат пред Трамп како да го молат. Фон дер Лајен е облечена во знамето на Европската Унија.
Пораката на карикатурата е јасна: Трамп е прикажан како оној што одлучува за судбината на Украина, додека европските лидери изгледаат беспомошно и понижено.
Цртаната слика веројатно има за цел да ја исмее немоќта на Европа пред САД и Русија.
Европа
(Видео) Девет загинати во руските напади врз Украина ноќеска, меѓу нив и деца

Најмалку девет лица, меѓу кои и три деца, се убиени во последните 24 часа во зголемените руски напади низ Украина, потврдија украинските власти, објави Си-ен-ен.
Во Харков, вториот по големина град во Украина, пет лица беа убиени, а најмалку 20 други беа повредени откако беше погодена станбена зграда. Нападот предизвика пожар и зградата се урна, изјави Олех Синиехубов, началник на регионалната воена администрација.
Синиехубов објави на Телеграм дека меѓу жртвите се девојче од година ипол и 16-годишно момче. Пет лица сè уште се бараат.
Реагирајќи на нападот во Харков, украинската премиерка Јулија Свириденко рече: „Русите само продолжуваат да вршат масовни убиства“.
„Оваа војна никогаш не беше предизвикана; таа продолжува само затоа што на Москва ѝ е дозволено да продолжи“, рече таа на социјалната мрежа Икс.
Петнаесетгодишно момче беше убиено кога бомба ја погоди куќата на неговото семејство во селото Новојаковливка во Запорожје, потврди Иван Федоров, началник на регионалната воена администрација. Братот, сестрата и родителите на момчето беа исто така ранети во нападот. Три лица загинаа и во Донецк, соопшти Вадим Филашкин, началник на регионалната воена администрација таму.
Пожарникарите во Одеса се бореа со голем пожар во енергетска централа по „масивен“ напад со беспилотни летала, соопшти Државната служба за вонредни ситуации.
Додека американскиот претседател Доналд Трамп се фокусира на постигнување мировен договор, а не на прекин на огнот, украинскиот претседател Володимир Зеленски инсистира дека преговорите не се можни додека Русија продолжува да ја бомбардира неговата земја.
Украинскиот министер за надворешни работи Андриј Сибиха во понеделник ја повика Москва да „го запре убивањето со цел да се унапреди дипломатијата“.
Свет
„Зеленски се соочува со тешка средба со Трамп, мировните услови нема да бидат во корист на Киев“

Украинскиот претседател Володимир Зеленски се соочува со тешка средба со американскиот лидер Доналд Трамп во Белата куќа. Условите за евентуален мировен договор веројатно нема да бидат во корист на Киев, изјави експерт за надворешна политика за Си-ен-ен.
Роберт Инглиш, директор на Центарот за централноевропски студии на Универзитетот во Јужна Калифорнија, рече дека Трамп бил многу јасен во своите пораки до Зеленски.
„Трамп јасно му кажа дека ќе мора да прифати дека поголемиот дел од изгубената територија е изгубен на долг рок“, рече Инглиш, додавајќи: „Сите илузии за враќање на Крим и поголемиот дел од Донбас се завршени“.
Според него, Зеленски ќе мора да се соочи со болната вистина. „Зад сцената, постои јасно разбирање дека Зеленски ќе мора да го проголта тоа горчливо апче. Сега мора да се фокусираме на иднината и да обезбедиме цврсти безбедносни гаранции за Украина“.
На Зеленски во Вашингтон ќе му се придружи силна делегација од европски лидери – Емануел Макрон (Франција), Фридрих Мерц (Германија), Кир Стармер (Велика Британија) и Урсула фон дер Лајен (Европска комисија).
Целта на посетата е да се координира поддршката за Киев и да се обликува заеднички пристап кон иднината на западната помош за Украина.
„Самиот факт дека сите се таму заедно и се обидуваат да постигнат заедничко разбирање – тоа е клучно“, рече Инглиш.
Сепак, тој предупредува дека главниот акцент веројатно ќе се префрли од членството во НАТО на долгорочните безбедносни аранжмани.
„Додека постои подготвеност за обезбедување воени сили и ветувања за помош на Украина, додека САД обезбедуваат залихи, разузнавање и логистика – ако сето ова е поткрепено со некаков договор што може да трае со години и да се обновува на неодредено време – тоа ќе биде многу блиску до заштитата на НАТО. А тоа е она што Украина го немала претходно.“