Свет
Водостојот на Дунав расте: во Будимпешта би можело да го достигне својот врв за време на викендот

Дунав, чијшто водостој моментално е над осум метри, би можел да го достигне својот врв во Будимпешта за време на викендот, според прогнозите на метеоролозите.
Во Унгарија, која се бори со поплави откако циклонот „Борис“ предизвика обилни врнежи во Централна Европа, ситуацијата е најкритична во селото Кисмарош, каде мештаните веќе користат чамци по улиците, додека населението на градот Баја се подготвува за најголемата поплава во последните 11 години, пренесува „Index.hu“.
„Во Будимпешта се очекува бавен раст, водостојот на Дунав ќе се зголеми за педесет сантиметри до сабота навечер, по што реката полека ќе почне да се повлекува“, изјави генералниот директор на националното водостопанство Иштван Ланг.
Тој нагласи дека поплавите се големи и дека одбраната е отежната.
Тој рече и дека просечниот водостој на Дунав е околу педесет сантиметри понизок од нивото на водата за време на поплавите во 2013 година, но дека оптоварувањето на одбранбените линии е сепак многу значајно.
Ланг истакна дека времето за одбрана ќе биде подолго од претходно планираното бидејќи падот на водостојот е побавен од очекуваното.
Унгарија се бори со поплави откако циклонот „Борис“ предизвика обилни врнежи во Централна Европа, јавува Танјуг.
Најлошите поплави што ја погодија централна Европа во последните две децении погодија делови од Полска, Чешка, Романија, Австрија и Словачка и однесоа најмалку 24 животи.
Претседателката на Европската комисија, Урсула фон дер Лајен вчера се сретна со лидерите на европските земји погодени од поплавите, меѓу кои Полска, Австрија, Чешка и Словачка и вети финансиска помош од Европскиот фонд за солидарност.
Таа изјави дека ЕУ ќе обезбеди уште 10 милијарди евра од кохезиониот фонд поради огромните штети предизвикани од поплавите
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макрон: Повлекувањето на Иран од договорот за нуклеарно оружје би било најлошото сценарио

Францускиот претседател Емануел Макрон денес изјави дека повлекувањето на Иран од Договорот за неширење на нуклеарно оружје, по нападите на САД врз нуклеарните постројки во таа земја, би било „најлошото можно сценарио“.
Тој рече дека во наредните денови ќе разговара со претставниците на петте постојани членки на Советот за безбедност на ОН, вклучувајќи го и американскиот претседател Доналд Трамп, со цел да се обиде да го зачува договорот, пренесува BFM.
„Се надеваме дека ќе има вистинско приближување на ставовите бидејќи целта е да се спречи Техеран да продолжи со своите активности за ширење“, рече Макрон.
Свет
Орбан: Ќе има последици за организирање на „Парадата на гордоста“ во Будимпешта

Унгарскиот премиер Виктор Орбан денес предупреди дека ќе има правни последици за организирање или присуство на парадата на гордоста во Будимпешта, која е закажана за сабота.
Тој рече дека ова ја крши полициската забрана за настанот.
„Ние сме возрасни и им препорачувам на сите сами да донесат одлука, но да ги почитуваат правилата. Ако не го сторат тоа, ќе се соочат со јасно дефинирани правни последици“, изјави Орбан за државното радио, објави Ројтерс.
Премиерот нагласи дека полицијата има овластување да го растера забранетиот настан, но додаде дека Унгарија е „цивилизирана земја“ и дека задачата на полицијата е да ги убеди луѓето да го почитуваат законот.
Свет
Мерц: Германија мора да ја води Европа напред

Германскиот канцелар Фридрих Мерц истакна дека има намера повторно да ја направи Германија движечка сила на Европската Унија, како и дека сака да даде „личен придонес за да се осигури дека Европа успешно ќе продолжи во наредните години“.
На своето прво учество на самитот на ЕУ, кој заврши во четврток во Брисел, откако ја презеде функцијата во мај, Мерц рече дека сака да види брзо решавање на трговскиот спор на Европската Унија со Соединетите Американски Држави.
„Исто така, ја поддржувам Европската комисија во сите нејзини напори за брзо постигнување трговски договор со САД“, рече Мерц, објави Танјуг.
Рокот што го постави американскиот претседател Доналд Трамп за преговори за царини со ЕУ истекува на 9 јули, а Мерц ја обвини Европската комисија дека преговорите се „премногу комплицирани“.
Кога станува збор за војната на Израел во Појасот Газа, Мерц ги отфрли казнените мерки против таа земја или суспендирањето на Договорот за асоцијација на ЕУ со Израел, што го побараа некои земји.
Ова следеше по објавувањето на ревизорскиот извештај на ЕУ, во кој се наведува дека постапките на Израел во крајбрежната зона ги кршат воспоставените принципи на тесна соработка со меѓународната заедница.
Во заедничка изјава, шефовите на држави и влади на ЕУ ги повикаа сите страни на Блискиот Исток да покажат воздржаност и да го почитуваат меѓународното право. Тие, исто така, потврдија дека Иран никогаш не смее да се здобие со нуклеарно оружје, како и дека Европската Унија ќе продолжи да учествува во сите дипломатски напори за намалување на тензиите во регионот.
Мерц учествуваше и на неформален состанок на маргините на Европскиот совет во Брисел, на кој присуствуваа лидерите на 21 од 27-те земји-членки на ЕУ, кои имаат намера да развијат предлози за построга миграциска политика, чии домаќини беа Данска, Италија и Холандија.