Свет
Вонредна состојба на Еквадор: озлогласен нарко бос избега, во затворите избија немири, чувари се држат за заложници
Еквадор прогласи вонредна состојба кога еден од најопасните криминалци во земјата исчезна од својата ќелија, додека во затворите ширум земјата избија немири во кои затворските чувари беа совладани и земени како заложници.
Илјадници војници и полицајци трагаат по Адолфо Масијас, познат како Фито, осудениот водач на моќната нарко банда Лос Чонерос.
44-годишниот нарко бос исчезна во неделата од затворот во пристанишниот град Гвајакил каде ја отслужуваше казната. Наскоро требало да биде префрлен во објект со максимална безбедност во истиот град. Еквадорскиот претседател Даниел Нобоа вчера прогласи вонредна состојба од 60 дена.
„Помина времето кога осудените за трговија со дрога, атентати и организиран криминал и кажуваа на владата што да прави“, рече тој. Нобоа (35), кој беше избран во ноември со ветување дека ќе го сузбие насилниот криминал, рече дека неговата влада им наредила на војската и полицијата да преземат акција.
„Нема да преговараме со терористите и нема да запреме додека не го вратиме мирот на Еквадорците“, рече тој. Во последниве години оваа јужноамериканска земја се соочи со бран на насилство, а владите беа немоќни во обидот да го спречат организираниот криминал, пишува Гардијан.
Затворските власти во Еквадор потврдија дека чуварите биле земени како заложници во пет затвори ширум земјата, без да дадат дополнителни детали. Непроверените снимки од социјалните мрежи наводно покажуваат маскирани членови на банда со нож како заложници ги држат гувернерите на затворот додека читаат изјави во кои бараат од претседателот Нобо „да внимава на нивните животи и безбедноста“.
„Ние сме татковци, глави на семејства, во многу случаи ги разбираме вашите постапки, но ве предупредуваме затоа што не се грижите за нас кои сме на боиштето, пред куршуми“, велат заложниците. Обвинителството на Еквадор објави дека двајца функционери се уапсени под сомнение дека му помогнале на Масијас да избега.
Масијас отслужува 34-годишна затворска казна од 2011 година, осуден за трговија со дрога, убиства и организиран криминал. Тој беше во затворот Гуајас 4, познат како Ла Регионален, во Гвајакил, пристанишен град. Лос Чонерос е една од еквадорските банди кои властите ги сметаат за одговорни за бранот насилство.
Безбедносните аналитичари велат дека бандата е поврзана со мексиканскиот картел Синалоа. Минатата година во Еквадор беше убиен претседателскиот кандидат Фернандо Вилависенсио. Пред неговата смрт, политичарот рече дека му се заканувале од бандата, но досега властите директно не го обвинија Масијас или неговата група дека стојат зад убиството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Орбан: Европејците избраа војна, Унгарија мора да каже „не“
Унгарскиот премиер Виктор Орбан изјави денеска дека војната претставува голем ризик за Унгарија, бидејќи, како што рече, „за разлика од САД, Европејците одлучија да ја поддржат војната и ќе ѝ обезбедат на Украина сè што ѝ е потребно за водење војна“.
– Порано или подоцна ќе испратат војници. Постојат писмени договори меѓу Франција и Велика Британија. Кога трупите ќе бидат испратени во Украина, војници ќе заминат и од Унгарија, особено ако земјата има влада која не може да каже ‘не’ во Брисел“, изјави Орбан.
Тој оцени дека за избегнување на вклучување во војната е потребна „памет“, додавајќи дека лидерите мора да бидат паметни, лукави и искусни.
– Можам да ја задржам Унгарија надвор од војна, за разлика од Иштван Тиса или Миклош Хорти, рече Орбан, алудирајќи на поранешни унгарски државници од периодот пред Втората светска војна.
Орбан изјави дека се спротивставува на „бриселската илузија“ дека војната нема да ја чини Европа ништо, бидејќи, според таа логика, Русија ќе плати репарации и ќе биде „плен“.
– Ако Унгарија влезе во војна, тоа би нè чинело нас, нашите деца и внуци во следните 10 до 20 години, затоа мораме да кажеме ‘не’, рече Орбан.
Тој додаде дека Унгарија не мора да зазема страна ниту со Украина, ниту со Русија.
– Јас стојам на страната на Унгарија. Имаме сопствени цели и национални интереси. Ќе купуваме гас и нафта од Русија и ќе тежнееме кон добрососедски односи со Украина по завршувањето на војната, изјави Орбан.
Според него, Унгарија не би можела да го задржи системот на ограничување на цените на комуналните услуги без евтина руска енергија, додавајќи дека прекинот на снабдувањето со руски гас и нафта би довел до повеќекратно зголемување на цените во споредба со соседните земји.
– Украина бара 800 милијарди евра за управување со државата во следните 10 години и уште 700 милијарди за воени цели. Таа сума би го финансирала унгарскиот пензиски систем 60 години и семејните субвенции 40 години, изјави Орбан.
Свет
Експлозии пријавени низ Иран
Неколку експлозии се пријавени нво Иран денеска, во услови на зголемени стравувања од војна во регионот, јави ДПА.
Во пристанишниот град Бандар Абас, на Персискиот Залив, едно лице загина, а 14 се повредени во експлозија, соопшти новинската агенција Тасним, која е блиска до Исламската револуционерна гарда (ИРГЦ).
Очевидци пријавиле и најмалку една експлозија во близина на главниот град Техеран. Иранските медиуми, повикувајќи се на официјален извор, наведоа дека се запалила трска во корито на река.
Во југозападниот дел на Иран, онлајн-порталот Нур њуз, повикувајќи се на шефот на противпожарната служба во градот Ахваз, објави дека експлозија на гас усмртила четири лица.
Тасним ги демантираше гласините дека експлозијата во Бандар Абас била обид за напад врз командантот на морнарицата на ИРГЦ, Алиреза Тангсири.
Државната новинска агенција ИРНА објави фотографија од делумно уништениот преден дел на повеќекатна станбена зграда. Државната телевизија соопшти дека експлозијата била предизвикана од истекување гас.
Наскоро треба да започне тридневна поморска воена вежба на ИРГЦ во Персискиот Залив, во која се очекува да учествуваат и Кина и Русија.
Маневрите се најавени во период кога американскиот претседател Доналд Трамп распореди флота, вклучително и носачи на авиони, во регионот.
Трамп во повеќе наврати ѝ се закануваше на власта во Техеран со интервенција, поради, како што наведе, бруталното задушување на протестите од страна на иранскиот безбедносен апарат.
Свет
Во Белград се урна напуштен двокатен објект
Дел од напуштен двокатен објект се урна попладнево во Белград и според службите за справување во итни случаи, нема повредени.
Шефот на Одделот за вонредни ситуации, Лука Чаушиќ, изјави дека стар напуштен двокатен објект се урнал на улицата „Џорџ Вашингтон“ во Белград околу 13:30 часот и дека е урнато градежно скеле што било наслонето на објектот.
Тој додаде дека според моментално достапните информации, нема повредени, ниту жртви.
При уривањето уништени се четири возила паркирани пред двоспратниот објект.
Во моментот се уште се врши пребарување на теренот каде се урнал објектот.
Опозициски партии упатија критики до градските власти и побараа оставка од градоначалникот на Белград, Александар Шапиќ.

