Свет
Во Венецуела кражби на улиците, децата гладни, а во болниците не работат респираторите

Националното собрание на Венецуела вчера прогласи вонредна состојба, а владата им нареди на училиштата и компаниите да останат затворени поради прекин на електричната енергија, кој трае веќе пет дена.
Опозицијата соопшти дека поради недостиг на струја во државата, загинале најмалку 17 луѓе. Привремениот самопрогласен претседател Хуан Гваидо за состојбата во државата ја обвини владата, а официјалниот претседател Николас Мадуро вината ја префрли на САД и империјалистичките сили.
Жителите на главниот град Каракас за Би-би-си раскажале како изгледа животот во мрак и колку е тешка состојбата за граѓаните на Венецуела.
Провладините вооружени мотоциклистички банди во земјата, познати како „колективос“, беснеат по мрачните улици на градот и грабежите се сè почести. Многу делови на земјата сè уште немаат струја, а во оние каде што е дојдена, има само неколку часа во денот и повторно се исклучува.
Без интернет, мобилен телефон, банки, банкомати, клима-уреди, секојдневниот живот за многумина стана неподнослив, особено за оние со пониски примања.
„Имам двегодишен син. Синоќа немавме што да јадеме“, вели Мајори од населбата Теразас дел Клуб Хипико во Каракас и додала дека ограбена е продавницата во близина на нејзиниот дом, а соседите ѝ дале малку ориз.
„Додадов малку шеќер и го нахранив детето, но што ќе му дадам денес да јаде кога ќе ми побара храна? Јас можам да трпам глад. Нам возрасните доволна ни е и чаша вода, но што да прави детето во ваква ситуација?“, се жали таа.
На улиците може да се видат очајни мајки како тропаат по затворените продавници барајќи да ги пуштат внатре. Но, вработените примаат само американски долари бидејќи не им работи ниту една каса и зошто не се плаќа со картички.
Загрижувачка е и состојбата со болниците. Нема соодветни услови за прием на болните, а не работат и повеќето од апаратите. Поради хаосот што владее во Венецуела, невозможно е и да се погребаат починатите. Ништо не функционира, со денови не работат институциите, сè е во прекин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Камења паѓаат, животни бегаат во водата: блогер објави видео во моментот на разорниот земјотрес

Додека разорниот земјотрес со магнитуда од 8,8 степени ја погоди Камчатка, туристот и блогер Иван Герасименко се најде на експедициски брод во непосредна близина на епицентарот. Според него, сè се случило ненадејно и драматично – масивни камења почнале да паѓаат од стрмните карпи, а животните реагирале во паника.
„Земјотресот ме затекна во близина на островот Парамушир додека пловевме по малиот остров Анциферов на експедициски бродови од типот Зодијак“, напиша Герасименко на социјалните мрежи, а објави и видео снимено во тој момент.
Според неговиот опис, масивните камења почнале да се кршат и да паѓаат во морето, предизвикувајќи општа паника кај екипажот, патниците, па дури и кај животните во областа.
„Камењата летаа со таков шум што дури и морските лавови скокнаа во водата и долго време кружеа околу Охотското Море од страв“, напиша тој, пренесува Dnevnik.hr.
Блогерот истакна дека сите патници биле потресени.
Епицентарот на земјотресот се наоѓал на околу 150 километри од местото каде што се наоѓал бродот во моментот на ударот.
Фото: принтскрин
Свет
„Мораме да ги натераме да се плашат од нас“: Макрон за трговскиот договор меѓу САД и ЕУ

Францускиот претседател Емануел Макрон денес изјави дека Европската Унија не успеала да го искористи својот огромен единствен пазар и доволно да ги исплаши САД за да прифатат подобар договор од оној постигнат во неделата.
„Мораме да ги натераме да се плашат од нас“, им рече Макрон на министрите на денешниот состанок, изјави француски функционер близок до претседателот за „Политико“.
Макрон беше забележливо тивок откако американскиот претседател Доналд Трамп и претседателката на Европската комисија, Урсула фон дер Лајен, постигнаа договор, според кој ЕУ ќе плаќа царини од 15 проценти за поголемиот дел од својот извоз во САД, анализира медиумот.
Денес, тој го критикуваше договорот, но со многу поблаг тон од премиерот Франсоа Баиру, кој рече дека тоа е „црн ден за Европа“.
Денес, претседателот на Франција истакна дека верува оти сè уште има време договорот да се подобри и рече: „приказната не е завршена, нема да застанеме тука“.
Францускиот министер за трговија Лоран Сен Мартен и министерот за Европа, Бенџамин Хадад, ја повикаа Европската комисија да престане да го користи таканаречениот инструмент против принуда, алатка дизајнирана да одговори на економскиот притисок што му дава на Брисел моќ да го ограничи пристапот на американските компании до јавни набавки, странски директни инвестиции и финансиски пазари во ЕУ.
Брисел, пак, ги обвини сите критичари дека одлучиле да „играат квотербек“ кога сè беше договорено и тврди дека овој договор е најдобриот што можеле да го добијат и дека претставува значително подобрување во однос на царините од 30 проценти со кои се закани администрацијата на Трамп.
Фото: принтскрин
Свет
Претседателката на Молдавија: Русија од есен сака да ја контролира нашата држава

Претседателката на Молдавија, Маја Санду денес ги прогласи корупцијата и нелегалното финансирање од Русија за најголема закана за парламентарните избори што се одржуваат на 28 септември во таа источноевропска земја.
„Руската Федерација сака да ја контролира Република Молдавија од есен па натаму и подготвува невидено влијание врз изборите во септември“, рече молдавската претседателка на прес-конференција во Кишињев.
Кремљ ги отфрли тврдењата дека Русија се мешала во изборниот процес на земјата со два и пол милиони жители.
„Најголемата опасност од руско влијание врз нашите внатрешни работи е тоа што претставува директна закана за националната безбедност, суверенитетот и европската иднина на нашата земја“, рече Санду.
Кишињев тврди дека Русија ќе дејствува преку поткуп на гласачи, кибернапади, платени протести и дезинформации. „Финансирање вредно околу 100 милиони евра е планирано само преку криптовалути“, рече Санду, без да даде докази за тврдењето.